Read Mizo_Old_version Hosea 13 Bible Online

Hosea 13 - Mizo_Old_version bible

Hosea 13

¹Ephraiman thu a sawi chuan khurhna khawp a tling hial ṭhîn, Israel mite zîngah ngaih ropui a ni miau va; Baala hnêna a tlûk chinah erawh chuan a thi ta a ni.

²Tûnah te hian an sual zual ta deuh deuh va, An tangkaruain milim chhûn an insiam chawp a, Anmahni ngaih dân ang zia zêla milim chu; Chûng zawng zawng chu themthiamte kutchhuak a ni chungin, “Inthawina hlântu apiangte chuan Bâwngnote chu fâwp rawh se!” an ti ṭhîn.

³Chuvângin, zîng ṭiauchhûm ang leh, Dai hma taka bo leh mai ṭhîn ang te, Hruiha buhsî, ṭhâwngaleivirin a lâk bo ang te, Meikhu chhuahnaa meikhu ang te an ni ang.

⁴Kei erawh hi chu Aigupta ram aṭang tawha LALPA i Pathian chu ka ni a; Kei tih loh chu Pathian dang i hre ngai lo va, Kei lo hi chu chhandamtu dang an awm lo.

⁵Thlalêr ram ro nasa taka kâwm ṭhîntu che kha ka ni a.

⁶An ei tûr dawnah chuan an tlai a; An tlai chu an thinlungin a chapo phah a; Tichuan, min theihnghilh ta a ni.

⁷Chuvângin, an tân sakeibaknei ang ka ni a, Keitê angin kawnglakah anmahni ka châng ang.

⁸Savawmno chân angin anmahni ka bei ang a, An lung tuamtute ka hai thlêr vek ang a, Chumi hmunah chuan sakeibaknei angin Anmahni ka ei zo vang; Ramsate chuan an phih darh zo dâwn a nih chu.

⁹Aw Israel, nangmah puitu mi do hi i chhiatna a ni e.

¹⁰I khawpui zawng zawnga chhanhim theitu tûr che I lal chu tûnah khawiah nge a awm le? “Lal leh hotute mi pe rawh,” i tihate, I rorêltute chu khawiah nge?

¹¹Ka thinrimin lal ka pe che a, Ka thinurin ka la bo leh ta a ni.

¹²Ephraima khawlohna chu khâwl khâwm a ni a, A sualna chu chhêk khâwm a ni.

¹³Hmeichhe nau vei lungngaihna ang chu a chungah a lo thleng ang: Amah chu fapa fing lo tak a ni e, A hun takah nau lo chhuahna hmunah a awm si lo.

¹⁴Seol kut ata anni chu ka tlan ang em ni? Thihna ata ka chhanchhuak dâwn em ni? Aw thihna, i hripuite chu khawiah nge? Aw Seol, i tihchhiatna chu khawiah nge? Ka khawngaih dâwn hauh lo, Sim mah se, ka bengkhawn lo vang.

¹⁵A unaute zînga a hmuingîl ber ni mah se, Khawchhak thli a lo thawk ang a, Thlalêr aṭanga LALPA thaw ngei chu a lo kal mêk a ni; A tuihna te chu a kang ang a, A tuikhur te chu a ro zo vang; Bungbêl ṭha zawng zawng, a ro chu a tichhe vek ang.

¹⁶Samaria a ṭiau vang, A Pathian chungah a hel si a; Khandaiha tihtlûkin an awm ang a, An nausênte chu paih sawm an ni ang a, An hmeichhia, nau pai laite chu tai thlêr an ni ang.