Read Mizo_Old_version Hosea 12 Bible Online

Hosea 12 - Mizo_Old_version bible

Hosea 12

¹Ephraima chuan thli rinrâwlah a neih a, Khawchhak thli chu a zui ṭhîn a; Dâwt thu leh ṭiavaina thu a tipung tial tial a, Assuria nên thu an thlung a, Aigupta lamah hriak a phur lût a ni.

² LALPA chuan Juda chungah pawh lungawi lohna tûr a nei bawk a, Jakoba chu a awm dân ang zia zêlin a hrem ang a; A thiltih ang zia zêlin a thungrûl ang.

³Chhûlah pawh khân a unaupa chu a keartuiah a rawn man a, A lo puitlinin Pathian a bei a;

⁴A ni, vântirhkoh a bei a, a hneh ta a; A ṭap a, duhsakna a ngên a. Bethel hmunah chuan amah a hmu ta a, Tah chuan ka hnênah thu a sawi a,

⁵ LALPA ngei, sipaihote Pathian chu. LALPA tih chu a chhinchhiahna a ni.

⁶Chutichuan, nang chuan i Pathian hnên lam hawi la; Khawngaihna leh rorêlna hmang la, I Pathianah chuan innghat fo rawh.

⁷Kanaan-ho angin Israel chuan bûkna dik lo a lek a; Bum mawlh a châk ṭhîn a ni.

⁸Ephraima chuan, “Ka hausa takzet ta mai, Ka intimuk takmeuh ta a ni; Ka hnathawh zawng zawngahte lah chuan, Keimahah khawlohna thil sual an hmuh tûr a awm miah lo,” a ti a.

⁹Mahse, kei hi Aigupta ram aṭang tawh khân, LALPA i Pathian chu ka ni a; Kût hun lai ang khân puan inah ka la chêntîr leh ang che.

¹⁰Zâwlneite hnênah pawh thu ka sawi ṭhîn a, Inlârnate ka tipung a; Zâwlneite hmangin ka vau lâwk a.

¹¹Gilead chu khawlohna a ni lo vem ni? Engmahlo mai an ni alâwm; Gilgal-ah chuan sebâwngpa an hlân ṭhîn a; A ni, an maichâmte chu leileh rih khawh thlûra Lung theh khâwm ang mai a ni.

¹²Jakoba chu Aram ramah a tlân bo va; Israela chuan nupui man a tuak a, Nupui man atân chuan berâm a vêng a ni.

¹³Zâwlnei hmangin Israela chu Aigupta ram aṭangin LALPAN a hruai chhuak a, Zâwlnei vêk hmang chuan a humhim bawk a.

¹⁴Ephraima lah chuan a tithinrim nasa êm êm mai a; Chuvângin, a thisen chhuah chu ama chungah a tla a, A sawichhiatna chu ama chungah LALPAN a tlâktîr ang.