Read Mizo_Old_version Daniela 5 Bible Online

Daniela 5 - Mizo_Old_version bible

Daniela 5

¹Lal Belsazzara chuan a mi ropui sângkhatte tân ruai ropui tak a ṭheh a, sâng hmaah chuan uain a in a.

²Belsazzara chuan uain a in deuh chinah chuan rangkachak leh tangkaraw bungbêl, a pa Nebukadnezzaran Jerusalem-a biak in ata a lâk chhuah chu rawn la tûrin thu a pe a; lal leh a mi ropuite leh a nupuite leh a hmeiten uain an inna atân.

³Tichuan, rangkachak bungbêl, Jerusalem-a Pathian biak in ata lâk chhuahte chu an rawn la a; tin lal leh a mi ropuite, a nupuite, a hmeite chuan in nân an hmang ta a.

⁴Uain chu an in a, rangkachak te, tangkarua te, dâr te, thîr te, thing te, lungtea siam pathiante chu an chawimawi ta dur dur a.

⁵Chumi lai tak chuan mihring kutzungṭang hi a lo chhuak a, lal in bang chulh, khâwnvâr dahna ep lamah chuan a rawn ziak ta a; tin, lal chuan a ziaktu kut tumbung chu a hmu a.

⁶Tichuan, lal chu a hmêl a dâng a, a rilrute chu a buai zo va, a kâwngruh chuktuahte a zâwi zo va, a khûpte a inkhâwng hlawk hlawk ta mai a.

⁷Lal chu, “Aikaihthiamte, Kaldai mite, aisânthiamte rawn hruai tûr,” tiin a au vak a. Tin, lal chuan Babulon mi fingte hnênah chuan, “Tu pawh he ziak hi chhiara a hrilhfiahna mi entîr chu puansenduk sintîr a ni ang a, a nghâwngah rangkachak khaidiat awrhtîr a ni bawk ang a, rama rorêltu pathumte zînga pakhat a ni ang,” tiin a sawi a.

⁸Tichuan, lal mi fing zawng zawng chu an lo lût a; mahse, ziak chu an chhiar thei lo va, a hrilhfiahna lah lal an hriattîr thei hek lo.

⁹Tin, Lal Belsazzara chu a mangang êm êm mai a, a hmêl a dâng a, a mi ropuite chu an mangang bawk a.

¹⁰Lal leh a mi ropuite au thâwm avâng chuan lalnu chu ruaiṭhehna inah chuan a lo lût a. Lalnu chuan, “Aw lalber, kumkhuain dam ang che! I rilru chu buai suh sela, i hmêl pawh dâng hek suh se.

¹¹I ramah hian mi pakhat, amaha pathian thianghlimte thlarau awm chu a awm a; i pa hun laiahte pawh ênna te, hriat thiamna te, finna te, pathian finna ang mai amahah chuan a awm tih hriat a ni tawh a; aw lalber, i pa Lal Nebukadnezzara, i pa ngei chuan dawivaihthiamte, aikaihthiamte, Kaldai mite, aisânthiamte hotuah a siam a;

¹²amahah chuan rilru ṭha fawr bîk te, hriatna te, hriat thiamna te, mumang hrilhfiahna te, thu har tihfiahna te, dawi sût thiamna te chu Daniela, lalin Beltesazzara a vuahah chuan a awm tih hriat a ni tawh ṭhîn a. Tûnah Daniela chu koh ni sela, a hrilhfiahna chu a entîr mai ang,” tiin a sawi a.

¹³Tichuan, Daniela chu lal hmaah an rawn hruai lût a. Lal chuan Daniela hnênah, “Daniela, Juda sal tâng fate zînga mi, ka pa lalberin Judai ram ata a rawn hruaia chu i ni em?

¹⁴Nangmahah chuan pathiante thlarau a awm a, ênna te, hriat thiamna te, finna ṭha fawr bîk te nangmahah chuan a awm tih hriat a ni, tiin i thu ka lo hria a.

¹⁵Tin, tûnah hian he ziak hi chhiar tûr leh a hrilhfiahna mi hriattîr tûrin mi fingte, aikaihthiamte ka hmaah an rawn hruai lût tawh a; mahse, chu thil hrilhfiahna chu mi entîr thei lo.

¹⁶Nang erawh chuan mi hrilhfiah thei a, dawi i sût thiam a ni tih ka lo hria che a; tûnah i theih chuan ziak hi chhiar la, a hrilhfiahna mi hriattîr la, puansenduk sintîr i ni ang a, i nghâwng vêlin rangkachak khaidiat awrhtîr i ni ang a, rama rorêltu pathumte zînga pakhat i ni ang,” tiin a sawi a.

¹⁷Tin, Daniela chuan a chhâng a, lal hmaah chuan, “I thilpêk chu nangma tân ni sela, i lâwmman chu mi dang hnênah pe ang che; mahse, ziak hi lal ka chhiarsak ang a, a hrilhfiahna chu ka hriattîr ang e.

¹⁸Aw lalber, Pathian Chungnungbera chuan i pa Nebukadnezzara chu ram te, lenna te, ropuina te, lalna te a pe a;

¹⁹lenna a hnêna a pêk avâng chuan mi tinte, hnam tinte, ṭawng tinte chuan an hlau va, a hmaah chuan an khûr ṭhîn a; a duh apiang a that a, a duh apiang a nun a; a duh apiang a chawisâng a, a duh apiang a titlâwm ṭhîn a.

²⁰Mahse, a thinlung a lo dâk sâng a, a rilru a lo sak a, chapo takin a che ta a; a lalthutthlêng ata tihtlâwm a ni a, a ropuina chu an lâksak ta a;

²¹tin, mihring fate zîng ata hnawh chhuahin a awm a, a rilru chu ramsa anga siam a ni a, a chênna chu ramsabengtungte zîngah a ni ta a; sebâwng angin hlobetin an châwm a, a taksa chu vân daia huhin a awm a, Pathian, Chungnungbera chuan mihringte lalna ram chungah thu a nei a, a duhsak apiang a luahtîr ṭhîn a ni tih a hriat hma loh chuan.

²²Tin, nang a fapa, aw Belsazzar, hêng zawng zawng hi i hre na a, i rilru i tihniam lo va,

²³vân Lalpa chungah chuan i inchawisâng ta zâwk a; a ina bungbêlte chu i hmaah an rawn la a, nang leh i mi ropuite, i nupuite leh i hmeite nên uain in nân in hmang a; tin, tangkarua te, rangkachak te, dâr te, thîr te, thing te, lungtea siam pathian, hmu thei lo, ngaithla thei lo, hre thei lote chu i chawimawi a; tin, Pathian, i nunna leh i kawng zawng zawng a kuta kawltu chu i zah lo va;

²⁴tichuan, a hnên aṭangin kut tumbung chu tirh a ni ta a, he ziak hi a lo inziak ta a nih hi.

²⁵“Tin, hei hi thu ziaka chu a ni e: MENE, MENE, TEKEL, UPHARSIN.

²⁶Tin, hei hi a hrilhfiahna chu a ni. MENE: Pathianin i ram chu a chhût zo ta a, a tâwp a thlen ta.

²⁷“TEKEL: Bûkin i awm a, i tling ta lo.

²⁸PERES: I ram chu ṭhenin a awm a, Media leh Persia hnênah pêk a ni ta,” a ti a.

²⁹Tichuan, Belsazzara chuan thu a pe a, Daniela chu puansenduk an sintîr a, a nghâwng vêlin rangkachak khaidiat an awrhtîr a, a ramah chuan rorêltu pathumte zînga pakhat a ni tûr a ni, tiin an puang ta a.

³⁰Chumi zânah chuan Kaldai lal Belsazzara chu thah a ni a.

³¹Tin, Daria, Media mi chuan ram chu a chang ta a, amah chu kum sawmruk leh kum hnih vêla upa a ni.