Read Mizo_Old_version Daniela 2 Bible Online

Daniela 2 - Mizo_Old_version bible

Daniela 2

¹Tin, Nebukadnezzara rorêl kum hnihnaah chuan Nebukadnezzara chuan mumang a nei a; a rilru a lo buai zo ta a, a muhîl thei ta lo va.

²Tichuan, lal chuan a mumang chu amah hrilh tûrin dawivaihthiamte, aikaihthiamte, dawithiamte, Kaldai mite koh thu a pe a. Tichuan, an lo kal a, lal hmaah chuan an ding a.

³Tin, lal chuan an hnênah, “Mumang ka nei a, chu mumang chu hre tûrin ka rilru a buai zo ta a,” a ti a.

⁴Kaldai mite chuan Suria ṭawngin lal hnênah chuan, “Aw lalber, kumkhuain dam ang che! I mumang chu i chhiahhlawhte hi hrilh la; tin, a hrilhfiahna chu kan entîr dâwn che nia,” an ti a.

⁵Lal chuan Kaldai mite chu a chhâng a, an hnênah, “Ka hnên aṭangin thu chu a chhuak tawh alâwm: mumang leh a hrilhfiahna chu ka hnênah in tihlan loh nâ chuan sah sawm in ni ang a, in inte pawh hnâwmhnawkah siam a ni mai ang.

⁶Mumang leh a hrilhfiahna in tihlan erawh chuan ka hnên ata thilpêk leh lâwmman leh chawimawina ropui tak in hmu ang; chuvângin, mumang leh a hrilhfiahna chu mi entîr rawh u,” a ti a.

⁷Anni chuan an chhâng leh a, “Lal chuan chu mumang chu a chhiahhlawhte hi min hrilh sela; tin, a hrilhfiahna chu kan entîr ang e,” an ti a.

⁸Lal chuan a chhâng a, “Hun in tisei lui mai mai dâwn a ni tih chiang takin ka hria;

⁹ka hnên aṭangin thu chu a chhuak tawh tih in hria e: ka hnêna mumang chu in tihlan loh nâ chuan in tân dân khat chauh a awm! Dâwt sawi kuala, ka hmaa sawi tûr dâwt thu leh thu tlâktlailo in buatsaih a nih hi. Chutichuan, mumang chu mi hrilh ula, a hrilhfiahna pawh chu mi entîr thei tih ka hria ang,” a ti a.

¹⁰Kaldai mite chuan lal chu an chhâng a, “Lal thil phût hi entîr thei tûr mi pakhat mah lei chungah hian an awm lo ve; lal te, hotu te, rorêltu te tu mah rêngin hetiang thil hi dawivaihthiam emaw, aikaihthiam emaw, Kaldai mi emaw an la zâwt ngai si lo.

¹¹Tin, lal thil phût hi thil khirh tak a ni a, tîsaa khawsa lo pathiante tih chauh lo chu entîr thei tûr tu mah an awm lo ve,” an ti a.

¹²Chu vâng chuan lal chu a thinrim êm êm a, a kawlh ta hle mai a, Babulon mi fing zawng zawng chu tihboral vek tûr thu a pe ta a.

¹³Chutichuan, thupêk chu a chhuak ta a, mi finghote chu tihhlum tûr an ni ta a; tin, Daniela leh a ṭhiante pawh tihhlum tûrin an zawng a.

¹⁴Tin, Daniela chuan Babulon mi fingte tihlum tûra kal chhuak Arioka, lal vêngtu pâwl hotu chu remhre tak leh fing takin a chhâng a;

¹⁵lal vêngtu pâwl hotu Arioka hnênah chuan, “Engtizia nge lal thupêk chu chuti êma a hmanhmawh le?” tiin a chhâng a. Tin, Arioka chuan Daniela chu a hrilh ta a.

¹⁶Tin, Daniela chu a lût a, lal chu a hrilhfiahna a entîr theih nân hun pe tûrin a ngên a.

¹⁷Tichuan, Daniela chu a inah a hâwng a, chu thil chu a ṭhian Hanania te, Misaela te, Azaria te a hrilh a;

¹⁸Babulon mi fing dangte zînga Daniela leh a ṭhiante chu an boral ve loh nâna, he thu inthup chungchângah hian vân Pathian khawngaihna an dîlna tûrin.

¹⁹Tin, chu thu inthup chu zân inlârnaah Daniela hnênah a lang ta a. Tin, Daniela chuan vân Pathian chu a fak a.

²⁰Daniela chuan, “Pathian hming chu kumkhaw tlaitluanin fakin awm rawh se; Finna leh hunbite a tidanglam a.

²¹Hunte leh hunbite a tidanglam a; Lalte a sawn bo va, lalte a tungding a. Mi fing hnênah finna a pe a, Hre thiamtu hnênah hriatna a pe a.

²²Thil thûk leh thil inthupte a tilang a; Thima awm pawh a hria a, a hnênah chuan êng a chêng a.

²³Aw ka thlahtute Pathian, finna leh theihna mi petu, I lak ata kan thil dîl tûna mi hriattîrtu chu Lâwm thu ka hrilhin ka fak a che; Lal thil phût chu min hriattîr tawh si a,” tiin a sawi a.

²⁴Chutichuan, Daniela chu Babulon mi fingte tiboral tûra lalin a ruat Arioka hnênah chuan a va kal a, a hnênah chuan, “Babulon mi fingte chu tiboral suh; lal hmaah chuan mi hruai la, lal hnênah chuan a hrilhfiahna ka entîr ang e,” a va ti a.

²⁵Tin, Arioka chuan Daniela chu hmanhmawh takin lal hmaah a hruai ta a, a hnênah, “Juda sal fate zîngah lal hnêna a hrilhfiahna hriattîrtu tûr mi pakhat ka hmu ta,” a ti a.

²⁶Lal chuan Daniela, a hming Beltesazzara hnênah chuan, “Mumang ka neih leh a hrilhfiahna chu ka hnênah mi hriattîr thei em ni?” a lo ti a.

²⁷Daniela chuan lal chu a chhâng a, a hnênah, “Thil inthup, lalin hriat a duh chu, mi fingte, aikaihthiamte, dawivaihthiamte, aisânthiamte chuan lal hnênah an entîr thei lo va;

²⁸mahse, thil inthupte puangtu Pathian chu vânah a awm a, Lal Nebukadnezzara hi tûn hnua thil lo la awm tûrte chu a hriattîr a nih hi. I mumang leh i khumlaizâwla i lua inlârnate chu hêng hi a ni:

²⁹aw lalber, nang chuan i khumlaizâwlah chuan tûn hnua thil lo awm tûrte i ngaihtuah a, thil inthupte puang ṭhîntu chuan tûn hnua thil lo la awm tûrte chu a hriattîr che a ni.

³⁰Tin, kei hian mi dangte aia finna ka neih bîk avânga he thil inthup hi ka hnêna puan a ni lo va, lal hnênah a hrilhfiahna hriattîr tûrin a ni zâwk e, i thinlunga i ngaihtuahte chu i hriat theih nân.

³¹“Aw lalber, i han dâk chhuak a, ngai teh, milim ropui tak a lo awm a. Chu milim hrawl pui, tle êm êm mai chu i hmaah a ding a; a lan dân pawh ṭihbaiawm tak a ni.

³²Chu milim chu a lu rangkachak thianghlim tak a ni a, a âwm leh a bânte chu tangkarua, a pum leh a malpuite dâr,

³³a kête thîr, a kephah chu a ṭhen thîr, a ṭhen bellei a ni a.

³⁴Nang chuan i thlîr reng laiin lung, kut lova laih chhuah chuan milim chu a kephah thir leh belleiah chuan a rawn delh a, a tikeh sawm ta vek a.

³⁵Tichuan, thîr te, bellei te, dâr te, tangkarua te, rangkachak te chu a rualin a keh sawm ta vek a, nipui lai hruih zâwla buhsî ang mai an lo ni ta a; tin, thliin anmahni a lên bo va, an awmna hmun rêng hriat a ni ta lo va. Tin, milim delhtu lung chu tlâng lian takah a lo chang a, lei pum hi a khat ta a.

³⁶“Hei hi mumang chu a ni a; tin, a hrilhfiahna chu lal hmaah hian kan han sawi leh ang e.

³⁷Aw lalber, nang hi lalte lal, vân Pathianin ram te, thiltihtheihna te, chakna te, ropuina te a pêka chu i ni a;

³⁸chuvângin, khawiah pawh mihring fate awmna apiangah ramsa te, chunglêng sava te i kutah a pe a, an zaa chungah rorêl tûrin a siam chia; rangkachak lu chu nang hi i ni.

³⁹Tin, i hnuah hian ram dang, nang aia tênau zâwk a lo ding ang; tin, dâr, ram thumna, lei chung zawng zawnga rorêl tûr chu a awm leh ang.

⁴⁰Tin, ram lina chu thîr anga khauh a ni ang; thîr chuan a tikeh sawmin thil zawng zawng a hneh ṭhîn ang hian; tin, thîrin thil zawng zawng a tikeh ang bawkin ani chuan a tikeh sawmin a râwt dip ang.

⁴¹Tin, a kephah leh a zungṭangte chu, a ṭhen bêlvawtu hlum, a ṭhen thîr nia i hmuh ang ngei khân ram inṭhen a ni ang a; mahse, amahah chuan thîr khauhna chu a awm tho vang, thîr leh hlum nêm inpawlh i hmuh ang ngei khân.

⁴²Tin, a kezungṭang a ṭhen thîr, a ṭhen hlum a ni ang bawk khân ram chu a ṭhenah chuan a chak ang a, a ṭhenah chuan a chhe awl ang.

⁴³Tin, thîr leh hlum nêm inpawlh i hmuh ang ngei khân anni chu mihring chiin an inpawlh ang a; mahse, thîr leh hlum a inpawlh tak tak thei lo ang bawkin an inzawm reng lo vang.

⁴⁴Tin, chûng lalte niah chuan vân Pathianin ram a rawn din ang a, chu chu a chhe ngai tawh lo vang a, a lalna pawh mi dangte tân hnutchhiah a ni hek lo vang; hêng ram zawng zawngte hi a tikeh sawmin a tiral zâwk ang a, kumkhuain a ding reng ang.

⁴⁵Tlâng ata lung, kut lova laih chhuahin thîr te, dâr te, hlum te, tangkarua te, rangkachak te a tikeh sawm i hmuh ang ngei khân, Pathian ropui tak chuan lal hnênah hian tûn hnua thil lo awm tûr chu a puang a ni e. Mumang chu a tak ngei a, a hrilhfiahna pawh a dik ngei a ni,” a ti a.

⁴⁶Tichuan, Lal Nebukadnezzara chu a bawkkhup a, Daniela chu chibai a bûk a, a hnênah chuan thilhlan leh rimtuite rawn hlân tûrin thu a pe a.

⁴⁷Lal chuan Daniela chu a chhâng a, a hnênah, “He thil inthup i puan theihziaah hian Pathian chu pathiante Pathian, lalte Lal, thil inthup puangtu a lo ni ngei mai e,” a ti a.

⁴⁸Tichuan, lal chuan Daniela chu a siam lian a, thilpêk ropui tam tak a pe a, Babulon ram bial pum puia rorêl tûr leh Babulon mi fingte zawng zawng chunga hotu ber ni tûrin a siam a.

⁴⁹Tin, Daniela dîl angin lal chuan Sadraka te, Mesaka te, Abednegoa te chu Babulon bial chungchânga hotuah a dah a; Daniela erawh chu lalber rorêlnaah chuan a awm ta a.