Read Mizo_Old_version Daniela 10 Bible Online

Daniela 10 - Mizo_Old_version bible

Daniela 10

¹Persia lal Kura kum thumnaah chuan, Daniela, a hming Beltesazzara an vuah hnênah chuan thil a lo lang a. Chu thil chu a dik a ni a, chu chu indona ropui tak a ni; tichuan, thil chu a hre thiam a, inlârna hriat theihna a nei a ni.

²Chûng niahte chuan kei Daniela chu hapta thum pumhlûm lusûn angin ka awm a.

³Chaw tuihnai rêng rêng ka ei lo va, sa emaw, uain emaw pawh ka kaah a lût hek lo, hapta thum pumhlûm a kim hma chu hriak pawh ka inthih hek lo.

⁴Tin, thla khatna, ni sawmhnih leh ni li nia lui ropui tak Hiddekel kama ka awm lai chuan,

⁵ka mit ka han lên chho va; ngai teh, mi, puanzaisîna inthuam, a kâwnga Uphaz rangkachak thianghlima inhrêng hi a lo awm a!

⁶A taksa pawh berul lung ang a ni a, a hmêl chu kâwlphe lan dân ang, a mitte chu mei khâwnvâr ang, a bânte leh a kephahte chu dâr tle mi ang, a ṭawng thâwm chu mipui thâwm ang a ni.

⁷Chu inlârna chu kei Daniela chauh hian ka hmu a, ka hnêna awmte chuan inlârna chu an hmu ve lo va; mahse, nasa takin an lo khûr a, an biru bo ta a.

⁸Chutichuan, keimah chauh ka awm ta a, inlârna ropui tak chu ka hmu a, thahrui rêng ka nei ta lo va; ka hmêl mawina pawh a chuai zo va, thahrui rêng ka nei ta lo.

⁹Mahse, a ṭawng ri chu ka hria a; a ṭawng ri ka han hriat chuan bawkkhupin hmai lei siin ka muhîl ta dêr a.

¹⁰Tin, ngai teh, kut hian mi han khawih a, chu chuan mi bawhvahtîr a.

¹¹Tin, ka hnênah, “Aw Daniel, nang mi duhawm tak, i hnêna ka thusawi hi hre thiam la, ding ngîl rawh; tûnah hian i hnêna rawn tirh ka ni si a,” a ti a; tin, he thu hi ka hnêna a sawi zawh chuan khûr chungin ka ding a.

¹²Tin, ani chuan ka hnênah, “Hlau suh Daniel, i Pathian hmaa inngaitlâwm tûr leh hre thiam tûra i thinlung i pêk tirh ni aṭang khân i thute chu ngaihthlâk a ni a, i thute avâng chuan ka lo kal a ni.

¹³Mahse, Persia ram hotu chuan ni sawmhnih leh ni khat mi dodâl a; amaherawhchu, ngai teh, Mikaela, hotu lian chu min pui tûrin a lo kal a; tichuan, Persia lal hnênah chuan ka han awm ta a.

¹⁴Nakin lama i mite chunga thil lo thleng tûrte hriat thiamtîr tûr chein tûnah hian ka lo kal a ni, Inlârna chu ni tam tak hnuah a la ni dâwn si a,” a ti a.

¹⁵Tin, hêng thute ka hnêna a sawi hnu chuan kei chu ka kaikûn a, ka ṭawng thei ta lo va.

¹⁶Tin, ngai teh, mi pakhat, mihring fapate ang taka lang hian ka hmui a rawn khawih a; tichuan, ka kâ ka âng ta a, ka hmaa lo dinga hnênah chuan, “Aw ka lalpa, inlârna avâng chuan ka lungngaihnate chuan mi delh a, thahrui rêng ka nei lo va.

¹⁷He ka lalpa chhiahhlawh hian he ka lalpa hi engtin nge a biak theih ang? Kei lah chuan thahrui rêng ka nei si lo, thâwk pawh ka la thei hek lo,” ka ti a.

¹⁸Tichuan, mihring ang taka lang chuan mi han khawih leh a, mi tichak ta a.

¹⁹Tin, ka hnênah, “Aw mi duhawm tak, hlau suh; thlamuang takin awm rawh; chak la, a ni, chak rawh,” a ti a. Tin, ka hnêna thu a sawi lai chuan ka lo chak ta a, “Ka lalpan thu sawi rawh se, nangin mi tichak tawh si a,” ka ti a.

²⁰Tichuan, ani chuan, “I hnêna ka lo kal chhan hi i hria em? Tûnah chuan Persia ram hotu bei tûrin ka kîr dâwn a ni; tin, ka thawh chhuah hunah chuan, ngai teh, Grik ram hotu a lo kal ang.

²¹Mahse, thu dik ziaknaa ziak chu ka hrilh ang che: hêngah hian in hotu Mikaela chauh lo chu tu mah mi ṭan tûr an awm lo ve.