Read Mizo_Old_version Daniela 12 Bible Online

Daniela 12 - Mizo_Old_version bible

Daniela 12

¹“Tin, chumi hunah chuan i mipui fate ṭan ṭhîntu, hotu ropui tak Mikaela chu a ding ang a; tin, buaina hun, hnam awm tirh ata chumi hun thleng pawha la awm ngai lo chu a lo awm ang; tin, chumi hunah chuan i mite chu chhanchhuahin an awm ang, mi tin lehkhabua hming chuang apiangte chu.

²Tin, an zînga tam tak lei vaivuta muhîl tawhte chu an lo ṭhangharh ang a, ṭhenkhat chu chatuan nunnaah, ṭhenkhat zahna leh chatuan hmuhsitawmnaah.

³Tin, a fingate chu vân êng angin an êng ang a, mi tam tak felnaa hawi kîrtîrtute chu arsi angin kumkhaw tlaitluanin an êng ang.

⁴Mahse, nang aw Daniel, thu chu thup la, lehkhabu chu châr tlat rawh, tâwpna hun thlengin; mi tam tak an tlân vêl ang a, hriatnate a pung dâwn a ni,” a ti a.

⁵Tin, kei Daniela chuan ka han en a, ngai teh, mi dang pahnih an lo ding a, pakhat chu lui kam ko he lamah, a dang chu lui kam ko lehlamah.

⁶Tin, tuin emaw, mi, puanzaisîna inthuam, luipui tui chunga awm hnênah chuan, “Hêng thil mak tâwpna hi eng chen nge ni ang?” a ti a.

⁷Tin, mi puanzaisîna inthuam, luipui tui chunga awm chuan a kut ding lam leh a kut vei lam vân lama phar chhuakin, “Hun khat leh hunte leh hun chanve chhûng a ni ang; mi thianghlimte thiltihtheihna chu an tihkeh sawm zawh hunah hêng thil zawng zawng hi a kin ang,” tia nung kumkhuaa chhâlin chhia a chham ka hria a.

⁸Hriat chu ka hria a, a ngaihna erawh chu ka hre lo; tichuan, kei chuan, “Aw ka lalpa, hêng thil tâwpna hi eng nge ni ang?” ka ti a.

⁹Tin, ani chuan, “Daniel, kal mai rawh, thu chu thup leh châr ṭhat a ni ta e, tâwpna hun thlengin.

¹⁰Mi tam tak chu an intithianghlimin an intivâr ang a, an lo ṭha ang; mahse, mi suaksualte chuan sual takin an ti ang a, mi suaksual tu mahin a ngaihna an hre lo vang a; mi fingte erawh chuan a ngaihna an hria ang.

¹¹Tin, hâlral thilhlan awm fote lâk bo a nihna, ṭiauna tenawm dintîr a nih hun aṭang chuan, ni sângkhat leh zahnih leh sawmkua a ni ang.

¹²Nghâk hrâm hrâma, ni sângkhat leh zathum leh sawmthum leh panga thleng zo chu a eng a thâwl e.

¹³Mahse, nang chu tâwpna thleng chuan kal rawh; nite tâwpnaah chuan i châwl ang a, i chan tâwkah chuan i awm ang,” a ti a.