Read Mizo_Old_version Hosea 10 Bible Online

Hosea 10 - Mizo_Old_version bible

Hosea 10

¹Israel chu grêp hrui duah tak, rah ngah tak a ni. A rah tam hu ang zêlin a maichâmte a tipung a; A ram ṭhatzia ang zêlin lungserh phun ṭha tak a siam a.

²Rilru pahnih an nei a, Tûnah chuan thiam loh changin an awm tawh ang. An maichâmte chu LALPAN a vaw chim ang a, An lungserh phunte chu a tichhia ang.

³“Lal taktak kan nei lo ve, LALPA chu kan ṭih si lo va. Chu lal chuan eng nge min tihsak theih ang?” tiin, Tûnah chuan an sawi tawh ngei ang.

⁴Thuthlung an siamna lamah dâwta chhechhamin Thu lawilo an sawi a. Chuvângin, leileh dûra hnim tûr nei a ṭo angin, Rorêlna a pung a ni.

⁵Samari rama chêngte chu Beth-aven sebâwngno avâng chuan thlaphângin an awm ang. A lak ata a bo tâk avângin chuta mite chu an lungngai ang a, Chumia puithiamho a ropuina chunga la lâwm ṭhînte pawh.

⁶Amah ngei pawh chu Lal Jareba hnêna pêk tûrin Assuria ramah kal bopui a ni ang. Ephraima chuan zah a hmu ang a, Israel chuan ama thurawt ngei chu a zahpui ang.

⁷Samari ram lah chu, tui chunga thingṭang nawi ang mai hian A lal chu tihboral a ni a.

⁸Israel sualna Aven hmun sângte pawh chu tihchhiat a ni ang. An maichâmahte chuan hlîng leh hnimhlîngnei a lo ṭo vang a; Tlâng hnênahte chuan, “Min khuh rawh,” an ti ang a, Mual hnênahte chuan, “Min delh rawh,” an ti ang.

⁹“Aw Israel, Gibea ni aṭang tawh khân i sual a ni; Chutah in la chhunzawm a. Khawlohna fate chunga dona chuan Gibea ngeiah chuan a ûm phâk hlawm lo vang maw?

¹⁰Ka duh hunah chuan anmahni ka hrîng ang a; Tin, an bawhchhiat thuah hnih avânga hrem an nih hunah chuan, An chungah mipuite chu an pung khâwm ang.

¹¹Tin, Ephraima chu bâwngla zirtîr tawh, Buh chîl châk tak a ni a; Mahse, kei ngei hian a nghâwng mawi takah chuan Nghâwngkawl ka bahtîr tawh ang a, Ephraima chungah mi ka chuantîr ang a, Juda pawh chuan lei a let ang a, Jakoba chuan a lei tlangte chu a tisawm ang.

¹²Mahni tân felna tuh ula, Khawngaihna seng rawh u; In lei khêkte let rawh u, LALPA zawn hun a ni si a, A lo kala malsâwmna a vûr hma che u chuan.

¹³Mahse, suahsualna in tuh a, Khawlohna in seng a: In dâwt sawi rah in nei a ni.

¹⁴Chu vâng chuan i mite zîngah buai mum mumna a lo chhuak ang a, Salmana chuan indo nia Beth-arbel a tihchhiat ang khân, I kulh zawng zawngte chu tihchhiat a ni ang; Nu chu a fate nên paih sawmin an awm a ni.

¹⁵Nangni Bethel mite u, In sual nasa tak avângin Chûng thil chu in chungah a lo thleng dâwn. Israel lal pawh khawfîngchah hmain a boral ang.