Read Mizo_Old_version Ezekiela 8 Bible Online

Ezekiela 8 - Mizo_Old_version bible

Ezekiela 8

¹Tin, kum rukna, thla rukna, chumi thla ni nga niah chuan heti hi a ni a, ka inah ka ṭhuta, Juda upate ka hmaa an ṭhut lai chuan Lalpa PATHIAN kut chu ka chungah a lo awm a.

²Tichuan, ka han en a, ngai teh, mi, mei anga lang hi a lo awm a; a kâwng achin hnuai lam ni âwma lang chu mei a ni a; a kâwng achin chung lam chu ṭhihna zia ang, êng tak a ni.

³Tin, kut ang hian a rawn zen chhuak a, ka chal samah mi man ta a, thlarau chuan lei leh vân kârah mi chawi kâng ta daih mai a, Pathian inlârnain Jerusalem-ah mi hruai a. Jerusalem hmâr lam hung chhûngnung kawngka khârna bulah chuan mi thlen ta a; tah chuan thîkna lim ṭhuthmun a awm a, chu chuan a thîktîr ṭhîn a.

⁴Tin, ngai rawh, phaizâwla ka hmuh ang zêl khân chutah chuan Israel Pathian ropuina chu a awm.

⁵Tichuan, ani chuan ka hnênah, “Mihring fapa, hmâr lam hawiin i mit han lên teh le,” a ti a. Chutichuan, hmâr lam hawia ka mit ka han lên chuan, ngai teh, maichâm kawngka hmâr lam luhnaah chuan he thîkna lim hi a lo awm a.

⁶Tin, ani chuan ka hnênah, “Mihring fapa, an thiltih kha i hmu em? Israel chhûngten thil tenawm nasa tak, heta an tih ngei, ka in thianghlim ata hla taka ka kal bo nân an tih kha? Mahse, thil dang tenawm zaw mah i la hmu leh ang,” a ti a.

⁷Tin, hung chhûng luhnaah chuan mi hruai a; tin, ka han en a, bangah hian âwng zuk lo awm a!

⁸Tichuan, ka hnênah, “Mihring fapa, bang kha han ker teh,” a ti a. Tin, ka han ker tâkah chuan kawngkhâr a lo awm reng mai a.

⁹Tin, ani chuan ka hnênah, “Lût la, heta sual tenawm tak an tih hi en teh,” a ti a.

¹⁰Tichuan, ka lût a, ka hmu a, ngai rawh, thil nung chi tinrêng lem te, ramsa tenawm lem te, Israel chhûngte milim zawng zawngte chu bangah chuan a vêlin a lo chuang a.

¹¹Tin, an hmaah chuan Israel chhûng upate zînga mi sawmsarihte chu an ding a, an laiah chuan Saphana fapa Jaazania a ding a, mi tin chuan berhbu an keng ṭheuh va; tin, rimtui khu rim chu a chho ta mup mup a.

¹²Tichuan, ka hnênah, “Mihring fapa, Israel chhûngkuaa upate thim hnuaia thiltih chu i hmu em, mi tinin milim pindana an tih chu? ‘LALPA chuan min hmu lo va, LALPA chuan ram chu a kalsan tawh alâwm,’ an ti si a.

¹³An thiltih tenawm nasa lehzual dang pawh i la hmu leh ang,” ka hnênah chuan a ti bawk a.

¹⁴Tichuan, LALPA in hmâr lampang luhna kawngkhârah mi hruai a; tin, ngai teh, tah chuan hmeichhiate chu Tammuz ngaia ṭapin an ṭhu a.

¹⁵Tin, ani chuan ka hnênah, “Aw mihring fapa, hei hi i hmu em? Hei aia tenawm nasa hi i la hmu ang,” a ti a.

¹⁶Tin, LALPA in hung chhûngnung zâwkah chuan mi hruai lût a; ngai teh, LALPA in thianghlim kawngkhârah chuan, hulhliap leh maichâm inkârah hian, mi sawmhnih leh panga LALPA in thianghlim lam hnuchhawna, an hmaite khawchhak lam hawiin an lo awm a, khawchhak lama ni chu zuk lo bia a!

¹⁷Tichuan, ani chuan ka hnênah, “Hei hi i hmu em, aw mihring fapa? An thil tenawm tih, heta an tiha hi Juda chhûngte tân thil tênau em ni? Ram chu pâwngnêknain an tikhat a, mi tithinur leh ta nghâl si a, an hnâr chu chhâwlin an hup a.

¹⁸Chuvângin, kei pawhin thinur takin ka ti dâwn a ni: ka mitin a hmaih lo vang a, ka khawngaih hek lo vang; aw ring takin ka bengah rawn au mah sela, ka ngaithla lo vang,” a ti a.