Read Mizo_Old_version Ezekiela 6 Bible Online

Ezekiela 6 - Mizo_Old_version bible

Ezekiela 6

¹Tin, LALPA thu chu ka hnênah a lo thleng a,

²“Mihring fapa, Israel tlâng lamte chu hawi la, an hnênah thu sawi la,

³‘Israel tlângte u, Lalpa PATHIAN thu hi ngaithla rawh u: Lalpa PATHIAN chuan tlângte leh mualte hnênah leh, ruamte leh kawrte hnênah chuan heti hian a ti a ni: “Ngai rawh u, kei, keimah ngei hian in lakah khandaih ka rawn lek ang a, in bâwlhmunte chu ka tichhe vek dâwn a ni.

⁴In maichâmte chu a ram ang a, in ni pathian lemte chu a keh sawm ang; tin, in mi thah ruangte chu in milimte bulah ka paih ang.

⁵Tin, Israel fate ruang chu an milim bulahte chuan ka dah ang a, in ruhte chu in maichâm vêlah chuan ka theh darh ang.

⁶In chênna hmun zawng zawngahte chuan khawpuite chu a chhia ang a, bâwlhmunte chu a ram ang; in maichâmte tihchhiat leh tihram a nih theih nân leh in milimte a keh sawma, a bo theih nân leh in ni pathian lemte chu râwt thlûka an awma, in hnathawhte chu a boral theih nân.

⁷Tin, mi thahte chu in zîngah an tlu ang a; tichuan, LALPA ka ni tih in hria ang.

⁸“ ‘ “Amaherawhchu, ram tina in darhsarh hunah chuan hnamte zînga khandaih pumpelhte an la awm dâwn avângin, a ṭhen chu ka la zuah cheu vang.

⁹Tin, in zîng ata chhuakte chuan sala an hruaina hnamte zîngah chuan min hre reng ang a, an uirêna thinlung ka lâk bo tawh leh an mit, an milim lama uirête chu ka tihchhiatsakziate an hria ang; tin, an tenawmnatea thil sual, anmahni hmuh ngeia an lo tih tâk thu-ahte chuan an inten tawh ang.

¹⁰Tin, LALPA chu ka ni tih an hria ang a, hêng thil ṭha lo hi an hnênah ka ti dâwn a, a thlâwn maiin ka sawi lo tih an hria ang,” ’ tiin,” a ti a.

¹¹Lalpa PATHIAN chuan heti hian a ti a: “I kut bêngin i kê per la, ‘E hei! Israel chhûngte tenawmna sual avânga maw! Khandaihin, ṭâmin, hripuiin an tlu dâwn si a.

¹²Hla taka awm chu hripuiin an thi ang a, a hnaia awm chu khandaihin an tlu ang a, a bâng, huala awmte chu ṭâmin an thi tho vang; hetiang hian ka thinrimna nasa tak chu an chungah ka hrithla dâwn a ni.

¹³Tin, tlâng sângah te, tlâng chhîp zawng zawngahte leh, thing hring apiang hnuaiah leh, sasaw buk tin hnuaia an milimte hnêna rimtui an hlanna hmunah, an maichâm vêla an milimte bula an mitthi ruangte a awm hunah chuan, kei hi LALPA ka ni tih an hria ang.

¹⁴Tin, an chungah ka kut ka lek ang a, thlalêr aṭanga Dibla lama an chênna hmun zawng zawngah ram chu ka tiramin ka tichhia ang. Tichuan, kei hi LALPA ka ni tih an hria ang,’ ” tiin.