Read Mizo_Old_version Hosea 11 Bible Online

Hosea 11 - Mizo_Old_version bible

Hosea 11

¹“Israel hnam chu a naupan lai ata tawh ka hmangaih a, Aigupta ram ata ka fapa atân ka ko chhuak a ni.

²Koh an nihin an hla sauh va, Baal-ho hnênah an inthawi zâwk ṭhîn a, Milem siam chawpte hnênah rimtui an hâl a ni.

³Kei erawh chuan Ephraim chu bâna dawmin kal ka zirtîr a, Anmahni ka tihtîr a ni tih erawh chu an hre lo.

⁴Mihring hruihrual, hmangaihna hruite chuan anmahni ka kai a, An tân chuan an khabea kawl hlihsaktute ang chu ka ni. Duat takin an hmaah ei tûr ka hlui a.

⁵Aigupta ramah ka tîr leh tawh lo vang a; Mahse, an inlamlêt duh loh avângin, Assuria chu an lal a ni ang.

⁶A khawpuiahte chuan khandaih a invilik ang a, A kulhte chu a tiboral ang a, A tiral ang, anmahni thu lo râwn avâng ngeiin.

⁷Ka mite chuan mi hawisan an tum reng a. An nghâwngkawl rit tak avângin Chungnungbera an au vang a; Mahse, tu mân an chawi kânsak lo vang.

⁸Aw Ephraim, engtin nge ka thlauhthlâk theih ang che? Aw Israel, engtin nge ka thlah theih ang che? Engtin nge Adma angin ka siam theih ang che? Engtin nge Zeboiim angin ka awmtîr theih ang che? Ka chhûngah ka thinlung a inlumlet a, Ka khawngaihnate chu a inchhêm vâm ta zâwk a.

⁹Ka thinrimna nasa tak chu ka hlen lo vang a, Ephraima chu tihboral ka tin leh tawh lo vang. Kei chu mihring ni lovin Pathian ka ni si a, Nangmaha awm Mi Thianghlima chu; Khawpui chu ka rawn luhkhung lo vang.

¹⁰ LALPA chu an zui ang a, Sakeibaknei anga rûm ngei tûra chu. A ni, a rûm ngei ang a; Tin, khawthlang lam aṭangin a fate chu An lo tlân dual dual ang.

¹¹Aigupta aṭang chuan chawngzawng angin, Assuria aṭang chuan ṭhûro angin, thla zâp siau siauvin an lo kal ang. Tin, an in lum ka luahtîr ang,” tih hi LALPA thuchhuak a ni.

¹²Ephraima chuan dâwt thuin mi hual a, Israel chhûngte chuan bumnain; Mahse, Juda chuan Pathian thu a awih a, Mi Thianghlima lakah a rinawm a ni.