Read Mizo_Old_version Ezekiela 5 Bible Online

Ezekiela 5 - Mizo_Old_version bible

Ezekiela 5

¹“Tin, nang mihring fapa, khandaih hriam tak la la, i lu leh i khabe hmul meh nân lu mêttu bakmeh chemah hmang rawh; tin, bûkna la la, sam chu ṭhen ang che.

²Hmun thuma ṭhena hmun khat chu huala a awm chhûng nite a kim hunah chuan khawpui laia meiah i rawh tûr a ni a, hmun thuma ṭhena hmun khat leh chu i la ang a, a vêlah khandaihin i sât sawm tûr a ni; tin, hmun thuma ṭhena hmun khat dang chu thli len tûrin i theh darh tûr a ni a, keiin khandaihin ka ûm zui ang.

³Tin, tlêm tê chu i la ang a, i kawrfual hmâwrah i bâwk tûr a ni.

⁴Tin, hênga mi hi i la ang a, meiah chuan i theh lût tûr a ni a, a kâng ang; chumi aṭang chuan Israel chhûngte zawng zawngah mei a lo chhuak ang,” a ti a.

⁵Lalpa PATHIAN chuan heti hian a ti a ni: “Hei hi Jerusalem khua a ni: hnamte zîngah chuan ka dah a, a vêlah ramte a awm a.

⁶Tin, hnamte aia nasa zâwka suahsualna tiin ka thurêl chungah a hel a, a vêla ramte aia nasain ka dân siam chungahte pawh a hel a ni. Ka thurêlte chu an paihthla si a, ka dân siamte ang pawhin an awm hek lo.

⁷Chuvângin, Lalpa PATHIAN chuan heti hian a ti a ni: ‘In vêla hnamte aia buai hmang zâwkin in awm a, ka dân siam anga in awm lohva, ka thurêlte in vawn lohva, hnamte tâna ka thuruatte in tih hek loh avângin,’

⁸Lalpa PATHIAN chuan heti hian a ti a ni: ‘Ngai rawh u, kei meuh pawh hian ka dodâl che u a ni, hnamte mit hmuh ngeiin in zîngah rorêlna ka hlen dâwn e;

⁹tin, in tenawmna zawng zawngte avângin thil ka la tih ngai loh, tih pawh ka tih leh ngai tawh loh tûr chu i chungah ka ti dâwn e.

¹⁰Chutichuan, paten i chhûngah an fate an ei ang a, fate pawhin an pate an ei ang; nangma mi la awm chhun zawng zawng chu ka tidarhsarh vek ang.’

¹¹Chutichuan, hei hi Lalpa PATHIAN thuchhuak a ni: ‘I bawlhhlawhna leh i tenawmnatein ka biak in i tihbawlhhlawh avângin, a nuna ka nun chhûng chu, ka suat ang che u a, ka mitin a hmaih hlek lo vang che u a, ka khawngaih hlek lo vang che u.

¹²“ ‘Hmun thuma ṭhena hmun khat chu hriin emaw, ṭâmin emaw in zîngah an thi ang; hmun thuma ṭhena hmun khat chu i vêlah khandaihin an thi ang; hmun thuma ṭhena hmun khat dang chu ka tidarhsarh vek ang a, khandaihin ka ûm zui ang.

¹³Hetiang hian ka thinurna ka hlen ang a, an chungah ka thinrimna ka hrithla ang a, ka ngaih a ṭha tawh ang; tin, kei Lalpa hian an chunga ka thinurna ka hrîkthlâk hunah chuan, dichim takin ka sawi tawh tih an hre chhuak ang.

¹⁴Chu lovah chuan, i vêla hnamte zîngah leh veivâk zawng zawngte mit hmuhah chuan, khaw ram leh hmuhsitawmah ka siam ang che.

¹⁵Chutichuan, thinur tak leh thinrim êm êma nasa taka zilha, i chunga thurêlte ka hlen hunah, i vêla hnamte mit hmuhah chuan chêksawlhna leh tihelna leh vaukhânna leh thil râpthlâk i ni ang. Kei Lalpa hian ka sawi tawh hi.

¹⁶An chungah ṭâmna thalfang ṭha lo tak, boralna tûr, nangmahni boralna tûr chu ka rawn tlâktîr ang; in chungah ṭâm ka tizual ang a, in chaw, nunna bul chu ka tichhia ang.

¹⁷Tin, in hnênah ṭâmna leh ramsa kawlhte ka rawn tîr ang a, fanau chânin an siam ang che. Hripui leh thisen chhuahna in zîngah a lêng ang; tin, in lakah khandaih ka rawn lek ang. Kei LALPA hian ka sawi tawh hi,’ ” tiin.