Read Mizo_Old_version Daniela 4 Bible Online

Daniela 4 - Mizo_Old_version bible

Daniela 4

¹Lal Nebukadnezzara chuan mi tinte, hnam tinte, ṭawng tinte zawng zawng, lei pum puia chêngte hnênah chuan: in chungah remna tihpunin awm rawh se.

²Chungnung ber Pathianin ka hnêna thil entîrnate, thil mak a tih tâkte hi tihlan ṭha ka ti e.

³A thil entîrnate chu a ropuiin, a thiltih makte chu a va nasa êm! A ram chu ram hlun a ni a, a rorêlna chu chhuan awm chhûng zawng zawng a ni ang.

⁴Kei, Nebukadnezzara hi ka inah nuamsa tak leh ka in ropuiah neinung takin ka awm a.

⁵Mumang ka hlauh zâwng tak ka nei a; ka khumlaizâwla ka suangtuahna leh ka lua inlârna chuan mi tibuai a.

⁶Chu vâng chuan Babulon mi fing zawng zawngte chu ka mumang hrihfiahna mi hriattîr theih nân, ka hmaa rawn hruai tûrin thu ka pe a.

⁷Tichuan, dawivaihthiamte, aikaihthiamte, Kaldai mite, aisânthiamte chu an lo kal a; tin, ka mumang chu ka hrilh a; mahse, a hrilhfiahna rêng chu min hriattîr lo va.

⁸Mahse, a tâwp berah chuan Daniela, ka pathian hming ang pu, a hming Beltesazzara, amaha pathian thianghlimte thlarau awm chu ka hmaah a lo kal a; tin, ka mumang chu ka hrilh a,

⁹“Aw Beltesazzar, dawivaihthiamte hotu, nangmahah chuan pathian thianghlimte thlarau a awm tih leh, thurûk rêng rêngin a tibuai lo che tih ka hriat avângin, ka mumanga ka hmuh inlârna leh a hrilhfiahna chu mi hrilh teh khai.

¹⁰“Ka khumlaizâwla ka lua inlârnate chu hetiang hi a ni: ka han dâk chhuak a, ngai teh, lei lai takah thing a lo awm a, a sânzia chu a nasa khawp mai a.

¹¹Thing chu a ṭhang a, a ṭanṭha a, a sân lam chuan vân a tawng a, kâwlkil aṭangin a lang thei vek a.

¹²A hnahte chu a mawiin a rahte a tam a, amahah chuan nung zawng zawng tân ei tûr a awm a; ramsate chuan a hlim an bêl a, chunglêng savate chu a zârahte an chêng a, tîsa pu zawng zawng chu ama châwm an ni.

¹³“Ka khumlaizâwla ka lua inlârnaah chuan ka han en a, ngai teh, vân aṭangin vêngtu, mi thianghlim chu a lo chhuk a,

¹⁴ring takin, ‘Thing chu kit la, a zârte chu hlawi la, a hnahte thing thla la, a rahte tidarh rawh; a hnuai ata ramsate chu kal bo sela, a zâr ata chunglêng savate pawh thlâwk bo rawh se.

¹⁵Amaherawhchu, ram hlobet ṭo zîngah, leia a bulbâwr chu, thîr leh dâra ṭâwnin zuah la; tin, vân daiin huh sela, a chan tûr chu ramsate nêna hlobet zînga awm ni rawh se.

¹⁶A rilru chu mihring rilru aṭanga tihdanglam ni se, a hnênah ramsa rilru pêk ni rawh se; a chungah hun sarih ral rawh se.

¹⁷He thutlûkna hi vêngtute thupêka tih a ni a, thil phût hi mi thianghlimte thua tih a ni, Chungnungbera chuan mihringte lalna ram chungah thu a nei a, a duhsak apiang a pe a, mi hnuaihnung berte pawh a luahtîr ṭhîn a ni tih mi nungin an hriat nân a ni,’ tiin a au va.

¹⁸He mumang hi kei, Lal Nebukadnezzaran ka nei a; tin, nang aw Beltesazzar, a hrilhfiahna chu puang rawh. Ka rama mi fing zawng zawng chuan a hrilhfiahna chu mi hriattîr thei si lo va; nang erawh chuan i thei e, nangmahah chuan pathian thianghlimte thlarau chu a awm si a,” tiin.

¹⁹Tichuan, Daniela, a hming Beltesazzara chu a han chîai hle rih a, a ngaihtuahte chuan a tibuai a. Lal chuan a hnênah, “Beltesazzar, mumang emaw, a hrilhfiahna emaw pawhin tibuai che suh se,” tiin a sawi a. Beltesazzara chuan a hnênah, “Ka lalpa, mumang chu a hawtu che tân ni sela, a hrilhfiahna pawh chu i hmêlmate tân ni rawh se.

²⁰Thing i hmuh, lo ṭhanga, lo ṭanṭhaa, vân lo tawnga, kâwlkil aṭanga lang thei vek leh,

²¹a hnahte mawia, a rahte tama, nung zawng zawng tâna ei tûr awm leh a hnuaia ramsate chênga, a zârte chunglêng savate chênna lo ni chu,

²²aw lalber, nangmah i ni a; i ṭhang a, i chak a, i ropuina chu a ṭhang a, vân a tawng a, i rorêlnate chu kâwlkil thleng a ni si a.

²³Tin, vân aṭanga vêngtu mi thianghlim lo chhuka, ‘Thing chu kit la, tiboral rawh; amaherawhchu, ram hlobet ṭo zîngah, leia a bulbâwr chu thîr leh dâra ṭâwnin zuah la; tin, vân daiin huh sela, a chan tûr chu ramsate nêna awm ni rawh se, a chunga hun sarih a ral thlengin,’ rawn ti lalin a hmu a;

²⁴tin, a hrilhfiahna chu hei hi a ni, aw lalber, Chungnungbera thupêk, lalber ka lalpa chunga lo thleng chu a ni e:

²⁵mihring zîng ata hnawh chhuah i ni ang a, i chênna chu ramsate zîngah a ni ang a, sebâwng anga hlobet eitîr i ni ang a, vân daiin i huh ang a, i chungah hun sarih a ral ang; Chungnungbera chuan mihringte lalna ram chungah thu a nei a, a duhsak apiang a pe ṭhîn a ni tih i hriat hma loh chuan.

²⁶Tin, a bulbâwr zuah tûra thu an lo pêk ang khân, vânin thu a nei tih i hriat hnuah chuan i ram chu i ta a ni tlat ang.

²⁷Chu vâng chuan, aw lalber, ka thurâwn che hi pawm tlâkah ngai la, i sualna chu felnain thlâk la, i suahsualnate chu mi rethei chunga zahngaihnain thlâk rawh, i nunkhaw nawmna hi a sei thei deuh mahna,” tiin a chhâng a.

²⁸Hêng zawng zawng hi Lal Nebukadnezzara chungah chuan a lo thleng a ni.

²⁹Thla sâwm leh thla hnih tâwpah chuan Babulon lal in chungah lal chu a vei a vei a.

³⁰Lal chuan, “He Babulon ropui hi keima chakna ngeia lal chênna hmun atân leh ka ropuina mawina tûra ka siam chu a ni lo vem ni?” tiin a sawi a.

³¹Chu thu chu lal kaa a chhuah lai mêkin vân aṭangin aw a lo chhuak a: “Aw Lal Nebukadnezzar, i hnênah thu a lo thleng e: lalna ram chuan a hransan ta che a ni!

³²Mihring zîng ata hnawh chhuah i ni ang a, i chênna chu ramsate zîngah a ni ang; sebâwng anga hlobet eitîr i ni ang a, i chungah hun sarih a ral ang; Chungnungbera chuan mihringte lalna ram chungah thu a nei a, a duhsak apiang hnênah a pe ṭhîn a ni tih i hriat hma loh chuan,” tiin.

³³Chumi lai la la chuan chu thil chu Nebukadnezzara chungah a lo thleng ta nghâl a; mihring zîng ata hnawh chhuahin a awm ta a, sebâwng angin hlobet a ei a; a taksa chu vân daia huhin a awm a, a samte mupui hmul anga a ṭhan leh, a tinte sava tin ang mai a nih thlengin.

³⁴Tin, chûng ni tâwpah chuan kei, Nebukadnezzara chuan vân lamah ka mit ka lên chho va, ka hriatna chu ka hnênah a lo kîr leh ta a. Chungnungbera chu mal ka sâwm a, nung renga chu ka fak a, ka zah a, a rorêlna chu chatuan rorêlna a ni a, a ram chu chhuan awm chhûng zawng zawng a ni si a.

³⁵Leilung luahtu zawng zawngte hi engmahlova ngaih an ni a; vân sipai rualte zîngah leh leilung luahtute zîngah chuan a thu thuin a ti a. Tu mahin a kut chu an chawlhtîr thei lo va, a hnênah, “Eng nge i tih?” pawh an ti thei hek lo.

³⁶Chutih lai vêk chuan ka hriatna chu ka hnênah a lo kîr leh ta a; tin, ka ram ropuina tûrin ka ropuina leh mawina chu ka hnênah a lo kîr leh a. Ka remruatpuite leh ka mi ropuite chuan min rawn pan leh a, ka ramah chuan tihnghehin ka awm a, ropuina nasa tak mai ka hnênah belhchhah a ni ta a.

³⁷Tichuan, kei Nebukadnezzara hian vân Lal chu ka fak a, ka chawisâng a, ka zah a; a thiltih zawng zawng chu a dikin a kawngte chu a fel si a. Chapova lêngte chu a tihniam thei a ni.