Read Mizo_Old_version Ezekiela 7 Bible Online

Ezekiela 7 - Mizo_Old_version bible

Ezekiela 7

¹ LALPA thu chu ka hnênah a lo thleng leh a,

²“Nang mihring fapa, Lalpa PATHIAN chuan Israel ram hnênah chuan heti hian a ti a ni: ‘Tâwpna, tâwpna chu ram kil liah a lo thleng e.

³Tûn hi i tân tâwpna a ni, i chungah ka thinurna ka rawn thlen ang a, i awm dân ang zêlin ro ka rêl ang chia, i tenawmna zawng zawng chu i chungah ka rawn thlen ang.

⁴Tin, ka mitin a hmaih lo vang chia, ka khawngaih hek lo vang che; i awm dânte chu i chungah ka rawn thlen zâwk ang a, i tenawmnate chu i chungah a awm ang; tin, LALPA chu ka ni tih in hria ang,’ ” tiin.

⁵Lalpa PATHIAN chuan heti hian a ti a: “Thil ṭha lo, thil ṭha lo takzet, ngai teh, a lo thleng e.

⁶Tâwpna a lo thleng e, tâwpna a lo thleng e, i chungah a lo tho ta, ngai rawh, a lo thleng e.

⁷Aw ram luahtu, i chhiatna tûr i chungah a lo thleng e, hun chu a lo thleng a, ni chu a hnai ta; buaina ni, lâwma tlâng chunga auna ni ni lo.

⁸Tûnah hian ka thinrimna chu i chungah ka rawn leih thuai dâwn e, i chungah ka thinurna chu ka hrithla ang; i awm dân ang zêlin ro ka rêl ang che; i tenawmnate zawng zawng chu i chungah ka rawn thlen ang.

⁹Tin, ka mitin a hmaih lo vang a, ka khawngaih hek lo vang: i awm dân ang zêlin i chungah ka rawn thlen ang a, i tenawmnate pawh chu in zîngah a awm ang. Tichuan, kei LALPA hi hrem thei ka ni tih in hria ang.

¹⁰Ngai rawh, ni chu, ngai rawh, a lo thleng e, i chhiatna tûr chu a chhuak ta, tiang chu a pâr ta, chapona chu a kuhmûm ta.

¹¹Pâwngnêkna chu suahsualna tiangah a chang ta a ni; a tua mah an awm tawh lo vang a, an thâwm emaw, an hausakna emaw pawh; tu mahin an ui hek lo vang.

¹²Hun chu a lo thleng ta a, ni chu a lo hnai zêl e. Leitu chu hlim suh sela, hralhtu chu lungngai hek suh se; thinurna chu an zavaia chungah a thleng si a.

¹³Hralhtu chuan, la dam mah sela, a thil hralh chu a hmu leh tawh dâwn si lo va; inlârna chu an zavaia chung thu tûr a ni a, tu mah an kîr lo vang, tu mah an nun khawlohnaah hian an nung khawchhuak hek lo vang.

¹⁴Tawtawrâwt chu an hâm a, engkim a inpeih tawh a; mahse, indonaah chuan tu mah an kal lo; ka thinurna chu an zavaia chungah a awm si a.

¹⁵“Pâwnah khandaih, a chhûngah hripui leh ṭâm. Rama awm chu khandaihin a thi ang a, khawpuia awm chu ṭâm leh hripuiin a ei zo vang.

¹⁶Amaherawhchu, a tlân chhuakte chu, an chhuak na ang a, tlângahte chuan chul ram ṭhûro ang maiin an awm ang; an vaiin khawhar takin, mahni khawlohna ṭheuhvah.

¹⁷Kut zawng zawngte chu a zâwi ang a, khûp zawng zawngte chu tui angin a nêm ang.

¹⁸Saiip puan an fêng ang a, râpnain anmahni a tuam ang a, hmêl zawng zawngah zahna a lang ang a, an lû zawng zawng a kâwng fai vek ang.

¹⁹An tangkarua leh an rangkachakte chuan LALPA thinurna niah chuan a chhanchhuak thei lo vang a, an nun a titlai lo vang a, an pum a tipuar hek lo vang, an khawlohna tlûkna a nih tawh ṭhin avângin.

²⁰An incheina mawina chu an chapopui a, an tenawmna milemah leh an bawlhhlawhna thilah an chantîr chauh zâwk a ni; chumi avâng chuan an tân thil tenawmah ka lo siam ta a ni.

²¹Tin, râllâk atân hnam dang kutah ka pe ang a, leia mi suaksualte hnênah râllâk atân ka pe bawk ang a, annin an lo tibawlhhlawh ang.

²²Anmahni chu ka hawisan ang a, ka hmun serh chu an tibawlhhlawh ang; rûk hmangte an lût ang a, an tibawlhhlawh ang.

²³“Khaidiat chu siam rawh u, ram chu thisen chhuah hmang rorêlnain a khat a, khawpui chu pâwngnêknain a khat si a.

²⁴Chuvângin, hnam dang sual berte ka rawn hruai lût ang a, an inte an neihsak ang; an chakna, an uanpui chu ka titâwp ang a, an hmun serhte chu tihbawlhhlawhin a awm ang.

²⁵Manganna a lo thleng a, muanna an zawng a, a awm miah si lo.

²⁶Chhiatna chungah chhiat lehzualna, thuthang chungah thuthang a lo awm ang a, zâwlnei lakah inlârna an zawng ang a; mahse, dânte chu puithiam lakah a bo vang a, upate lakah thurâwn a awm hek lo vang.

²⁷Lal chu a lungngai ang a, hotu chu beidawnna silhfênin a inthuam ang a, vântlâng kutte pawh a khûr ang. An hnênah chuan an awm dân athuin ka ti ang a, an thiltih ang zêlin ro ka rêlsak ang; tin, LALPA chu ka ni tih an hre tawh ang,” a ti a.