Read Mizo_Old_version Daniela 7 Bible Online

Daniela 7 - Mizo_Old_version bible

Daniela 7

¹Babulon lal Belsazzara kum khatnaah chuan, Danielan mumang a neiin a khumlaizâwla a lua inlârnate chu a hmu a. Tichuan, a mumang chu a ziak a, a tlângpuiin a sawi a.

²Daniela chuan a sawi a: “Zânah inlârnaah chuan hmuh ka nei a, ngai teh, kâwlkil lia thli hi tuipui ropui tak chungah a lo tleh a.

³Tin, tuipuiah chuan sa ropui tak tak pali, inang lo tak tak hi an lo chhuak a.

⁴A pakhatna chu sakeibaknei ang a ni a, mupui thla a nei a. A thlate chu thlawn a niha, lei ata chawi kân a niha, mihring anga ke pahniha ding tûra siam a niha, mihring thinlung pêk a nih thlengin ka en reng a.

⁵Tin, ngai teh, sa dang, a pahnihna chu savawm ang a ni a, a khing lehlamin a ding a, a kaah chuan nâkruh pathum a awm a, a seh kawh a, a hnênah chuan, ‘Tho la, tîsa ei ṭeuh rawh,’ tiin an hrilh a.

⁶Chumi hnuah chuan ka en a, ngai teh, a dang, keitê ang, a hnunga sava thla pali nei a lo awm a, chu sa chuan lu pali a nei a; tin, a hnênah chuan rorêlna pêk a ni a.

⁷Chumi hnuah chuan, zân inlârnaahte chuan ngai teh, sa palina, ṭihbaiawm leh hlauhawm tak, chak tak mai ka hmu a; thîr ha ropui tak a nei a; a ei buan buan a, a pawt sawm a, a bângnawite chu a kein a rap bet a. A hmaa sa dangte lakah kha chuan danglam tak a ni; ki sâwm a nei a.

⁸Kîte chu ka ngaihtuah a; tin, ngai teh, an zîng aṭang chuan ki dang pakhat, tê tak tê a lo chawr chhuak a; a hmaah chuan ki hmasa pathumte chu a bul rêtah an thlawn ta a: tin, ngai teh, he kîah hian mitte, mihring mit ang mai hi a awm a; tin, kâ pawh a awm a, thil nasa takte a sawi a.

⁹“Lalṭhutthlêngte an han hûn chhuaha, mi pakhat, Hmâkhawsânga a ṭhut thlengin ka en reng a; a silhfênte chu vûr anga vâr a ni a, a sam chu sahmul thianghlim tak ang a ni. A lalṭhutthlêng chu meialh a ni a, chumi tawlailîr chu mei kâng mêk ang a ni a.

¹⁰“A hma aṭang chuan mei lui a lo chhuakin a luang a. A sânga sângin rawng an bâwlsak a, a hmaah chuan sîng hmun sîng an ding a: rorêlna a lo awm ta a, lehkhabute chu keu a ni a.

¹¹Chumi lai chuan kîin thu nasa tak a sawi thâwm avâng chuan ka han en a, sa chu tihhluma, a taksa tihchhiata, meia hâl tûra pêk a nih thlengin ka en reng a.

¹²Tin, sa dangte thu kha chu, an rorêlna lâksakin an awm a, an nunna erawh chu hunbi khat leh hun khat chhûng atân zuah a ni.

¹³Zân inlârnaahte chuan, ngai teh, vân chhûmte nêna lo kal, mi pakhat, mihring fapa ang hi ka hmu a, Hmâkhawsânga hnênah chuan a lo kal a, a hmaah chuan ani chu an rawn hruai hnai a.

¹⁴Tin, rorêlna te, ropuina te, ram te a hnêna pêk a ni a, mi tin te, hnam tin te leh ṭawng tinte zawng zawng chuan a rawng an bâwl nân. A rorêlna chu rorêlna hlun, ral ngai lo tûr a ni a, a ram chu tihchhiat rual a ni lo vang.

¹⁵“Kei Daniela hi, ka taksa chhûngah hian ka rilru a lungngai a, ka lua inlârnate chuan mi tibuai a ni.

¹⁶A lo dingte zînga pakhat chu ka han hnaih a, hêng zawng zawng chungchânga thutak chu ka zâwt a. Chutichuan, mi hrilh a, a thil hrilhfiahnate pawh chu mi hriattîr ta a:

¹⁷‘Hêng sa ropui tak tak palite hi, lal pali lei ata lo chhuak tûrte chu an ni a.

¹⁸Mahse, Chungnungbera mi thianghlimte chuan ram chu an chang ang a, kumkhuain, kumkhaw tlaitluanin.’

¹⁹“Tichuan, sa palina, a dangte laka danglam bîk tak, ṭihbaiawm tak, a hâte thîr nia, a tinte dâr nia, ei buan buana, pawt sawma, a bângnawi a ke hnuaia rap bettu chungchângah chuan thutak hriat ka châk ta a;

²⁰a lua ki sâwm leh ki dang lo chhuaka, a hmaa pathum tlu ta chungchâng te; kha kî, mitte neia, thil nasa tak sawitu, kâ pawh neia, a lan dân pawh a ṭhiante aia ropui bîk tak te nên khân.

²¹Tin, ka en reng a; chu kî ngei chuan mi thianghlimte chu a do va, a hneh a;

²²Hmâkhawsânga a lo kala, rorêlna chu Chungnungbera mi thianghlimte hnênah pêk a niha, mi thianghlimten ram an chan hun a lo thlen hma loh chuan a hneh a.

²³Hetiang hian a ti a: ‘Sa palina chu lei chung ram palina, ram dang zawng zawng laka danglam bîk, lei pum pui ei buan buana, chîla, pawt sawm tûr chu a ni ang.

²⁴“ ‘Ki sâwmte thu chu, hemi ram ata hi lal sâwm an lo chhuak dâwn a ni. An hnuah chuan pakhat a lo chhuak ang a, a hmaa mite lakah chuan a danglam ang a, lal pathumte chu a titlu ang.

²⁵Chungnungbera kalhin thu a sawi ang a, Chungnungbera mi thianghlimte a tichau vang; hunte leh dân chu tihdanglam a tum ang a, hun khat leh hunte leh hun chanve chhûng chu a kuta pêk an ni ang.

²⁶Mahse, rorêlna a lo awm ang a, a thuneihna chu tihrala tihchhiat hlen tûrin an la bo vang.

²⁷Tichuan, ram leh rorêlna leh vân pum pui hnuaia ramte ropuina chu Chungnungbera mi thianghlimte hnênah chuan pêk a ni ang. A ram chu ram hlun a ni a, awp ram zawng zawngin a rawng an bâwl ang a, a thu an awih ang.’

²⁸Hei hi thil tâwpna chu a ni. Kei Daniela hi ka ngaihtuahnate chuan mi tibuai a, ka hmêl a dâng a; mahse, ka rilruin thu chu ka vawng reng a ni.”