Read Mizo_Old_version Daniela 9 Bible Online

Daniela 9 - Mizo_Old_version bible

Daniela 9

¹Ahasuera fapa Daria, Media chia mi, Kaldai ram chunga lala siam kum khatna,

²a rorêl kum khatnaah chuan, kei Daniela hian lehkhabuahte chuan zâwlnei Jeremia hnêna LALPA thu lo thleng, Jerusalem chhiatna hlen a tiam hun chhûng kum zât chu ka lo hre thiam ta a, kum sawmsarih chu.

³Tin, chaw ngheiin, saiip puan te, vaivut te nên ṭawngṭaina leh dîlna zawngin LALPA Pathian lam chu ka hawi a.

⁴Tin, LALPA ka Pathian hnênah chuan ka ṭawngṭai a, ka inpuang a, “Aw Lalpa, Pathian ropui tak leh ṭihawm tak, nangmah hmangaiha, i thupêkte zâwm ṭhîntu hnêna thuthlung leh zahngaihna nei ṭhîntu.

⁵“I thupêk leh rorêlnate laka kal pêngin kan sual ta, dik lo tak leh suaksual takin kan ti ta a, kan hel ta.

⁶Kan lalte, hotute leh pate leh ram mipui zawng zawngte hnêna i hminga thusawitu, i chhiahhlawh zâwlneite chu kan ngaithla hek lo.

⁷Aw Lalpa, felna chu i chan a ni a, keini chan erawh chu zahna mai a ni, tûnlai ang hian; Judai-a mite, Jerusalem-a chêngte, Israel-ho zawng zawng, lamhnaia mi leh lamhlaa mi, an bawhchhiatna, i chunga an bawhchhiatnate avânga ram tina i hnawh darhte lah chuti bawk.

⁸Aw Lalpa, i chunga kan lo sual tâk avângin keini chan zawng zahna mai a ni, kan lalte, kan hotute, kan pate chan pawh.

⁹Zahngaihna leh ngaihdamna chu Lalpa kan Pathian chuan a nei, a chungah hel ta mah ila.

¹⁰A chhiahhlawh zâwlneite hmanga kan hmaa a dah, a dânte zâwmin LALPA kan Pathian aw chu kan awih hek lo.

¹¹A ni, Israel-ho zawng zawngin i aw awih lo tûra kal pêngin i dân an bawhchhe ta a ni. Chu vâng chuan ânchhia chu kan chungah leihin a awm ta a, Pathian chhiahhlawh Mosia dâna ziak chhechham thu nên; a chungah kan sual ta si a.

¹²Tin, a thu kan chunga a sawi leh kan rorêltu, ro min rêltute chunga a sawi kha kan chunga thil ṭha lo nasa tak thlentîrin a tikim ta a; Jerusalem chunga tih tâk ang chu vân hnuai pum puiah pawh tihin a awm ngai lo.

¹³Mosia dâna ziak angin hêng thil ṭha lo zawng zawngte hi kan chungah a lo thleng a ni; mahse, kan khawlohnate chu kan hawisana, i thu dik hriat thiamna te kan neih nân LALPA kan Pathian lungawina chu kan zawng si lo.

¹⁴Chuvângin, LALPA chuan thil ṭha lo chu a en reng a, kan chungah a rawn thlentîr ta a ni; LALPA kan Pathian chu a thiltih a tih zawng zawngah hian a fel si a, a aw kan awih ta lo a ni.

¹⁵“Tin, tûnah hian, aw LALPA kan Pathian, Aigupta ram ata kut chaka i mite hruai chhuaktu leh hmingthanna, tûn thlenga hmingṭhatna insiamtu, kan sual ta a, suaksual takin kan ti ta e.

¹⁶Aw Lalpa, ka ngên a che, i felna zawng zawng avângin i thinurna leh i thinrimna chu i khawpui Jerusalem, i tlâng thianghlim aṭang chuan kîr sela; kan sualte avâng leh kan pate khawlohna avângin, Jerusalem leh i mite hi kan vêla mi zawng zawngte zîngah sawichhiat a lo ni ta.

¹⁷Chuvângin, aw kan Pathian, tûnah hian i chhiahhlawh ṭawngṭaina leh dîlnate hi ngaithla la, Lalpa avângin i hmun thianghlim ram tawh chungah chuan i hmêl tieng ang che.

¹⁸Aw ka Pathian, i beng dawh la, ngaithla teh; i mit meng la, kan ṭiau dânte leh khawpui i hming vuaha awm hi en teh; kan dîlnate chu kan felnate avângin i hmaah kan hlân a ni si lo va, i zahngaihna ropui tak avângin a ni zâwk e.

¹⁹Aw Lalpa, ngaithla teh; aw Lalpa, ngaidam rawh; aw Lalpa, ngaithla la, thawk ang che; rial suh ang che, aw ka Pathian, nangmah avâng ngeiin i khawpui leh i mite i hming vuaha an awm avângin,” tiin.

²⁰Tin, keima sual leh ka mi Israel-te sual thupha chawia, ṭawngṭaia, thu sawia, LALPA ka Pathian hmaa ka Pathian tlâng thianghlim atâna dîlna ka hlan lai mêkin,

²¹a ni, ṭawngṭaia ka ṭawng lai ngei chuan, mi, Gabriela, a tîra inlârnaa ka hmuh khân, tlai lam thilhlan hun lai angah hian chak taka thlâwkin mi rawn pan a.

²²Tin, hriat thiamna mi neihtîr a, mi bia a, ka hnênah, “Aw Daniel, hriat thiamna fing tak neihtîr tûr chein ka lo chhuak a nih hi.

²³I dîl tirhah khân thupêk a chhuak tawh a, hrilh tûr chein ka lo kal a ni, duhawm tak i ni si a; chu vâng chuan thil chu ngaihtuah la, inlârna chu hre thiam rawh:

²⁴“Bawhchhiatna tikin tûr te, sualna titâwp tûr te, khawlohna thian fai tûr te, chatuan felna la lût tûr te, inlârna leh thu hrilhlâwk nêna chhinchhiah tûr te, hmun thianghlim ber chu hriak thih tûr tein i mite leh i khawpui thianghlim tân hapta sawmsarih ruat a ni e.

²⁵Chuvângin, Jerusalem tung ding leh sa ṭha tûra thupêk a chhuah aṭanga Hriakthiha, lal a lo awm thlengin hapta sarih a ni ang tih hre fiah thiam ang che; tin, hapta sawmruk leh pahnihah kawtthlêr leh lei rût te nên siam a ni ang, hun buaithlâk takahte pawh.

²⁶Tin, hapta sawmruk leh pahnih hnuah chuan Hriakthiha chu tihbo a ni ang a, eng mah a nei tawh lo vang; tin, lal lo kal tûra mite chuan khawpui leh hmun thianghlim chu an tichhia ang. A tâwpna chu tui lian nên a ni ang a, a tâwpna thleng pawhin indona a awm ang, chhiatnate chu a inruat sa a ni.

²⁷Tin, hapta khat atân mi tam tak hnênah thuthlung nghet tak a siam ang a; hapta chanveah chuan inthawinate leh thilhlante a tibâng ang; tin, tiṭiautu chu tenawmna thla chunga chuangin a lo kal ang a, tâwpna, lo thleng ngei tûra ruat sa thlen thlengin chuan thinurna chu tiṭiautu chungah chuan leihbuak a ni ang,” a ti a.