Read Mizo_Old_version Daniela 8 Bible Online

Daniela 8 - Mizo_Old_version bible

Daniela 8

¹Lal Belsazzara rorêl kum thumnaah chuan ka hnênah, kei Daniela hnên ngeiah hian inlârna a lo lang a, a tîra ka hnêna lo lang hnuah khân.

²Inlârnaah chuan hmuh ka nei a; hetiang hi a ni a, ka hmuh lai chuan Elam biala Susan lal inah ka lo awm a; tin, inlârnaah chuan hmuh ka nei a, Ulai lui kamah ka lo awm a.

³Tichuan, ka mit ka han lên chho va, ka han en a, ngai teh, lui bulah chuan berâmpa, ki pahnih nei hi a ding a; tin, ki pahnihte chu a sâng dûn hle a; mahse, pakhat chu a dang ai chuan a sâng zâwk a, a sâng zâwka chu a lo chawr hnuhnûng a.

⁴Berâmpa chuan thlang lam leh hmâr lam leh chhim lam phînin ka hmu a; a hmaah chuan sa rêng rêng ding thei an awm lo va, a kut ata chhanchhuak thei an awm hek lo; a duh ang angin a che a, amah a intilian a.

⁵Tin, ka ngaihtuah mêk laiin, ngai teh, khawthlang lam aṭangin lei pum pui chungah hian kêlpa a lo thawk a, lei pawh a khawih lo; tin, kêl chuan a mit inkârah ki langsâr tak a nei a.

⁶Tin, berâmpa, ki pahnih nei, lei bula ding ka hmuh kha a rawn pan a, a chak theihtâwpin a zuan a.

⁷Tin, berâmpa chu a fin rawkin ka hmu a, a chungah a thinur êm êm a, berâmpa chu a tauh va, a ki pahnih chu a tihtliahsak a, amah khing tûrin berâmpaah chuan chakna rêng rêng a awm ta lo; leiah a theh thlu a, a rap bet a, berâmpa chu a kut ata chhanchhuak thei rêng rêng an awm lo.

⁸Tin, kêlpa chu a intilian ta vak mai a; a chak lai tak chuan a ki ropui chu a tliak ta a, a aiah chuan ki langsâr tak pali, kâwlkil li hawiin an lo chhuak a.

⁹Tin, an zînga pakhatah chuan ki tê tak tê a lo pêng chhuak a, chhim lamah te, chhak lamah te, ram ropui lamah te nasa takin a lo ṭhang lian ta a.

¹⁰Tin, vâna awmho tawng hialin a lo ṭhang lian a, chûng awmho ṭhenkhatte leh arsi ṭhenkhatte chu leiah a paih thla a, a rap bet ta hlawm a.

¹¹A ni, chûng awmho lal thleng hialin a intilian a, hâlral thilhlan awm fo chu a lâk bosak a, a hmun thianghlim awmna chu tihchhiatin a awm a.

¹²Tin, chûng awmho chu hâlral thilhlan awm fo chawp chuan bawhchhiatna avângin a hnênah pêk a ni a; tin, thutak chu leiah a paih thla a, chutiangin a ti a, a hlawhtling hle.

¹³Tin, mi thianghlim ṭawng ka hria a; tin, mi thianghlim dangin tu emaw lo ṭawnga hnênah khân, “Hâlral thilhlan awm fo te, tiṭiautu bawhchhiatna te, hmun thianghlim leh awmho chu rah beh tûra pêk an nih te chungchânga inlârna chu engtia rei nge ni dawn?” a ti a.

¹⁴Tin, ka hnênah, “Zîng leh tlai sânghnih leh zathum thlengin; tichuan, hmun thianghlim chu then fai a ni ang,” a ti a.

¹⁵Tin, heti hi a ni a, kei Daniela ngei hian inlârna chu ka hmuhin a awmzia hriat ka tum a; tin, ngai teh, ka hmaah chuan mihring anga lang hi a lo ding a.

¹⁶Tin, Ulai kam tuak inkârah chuan mihring aw, “Gabriel, inlârna chu he mi hi hriat thiamtîr rawh,” tia han ko hi ka hria a.

¹⁷Chutichuan, ka dinna chu a rawn hnaih a; tin, a lo kal chuan ka hlau êm a, bawkkhupin ka tlu a; mahse, ani chuan ka hnênah, “Aw mihring fapa, hre thiam ang che, inlârna chu tâwpna huna mi tûr a ni si a,” a ti a.

¹⁸Tin, mi biak lai chuan bawkkhupin ka lo muhîl dêr a; mahse, mi han khawih a, mi dintîr a.

¹⁹Ani chuan, “Ngai rawh, thinurna hun hnuhnûng lama thil lo awm tûr chu ka hriattîr ang che; tâwpna hun ruata mi a ni si a.

²⁰Berâmpa, ki pahnih nei i hmuh kha Media leh Persia lal an ni a.

²¹“Tin, kêlpa hmul chhur mai chu Grik lal a ni: tin, a mit inkâra ki ropui chu lal hmasa ber a ni.

²²Tin, kha kî, tliaka a hmuna pali lo chhuak kha chu, chu hnam aṭang chuan ram pali a lo ding chhuak dâwn tihna a ni a, a thiltihtheihna nên erawh chuan ni lovin.

²³Tin, an lalna hun hnuhnûng lama bawhchhetuten an vâwrtâwp an thlen hunah chuan, lal hmêl hlauhawm tak, thu khirhkhân thiam mi a lo chhuak ang.

²⁴Tin, a thuneihna a chak êm êm ang a, ama thiltihtheihna ngei avâng erawh chu ni lovin; mak takin a tichhia ang a, a hlawhtling ang a, chutiangin a ti ang; tin, mi chakte leh mi thianghlimte chu a tichhia ang a.

²⁵Tin, a thiltih dâwn avângin vervêkna a kutah a tihlawhtling ang; a thinlungah amah a intilian ang a, ngaihṭha taka an awm laiin tam tak a tichhia ang. Lalte Lal a khing ang a; mahse, kut lova tihtliahin a awm ang.

²⁶Tin, zîng lam leh tlai lam inlârna, sawi tawha kha, a dik a ni; mahse, inlârna chu ngawihpui rawh, ni tam tak hnua mi tûr a ni si a,” a ti a.

²⁷Tin, kei Daniela chu ka chau va, ni eng emaw zât ka damlo va; tin, ka tho va, lal hna chu ka thawk leh ta a. Tin, inlârna chu mak ka ti êm êm mai a; mahse, tu mân an hre thiam lo.