Read Mizo_Old_version Daniela 3 Bible Online

Daniela 3 - Mizo_Old_version bible

Daniela 3

¹Lal Nebukadnezzara chuan rangkachak milim, a sân lam tawng sawmruk, a hlai lam tawng ruk a siam a, Babulon biala Dura phaizâwlah a dintîr a.

²Tin, Lal Nebukadnezzara chuan thuneitute, aiawhtute, awptute, rorêltute, sum enkawltute, remruattute, dânhremite leh ram bial rorêltu zawng zawng chu Lal Nebukadnezzara milim din hlannaa lo tel tûr chuan a chah khâwm a.

³Tin, thuneitute, aiawhtute, awptute, rorêltute, sum enkawltute, remruattute, dânhremite leh ram bial rorêltu zawng zawng chu Lal Nebukadnezzara milim din serhnaah chuan an rawn inkhâwm a, Lal Nebukadnezzara milim din hmaah chuan an ding hlawm a.

⁴Tin, ring takin tlângau a lo au va, “Aw, mi tinte u, hnam tinte u, ṭawng tinte u,

⁵tawtawrâwt te, phênglâwng te, ṭingṭang te, sakbut te, ṭingṭangpui te, baja te leh ri thei chi zawng zawng in hriat hunah, Lal Nebukadnezzara rangkachak milim din chu bawkkhupa chibai bûk tûrin thu pêk in ni e;

⁶tin, tu pawh bawkkhupa chibai bûk lo chu chumi lai la la chuan rawh tuina meipuia paih luh tûr an ni ang,” tiin.

⁷Chu vâng chuan chumi laia mipui zawng zawngin tawtawrâwt te, phênglâwng te, ṭingṭang te, sakbut te, ṭingṭangpui te leh ri thei chi zawng zawng an han hriat chuan mi tinte, hnam tinte, ṭawng tinte zawng zawng chuan Lal Nebukadnezzara rangkachak milim din chu bawkkhupin chibai an bûk ta a.

⁸Tin, chumi lai chuan Kaldai mi ṭhenkhatte an lo hnai a, Juda mite chu an rawn hêk a.

⁹Lal Nebukadnezzara hnênah chuan, “Aw lalber, kumkhuain dam ang che.

¹⁰Nangin, aw lalber, mi tu pawh tawtawrâwt te, phênglâwng te, ṭingṭang te, sakbut te, ṭingṭangpui te, baja te leh ri thei chi zawng zawng hria apiang chuan bawkkhupin rangkachak milim chibai an bûk tûr a ni;

¹¹tin, tu pawh bawkkhupa chibai bûk lo apiang rawh tuina meipuia paih luh an ni ang, tiin thupêk i siam a.

¹²Juda mi ṭhenkhat Babulon ram bial chungchânga hotua i siam Sadraka te, Mesaka te, Abednegoa te kha an awm a, hêng mite hian, aw lalber, an pawisa lo che a ni. I pathiante rawng an bâwl lo va, rangkachak milim i din chu chibai an bûk hek lo,” tiin an sawi a.

¹³Tichuan, Nebukadnezzara chuan thinur leh thintâwt takin Sadraka te, Mesaka te, Abednegoa te chu rawn hruai tûr thu a pe a. Tin, hêng mite hi lal hmaah chuan an rawn hruai a.

¹⁴Nebukadnezzara chuan a chhâl a, an hnênah, “Aw Sadrak, Mesak, Abednego, ka pathian rawng bâwl lova, ka rangkachak milim din chibai bûk loh hi in tum rêng em ni?

¹⁵Tûnah hian tawtawrâwt te, phênglâwng te, ṭingṭang te, sakbut te, ṭingṭangpui te, baja te leh ri thei chi zawng zawng in hriat hunah bawkkhupa ka milim siam chibai bûk tûr in nih tawh chuan a ṭha e! Chibai in bûk loh erawh chuan, chumi lai la la chuan rawh tuina meipuia paih luh in ni ang. Ka kut ata chhanchhuak tûr che u pathian chu tu a ni nge?” a ti a.

¹⁶Sadraka te, Mesaka te, Abednegoa te chuan lal chu an chhâng a, a hnênah, “Aw Nebukadnezzar, he thu-ah hian kan chhân che pawh a ngai lo ve.

¹⁷Kan Pathian, a rawng kan bâwl ṭhina chuan rawh tuina meipui ata min chhanchhuak thei si a, i kut ata pawh, aw lalber, min chhanchhuak mai ang.

¹⁸Chuti lo pawh ni sela, aw lalber, i pathiante rawng chu kan bâwl dâwn lo va, i rangkachak milim din pawh chu chibai kan bûk hek lo vang tih hi hria ang che,” an ti a.

¹⁹Tichuan, Nebukadnezzara chu a thin a tâwt ta êm êm a, Sadraka te Mesaka te, Abednegoa te lakah chuan a hmêl lan dân a dang zo ta a; rawh tuina mei chu a sat dân pângngai lêt sariha tisa tûrin thu a pe a.

²⁰Tin, a sipai rual zînga mi chak ṭhenkhatte chu Sadraka te, Mesaka te, Abednegoa te phuar tûr leh rawh tuina meipuia theh lût tûrin thu a pe a.

²¹Tichuan, hêng mite hi an kawrfualte, an kawrhnuaite, an diarte leh an silhfên dangte chawpa phuarin rawh tuina meipuia theh luh an ni ta a.

²²Tichuan, lal thupêk chu a hmanhmawh êm avâng leh rawh tuina mei chu a sat khawp avângin Sadraka te, Mesaka te, Abednegoa te chawi kângtute chu meialh chuan a tihlum ta hlawm a.

²³Tin, hêng mi pathum - Sadraka te, Mesaka te, Abednegoa te hi phuar chungin rawh tuina meipui laiah chuan an tlu reng a.

²⁴Tichuan, Lal Nebukadnezzara chuan mak a ti a, hmanhmawh takin a tho va, a remruatpuitute hnênah chuan, “Mi pathumte kha phuarin meiah kan theh lût a ni lâwm ni kha?” tiin a sawi a. Lal chu an chhâng a, a hnênah, “Aw lalber, theh lût e,” an ti a.

²⁵Ani chuan, “En teh u, mi pali, phelha mei laia vei veia, na hauh lovin ka hmu a; a palina lan dân phei chu pathiante fapa ang a ni,” a ti a.

²⁶Tichuan, Nebukadnezzara chu rawh tuina meipui kawngkaah chuan a va kal hnai a, “Sadrak, Mesak, Abednego, nangni Chungnungbera Pathian bawihte u, lo chhuak ula, hetah lo kal rawh u,” tiin a han bia a. Tichuan, Sadraka te, Mesaka te, Abednegoa te chu mei zîng ata chu an lo chhuak ta a.

²⁷Tin, thuneitute, aiawhtute, awptute leh lal remruatpuitute rawn inkhâwm chuan, hêng mite taksa chungah hian meiin thiltihtheihna a nei lo va, an sam pawh a kâng kir lo va, an kawrfualte a danglam lo va, mei rim rêng rêng pawh an nam hek lo tih an hmu a.

²⁸Lal Nebukadnezzara chuan thu a sawi a, “Sadraka te, Mesaka te, Abednegoa te Pathian chu fakin awm rawh se; ani chuan a vântirhkoh a rawn tîr a, a chhiahhlawh, amah ringtute chu a chhanchhuak a, chûng mite chuan an Pathian chauh lo chu pathian dang rêng rawng an bâwl lohva, chibai an bûk loh nân, lal thupêk tidanglamin an taksa an hlân ngam a.

²⁹Chuvângin, mi tin, hnam tin, ṭawng tin, Sadraka te, Mesaka te, Abednegoa te Pathian chunga thu ṭha lo sawi apiang chu sah sawm an ni ang a, an inte chu hnâwmhnawkah siam a ni mai ang tih thupêk ka siam e; hetiang taka chhanchhuak thei pathian dang rêng rêng an awm si lo,” a ti a.

³⁰Tichuan, lal chuan Sadraka te, Mesaka te, Abednegoa te chu Babulon bialah chuan a tilian ta a.