Read Mizo_Old_version Daniela 11 Bible Online

Daniela 11 - Mizo_Old_version bible

Daniela 11

¹“Tin, kei chu, Media mi Daria kum khatnaah khân amah tinghet tûr leh tichak tûrin ka ding a.

²“Tin, tûnah hian thu dik chu ka entîr ang che. Ngai teh, Persia ramah chuan lal pathum an lo la chhuak ang a, a palina chu a dang zawng ai khân a hausa zâwk hle ang; a hausakna avânga a intihchak hunah chuan Grik ram do tûrin mi zawng zawng a chawk tho vang.

³Tin, lal chak tak, thuneihna ropui taka rorêl tûr chu a lo chhuak ang a, a thu thuin a ti ang.

⁴Tin, a lo chhuah hun chuan a ram chu phel darh a ni ang a, kâwlkil liah semin a awm ang, a thlahte hnênah ni lovin, a thuneihnaa a rêl ṭhin ang zêl ni hek lovin; a ram chu he mite ni lo, mi dang tân chhuhsakin a awm zâwk dâwn a ni.

⁵“Tichuan, chhim lam lal chu a chak ang a; a hotute zînga pakhat erawh chu amah aiin a chak zâwk ang a, thuneihna a nei ang a, a thuneihna chu thuneihna ropui tak a ni ang.

⁶Tin, kumte tâwpah chuan an inzawm ang a; chhim lam lal fanu chu hmâr lam lal hnênah inremna siam tûrin a lo kal ang; mahse, a chakna chu a nei rei lo vang a, ani pawh kha a ding hek lo vang a, a chakna pawh; lal fanu chu pêk bovin a awm zâwk ang a, a rawn hruaitute leh a hringtu, chutih laia amah tichaktu nên.

⁷Mahse, a zung aṭanga chawr no ata chu mi pakhat ama hmunah a ding ang a, chu chu sipai rual nên a lo kal ang a, hmâr lam lal kulhah chuan a lût ang a, anmahni a bei ang a, a hneh ang.

⁸Tin, an pathiante, an lim chhûnte nên, an tangkarua leh rangkachak bungbêl ṭha tak takte nên, Aigupta ramah a kalpui vek ang a; tin, kum eng emaw ti chu hmâr lam lal lakah a châwl rih ang.

⁹Tin, chhim lam lalramah chuan hmâr lam lal chu a lo lût ang a; mahse, ama ramah a kîr leh ang.

¹⁰“Tin, a fapaten an do vang a, sipai rual nasa tak an ko khâwm ang a, an lo kal ang a, an chîm hneh ang a, an pal tlang ang; tin, an lo kîr ang a, an do vang a, a kulh ngei pawh.

¹¹Tin, chhim lam lal chu a thinur êm êm ang a, a lo chhuakin amah a bei ang - hmâr lam lal ngei chu; tin, mipui tam tak nên a chhuak ang a, mi tam tak a kutah pêk a ni ang.

¹²Tin, mi tam tak chu hruai bo an ni ang a, a thinlung a sâng ang a, sîng laite chu a titlu ang a; mahse, a ding hlen lo vang.

¹³Tin, hmâr lam lal chu a lo thawk leh ang a, mipui a hmaa mi aia tam zâwk nên a chhuak ang a; tin, hun tâwp kum tâwp ngeiah chuan sipai rual nasa tak leh thuam nasa tak nên a rawn pan ang.

¹⁴“Tin, chûng hunahte chuan mi tam tak, chhim lam lal do tûrin an ding ang. I chite zînga pâwngnêk mite pawh inlârna chu tithleng tûrin an inlek ang a; mahse, an tlu ang.

¹⁵Chutichuan, hmâr lam lal chu a lo kal ang a, mual pâwng a siam ang a, khawpui kulh nghet nei chu a la ang; tin, chhim lam chakna chuan a dâl zo lo vang, a mi thlante pawhin; dâl zo tûr chakna rêng a awm lo vang.

¹⁶Tichuan, a rawn dotu chuan a duh ang angin a ti ang a, a hmaah tu mah an ding lo vang. Tin, ani chu ram ropuiah chuan a ding ang a, a kutah chhiatna a awm ang.

¹⁷Tin, a ram pum pui chakna nêna lo kal a tum ang a, inremna a siam ang a, chutiangin a ti ang; tin, a tihkhawloh tûrin a hnênah hmeichhe fanu a pe ang a; mahse, a hlawhtling lo vang a, a hlâwkpui hek lo vang.

¹⁸Hemi hnuah hi chuan thliarkâr lam a hawi ang a, tam tak a la ang. Mahse, hotu pakhat chuan sawichhiatna a chhâk chhuah chu a tibâng ang a; a ni, a sawichhiatna chu ama chung vêkah a lêttîr ang.

¹⁹Tichuan, ama ram ngei kulhte lam chu a hawi leh ang a; mahse, a petekin a tlu ang a, hmuh zawh a ni tawh lo vang.

²⁰Tichuan, ama hmunah chuan mi pakhat, ram ropuinaa chhiahkhawntu kal tlangtîrtu tûr chu a lo ding chhuak ang; mahse, ni rei lo teah thinurna vâng ni lovin, indona vâng pawh ni hek lovin, tihboralin a awm ang.

²¹“Tin, a hmunah chuan mi hmuhsitawm, ram chawimawina a pêk loh chu a lo ding chhuak ang; mahse, ram muan laiin a lo kal ang a, ṭawngkam thiamin ram chu a chang ang.

²²Tin, a hmaa mi chu tui lian chaknaa hrût bovin an awm ang a, keh sawmin an awm ang; a ni, thuthlung hotu chenin.

²³Tin, a hnêna thuthlung siam hnuah chuan hlemhle takin a che ang; a lo ding chhuak ang a, mipui tlêm tête nân pawh a lo chak dâwn a ni.

²⁴Muan hun laiin ram bial ṭha ber berah a lo thawk ang a, a pate leh a pa pate tih ngai loh chu a ti ang: mite zîngah chuan râllâk leh râllâk thilte, sumte a vawrh darh ang; a ni, kulh nghet chungahte chuan a phiarrûkte chu a phiar rih ang.

²⁵Tin, a thiltihtheihna leh a huaina chu, sipai rual nasa tak nên chhim lam lal chungah a chawk tho vang a; tin, chhim lam lal chuan sipai rual nasa tak leh chak tak nên a lo do vang a; mahse, a ding zo lo vang, a chungah chuan phiarrûk eng eng emaw an lo phiar dâwn si a.

²⁶A ni, a chaw tui hmêl eitute ngei chuan amah an tiboral ang a, a sipai rualte chu hnâwl bovin an awm ang a, tam tak chu thahin an awm ang.

²⁷Tin, hêng lalte hi zawng an thinlunga pawi khawih hmang an ni ve ve ang a, dawhkân hmun khatah dâwt an sawi ang; mahse, a hlawhtling lo vang, a tâwp chu hun ruatah chuan a ni dâwn si a.

²⁸Tichuan, sum tam tak nên ama ramah a kîr leh ang a, a thinlung chu thuthlung thianghlim dovin a awm ang; chutiangin a ti ang a, ama ram ngeiah a kîr leh ang.

²⁹“Hun ruatah chuan a lo lêt leh ang a, chhim lamah a kal ang a; mahse, a hnuhnûng zâwkah hi chuan a hmasa ang chu a ni lo vang.

³⁰Kittim lawngte chuan amah an rawn do dâwn a ni; chutichuan, a lungni lo vang a, a kîr ang a, thuthlung thianghlim chungah chuan a thinur ang a, chutiangin a ti ang; a ni, a kîr leh ang a, thuthlung thianghlim hawisantute chu a lâwm ang.

³¹Tin, sipaite chuan an beihsak ang a, hmun thianghlimte an tibawlhhlawh ang a, kulh ngei pawh chu; tin, hâlral thilhlan awm fo chu a tibo vang a, ṭiauna tenawmna chu an dintîr zâwk ang.

³²Tin, thuthlung chunga suaksual taka titute chu ṭawngkam thiamin a tikhawlo vang; mahse, mi an Pathian hretute kha chu an nghet ang a, thil nasa tak an ti ang.

³³Tin, mi zînga a fingate chuan mi tam tak an zirtîr ang a; mahse, khandaih te, meialh te, sal tânna te leh rawkrâl tein ni tam tak an tlu ang.

³⁴Tin, an tlûk pawhin puihna tlêm têa dawmin an awm ang a; mahse, mi tam takin fak derin anmahni an fin ang.

³⁵Tin, a fingate zînga ṭhenkhatte chuan, anmahni tifai tûr leh tithianghlim tûr leh tivâr tûrin an tlûk phah ang, tâwpna hun thleng pawhin; hun ruatah a la nih fo avângin.

³⁶“Tin, lal chuan a duh ang angin a ti ang: amah a inchawisâng ang a, pathian tinrêng chungah a intilian ang a, pathiante Pathian kalhin thil mak takte a sawi ang a, thinurna hrîkthlâk zawh a nih hma chu a hlawhtling ang; ruat sa chu tih ngei tûr a ni si a.

³⁷A thlahtute pathiante chu a pawisa lo vang a, hmeichhiate ngainat pathiante leh pathian dang rêng rêng pawh a pawisa hek lo vang; mi zawng zawng chungah a intilian dâwn si a.

³⁸Mahse, chumi aiah chuan kulhte pathian chu a chawimawi ang a, pathian, a pate pawhin an hriat ngai loh kha rangkachak nên, tangkarua nên, lunghlute leh thil duhawmte nên a chawimawi ang.

³⁹Tin, pathian dang tak ṭanpuinain kulh nghet tak takte chu a bei ang a, tu pawh a pawm apiang chu a tiropui ang; tam tak chungah ro a rêltîr ang a, ram chu man neiin a sem ang.

⁴⁰Tin, tâwpna hunah chuan chhim lam lalin amah a rawn nawr ang a; tin, hmâr lam lal chuan tawlailîr nên, sakawr chung chuang mi leh lawng tam tak nên, ṭhâwngaleivir ang maiin amah a lo bei ang; ramte chu a lût ang a, a chîm hneh ang a, a pal tlang ang.

⁴¹Ram ropui pawh chu a lût ang a, tam tak chu tihtlûk a ni ang; mahse, a kut ata hêng hi chu chhanchhuah an ni ang - Edom leh Moab leh Amon mi ṭha ṭhate.

⁴²Ramte chungah pawh a kut a lek ang a, Aigupta ram pawhin a pumpelh lo vang.

⁴³Tichuan, rangkachak leh tangkaraw dah khâwmte chungah leh Aigupta ram thil hlute zawng zawng chungah thu a nei ang; tin, Libua mite leh Ethiopia mite chu a kaihzavêng an ni ang.

⁴⁴Mahse, chhak lam leh hmâr lam aṭanga thuthangin amah a tibuai ang; tichuan, mi tam tak tiboral tûr leh timang tûrin thinur takin a chhuak ang.

⁴⁵Tin, tuipui leh tlâng thianghlim ropui tak inkârah chuan a lal puan in chu a hûng ang a; mahse, a tâwpna a thleng a ni ang a, tu mahin an pui lo vang.