Read Mizo_Old_version Ezekiela 48 Bible Online

Ezekiela 48 - Mizo_Old_version bible

Ezekiela 48

¹“Hêng hi an hnam hmingte chu a ni: hmâr lam ramri Tuipui lian aṭanga Hethlon kaltlangin Hamath luhna ruamah, Damaska ramria Hamath kiang hmâr lampang Hazar-enan thlengin, chhak leh thlang zâwngin chan khat chu Dan-ho chan a ni a.

²Dan-ho chan nêna inriin chhak leh thlang zâwngin chan khat chu Aser-ho chan a ni a.

³Aser-ho chan nêna inriin chhak leh thlang zâwngin chan khat chu Naphtali-ho chan a ni a.

⁴Naphtali-ho chan nêna inriin chhak leh thlang zâwngin chan khat chu Manase-ho chan a ni a.

⁵Manase-ho chan nêna inriin chhak leh thlang zâwngin chan khat chu Ephraim-ho chan a ni a.

⁶Ephraim-ho chan nêna inriin chhak leh thlang zâwngin chan khat chu Reuben-ho chan a ni a.

⁷Reuben-ho chan nêna inriin chhak leh thlang zâwngin chan khat chu Juda-ho chan a ni.

⁸“Juda-ho chan nêna inriin chhak leh thlang zâwngin, ram zuat in hlan tûr chu a vâng tawng sînghnih leh sângnga a ni ang a, a dung chu chhak leh thlang zâwngin chan dang ang bawk a ni a, a laia hmun serh awmin.

⁹Ram zuat LALPA hnêna in hlan tûr chu a dung tawng sînghnih leh sângnga, a vâng tawng sînghnih a ni tûr a ni.

¹⁰Heti ang hian puithiamte tân ram serh zuat tûr a ni ang: hmâr lam zâwngin a dung tawng sînghnih leh sângnga leh, thlang lam zâwngin a vâng tawng sîngkhat leh, chhak lam zâwngin a vâng tawng sîngkhat, chhim lam zâwngin a dung tawng sînghnih leh sângnga a ni tûr a ni, a laia LALPA hmun serh awmin.

¹¹Puithiam serh tawh, Zadoka fa ka thu vawngtute tân a ni ang. Chûngte chu Israel fate an vah bo laia, Levia chite an vâk bo ve ta mai anga vâk bo ve lote kha an ni a.

¹²Tin, ram zuat pum pui ata an tâna zuat bîk, hmun serh ber a ni ang a, Levia chi chan nêna inriin.

¹³Puithiam chan zûl zêlah chuan Levia chiten chan an nei ang a, a dung tawng sînghnih leh sângnga, a vâng tawng sîngkhat a ni ang.

¹⁴Tin, an hralh tûr a ni lo va, an thleng tûr a ni hek lo; a ram ṭha ṭha pawh mi dang hnênah pêk tûr a ni lo, LALPA tâna serh a ni si a.

¹⁵A vâng tawng sînghnih leh sângnga bâka tawng sângnga chu vântlâng chan, khawpui dinna tûr, chênna in tûr leh daifêm atânte a ni ang; khawpui chu a lai takah a awm ang.

¹⁶Tin, a teh vêl dân chu hetiangin a ni ang: a hmâr lampang tawng sângli leh zanga, a chhim lampang tawng sângli leh zanga, a chhak lampang tawng sângli leh zanga, a thlang lampang tawng sângli leh zanga.

¹⁷A khawpui chuan daifêm a nei ang a, hmâr lampang chuan tawng zahnih leh sawmnga, chhim lampang tawng zahnih leh sawmnga, chhak lampang tawng zahnih leh sawmnga, thlang lampang tawng zahnih leh sawmnga.

¹⁸A dung lam la chuang ram zuat serh tawh hrûla mi chu chhak lamah tawng sîngkhat, thlang lamah tawng sîngkhat a ni ang. Ram zuat serh tawh hrûl zêl a ni tûr a ni a; tin, chuta thil chhuakte chu khawpuia hnathawktute ei tûr a ni ang.

¹⁹“Khawpuia hnathawktu Israel hnam zawng zawnga mite chuan a lei an let ang.

²⁰Ram zuat pum pui chu a dung tawng sînghnih leh sângnga, a vâng tawng sînghnih leh sângnga a ni ang. Ram zuat serh tawh, kil li bial, khawpui chan nên in hlân tûr a ni.

²¹A bâk ram zuat serh tawh leh khawpui chan sîr tuak ve ve chu lal chan a ni ang a, chhak lam zâwngin ram zuat tawng sînghnih leh sângnga bâk leh, thlang lam zâwngin tawng sînghnih leh sângnga bâk, ram bung dangte hrûl zêl chu lal chan a ni ang; tichuan, ram zuat serh tawh leh in pui hmun serh chu a lai takah a awm ang.

²²Tin, Levi-ho chan leh khawpui chan chu lal chante inkârah a awm ang a, lal chan chu Juda-ho chan leh Benjamin-ho chan nên a inri ang.

²³“Hnam la awmte chungchâng thu-ah chuan, chhak leh thlang zâwngin chan khat chu Benjamin-ho chan a ni a;

²⁴Benjamin-ho chan nêna inriin chhak leh thlang zâwngin chan khat chu Simeon-ho chan a ni a;

²⁵Simeon-ho nêna inriin chhak leh thlang zâwngin chan khat chu Isakar-ho chan a ni a;

²⁶Isakar-ho chan nêna inriin chhak leh thlang zâwngin chan khat chu Zebulun-ho chan a ni a;

²⁷Zebulun-ho chan nêna inriin chhak leh thlang zâwngin chan khat chu Gad-ho chan a ni a;

²⁸Gad-ho chan chhim lampang ramri chuan, Tamar aṭangin Meriba-kadesh tuite thlengin Aigupta lui zawhin Tuipui lian a thleng ang.

²⁹Hei hi Israel hnamte ro chan tûra ram insem dân tûr leh an ram bung hrangte chu a ni,” tih hi Lalpa PATHIAN thuchhuak a ni.

³⁰“Hêngte hi khawpui ata chhuahnate chu a ni. Hmâr lampang tawng sângli leh zangaah chuan kawngka pathum,

³¹khawpui kawngkate chu Israel hnam hming ang zêla vuah tûr a ni a; hmâr lama kawngka pathum chu: Reubena tân kawngka pakhat, Juda tân kawngka pakhat, Levia tân kawngka pakhat a ni ang a;

³²chhak lampang tawng sângli leh zangaah chuan kawngka pathum: Josefa tân kawngka pakhat, Benjamina tân kawngka pakhat, Dana tân kawngka pakhat a ni ang a;

³³chhim lampang tawng sângli leh zangaah chuan kawngka pathum: Simeona tân kawngka pakhat, Isakara tân kawngka pakhat, Zebuluna tân kawngka pakhat a ni ang a;

³⁴thlang lampang tawng sângli leh zangaah chuan kawngka pathum: Gada tân kawngka pakhat, Asera tân kawngka pakhat, Naphtalia tân kawngka pakhat a ni ang.

³⁵A vêlin tawng sîngkhat leh sângriat a ni ang a, chumi ni aṭang chuan khawpui hming chu, ‘LALPA AWMNA HMUN’ tih a ni tûr a ni.”