Read Mizo_Old_version Daniela 6 Bible Online

Daniela 6 - Mizo_Old_version bible

Daniela 6

¹Daria chuan ram awp tûra thuneitu za leh sawmhnih, ram pum puia dah darh chu ṭha a ti a;

²tin, an chungah chuan hotu pathum a ruat leh a, an zînga pakhat chu Daniela a ni a; hêng thuneitute hian an hnêna chanchin an thlen chhâwn zêla, Darian chhiatna rêng a neih loh nân.

³Tin, he Daniela hi rilru ṭha fawr bîk pu a nih avângin hotu dangte leh thuneitute aiin a lang bîk hle a; lal pawhin ram pum pui chunga dah a rilrûk a.

⁴Tichuan, hotute leh thuneitute chuan ram chung thu-ah chuan Daniela chungah remchâng an zawng ta a; mahse, remchâng rêng an hmu thei lo va, dik lohna an hmu thei hek lo; a rinawm êm êm si avângin amahah chuan tihsual emaw, dik lohna emaw hmuh tûr a awm si lo va.

⁵Tichuan, hêng mite hian, “A Pathian dân thu-ah a chunga remchâng kan hmuh nghâl loh chuan, he Daniela chungah hian remchâng kan hmu dâwn lo ve,” an ti a.

⁶Tichuan, hotute leh thuneitute chu lal hnênah chuan an inhâwr khâwm a, hetiang hian an sawi a: “Lal Daria, kumkhuain dam ang che.

⁷Ram hotute, aiawhtute leh thuneitute, remruattu leh awptute zawng zawng chu ni sawmthum chhûnga aw lalber, nangma hnênah chauh lo chuan, pathian emaw, mihring emaw hnêna dîlna nei apiang chu sakeibaknei pûka paih tûr, tiin lal hian dân siamin khap tlat sela, tih an remti tlâng a.

⁸Tûnah hian, aw lalber, khapna chu tinghet la, Media leh Persia dân danglam ngai lo ang zêlin, thu ziak hi danglam leh tawh hlek lo tûrin hming ziak hnan ang che,” tiin.

⁹Chutichuan, Lal Daria chuan thu ziak leh khapnaah chuan hming a ziak ta a.

¹⁰Tin, Daniela chuan thu ziak chu hming ziak hnan a ni tih a hriat veleh a inah a lût a (a pindana a tukverhte chu Jerusalem lam hawia hawn a ni a), a hmaa a tih dân ang bawkin ni khatah vawi thum a ṭhingṭhi a, a ṭawngṭai a, a Pathian hnênah lâwm thu a hrilh a.

¹¹Tichuan, hêng mite hi an inkhâwm a, Danielan a Pathian hnênah dîlna leh ngenna a hlân ṭhîn tih an hmuchhuak ta a.

¹²Tin, lal chu an rawn hnaih a, a hmaah chuan lal khapna thu kha an sawi a. “Ni sawmthum chhûnga aw lalber, nangma hnênah chauh lo chuan pathian emaw, mihring emaw hnêna dîlna nei apiang chu sakeibaknei pûkah paih an ni ang, tia khapnaah khân hming i ziak lâwm ni kha?” an ti a. Lal chuan, “Chu thil chu a nghet e, Media leh Persia dân danglam ngai lo ang zêlin,” tiin a chhâng a.

¹³Tichuan, lal chu an chhâng a, “Daniela, Juda sal tâng fate zînga mi khân, aw lalber, a pawisa lo chia, khapna hming i ziak hnan pawh kha a pawisa hek lo; ni khatah vawi thum dîlna a nei zâwk a ni,” an ti a.

¹⁴Tin, lal chuan hêng thu hi a hriat chuan pawi a ti êm êm a, Daniela chu chhanchhuah a rilrûk tlat a, chhanchhuak tûrin ni tlâk thlengin a bei a.

¹⁵Tin, hêng mite hi lal hnênah chuan an rawn inhâwr khâwm leh a, lal hnênah chuan, “Aw lalber, Media leh Persia dânin khapna emaw, dân emaw, lalberin a tihngheh tawh chu a danglam ngai lo tih hria ang che,” an ti a.

¹⁶Tichuan, lal chuan thu a pe ta a. Daniela chu an rawn hruai a, sakeibaknei pûkah chuan an paih ta a. Lal chuan Daniela hnênah, “I Pathian, a rawng i bâwl fo ṭhina khân a chhanhim ang che,” tiin a sawi a.

¹⁷Tin, lung an rawn la a, pûk kawngka chu an khâr a; tin, lal chuan Daniela chung thu hi a danglam tawh hlek loh nân ama zungbun ngei leh a mi ropuite zungbuna nemin a chhinchhiah a.

¹⁸Tin, lal chu a inah chuan a kal a, chaw ngheiin a zankhua a; a hmaah chuan thil ri theite an rawn la hek lo va, mutmu pawh a tuah thei hek lo.

¹⁹Tichuan, a tûk zîng takah chuan lal chu a tho va, hmanhmawh takin sakeibaknei pûk lamah chuan a kal ta a.

²⁰Tin, Daniela awmna pûk a rawn hnaih chuan ṭah awin a au va. Lalber chuan Daniela hnênah, “Aw Daniel, Pathian nung chhiahhlawh, i Pathian, a rawng i bâwl fo ṭhina chuan sakeibaknei lak ata a chhanchhuak thei che em?” a ti a.

²¹Daniela chuan lal hnênah, “Aw lalber, kumkhuain dam ang che!

²²Ka Pathian chuan a vântirhkoh a rawn tîr a, sakeibaknei kâte a tichîp a, eng mah mi tina lo ve; a mit hmuhah chuan sawisêl bovin ka awm a; tin, i chungah pawh aw lalber, pawi eng mah ka khawih lo ve,” a ti a.

²³Tichuan, lal chu a lâwm ta êm êm a, Daniela chu pûk ata lâk chhuah tûr thu a pe ta a. Chutichuan, Daniela chu pûk ata an la chhuak a, na lai rêng rêng amahah a awm lo va, a Pathian a rin tlat avângin.

²⁴Tin, lal chuan thu a pe a, Daniela hêktute chu an rawn hruai a, sakeibaknei pûkah chuan an paih lût ta a, anniho leh an fate leh an nupuite nên; sakeibakneite chuan anni chu an ching nawk nawk a, an ruhte chu an titliak sawm vek a, pûk mawng pawh an thleng hman lo.

²⁵Tichuan, Lal Daria chuan mi tinte, hnam tinte, ṭawng tinte zawng zawng, lei pum puia chêngte hnênah chuan lehkha a ziak a, “In chungah remna tihpunin awm rawh se.

²⁶Ka ram awp zawng zawngah hian miten Daniela Pathian chu hlauvin khûr rawh se, tiin thupêk ka siam e. Ani chu Pathian nung a ni a, a nghet kumkhua a, a ram chu tihchhiat rual a ni lo vang a, awp pawh a tâwp thleng zakin a awp dâwn si a.

²⁷Ani chuan a chhanhim a, a chhanchhuak a, lei leh vânah hian chhinchhiahnate leh thil makte a ti a; ani hi sakeibaknei thiltihtheihna lak ata Daniela chhanchhuaktu chu a ni,” tiin.

²⁸Chutichuan, he Daniela hi Daria rorêl lai leh Persia mi Kura rorêl lai chuan a hmuingîl ta hle a.