Read Mizo_Old_version Hosea 2 Bible Online

Hosea 2 - Mizo_Old_version bible

Hosea 2

¹In unaupate hnênah chuan, “Ammia,” ti ula, in farnute hnênah chuan, “Ruhamai,” ti rawh u.

²“In nu hi bei rawh u, bei rawh u; Ani hi ka nupui a ni si lo va, Kei pawh a pasal ka ni lo! A hmêl ata a nawhchizawrh chîn hi paih thla sela, A ṭânglai ata a uire chîn hi paih thla rawh se;

³Chuti lo chuan, ka tisaruak ang a, A pian nia a awm angin ka awmtîr ang a, Thlalêr angin ka siam ang a, Ram ro angin ka awmtîr ang a, Tuihâlin ka tihlum ang.

⁴A fate pawh ka lainat lo vang, Nawhchizuar fate an ni si a.

⁵An nu chuan nawhchi a zuar ṭhîn a, Anmahni paitu chu zahpuiawm takin a awm. ‘Ka chaw te, ka tui te, ka sahmul te, Ka la te, ka hriak te leh ka in tûr te mi petu, Ka ngaihzâwngte ka ûm ang,’ a ti a ni.

⁶Chuvângin, ngai teh, i kawng chu hlîngin ka ping ang a, Amah dâlin dai ka theu vang a, A kawngte a hmu lo vang.

⁷Tin, a ngaihzâwngte chu a ûm ang a, a ûm phâk lo vang; Anmahni a zawng ang a, a hmu lo vang; Tichuan, ‘Ka pasal hmasa hnênah ka kîr teh ang, Tûn ai hian hmân kha ka tân a ṭha zâwk si,’ a ti ang.

⁸Buh te, uain thar te, hriak te, Tangkarua ka tihpunsak te hi, Rangkachak, Baala tâna an hman te nên, Keima pêk a ni tih a hre si lo.

⁹Chuvângin, ka buh chu a seng hunah, Ka uain pawh chu a sâwr hunah ka la kîr leh ang, Ka sahmul leh ka la, a saruak khuhna tûr chu ka lâksak ang.

¹⁰Chutichuan, a ngaihzâwngte mit hmuhah A saruak zahmawh ka tilang ang, Ka kut ata tu mân an chhanchhuak lo vang.

¹¹A hlimna zawng zawng, a kût te, a thla thar te, A Chawlhnite leh a puipun hun zawng zawngte Ka tireh bawk ang.

¹²A grêp hrui leh a theipui kûng, ‘Hêng hi ka ngaihzâwngte pêk ka hlawh chu a ni,’ A tih ṭhinate chu ka tiram ang. Ramhnuaiah ka siam ang a, ramsaten an ei ang.

¹³Rimtui a hâlsak ṭhin Baala nite chu a chungah ka thungrûl ang. Chûng lai chuan a bengbehte leh a incheimawinate a inbel a, A ngaihzâwngte a pan a, kei mi theihnghilh a ni,” Tih hi LALPA thuchhuak a ni.

¹⁴“Chuvângin, ngai teh, ka thlêm ang a, thlalêrah ka hruai ang a, Ngaihawm takin amah ka bia ang.

¹⁵Tin, chuta chinah chuan a grêp huante chu a hnênah ka pe ang, Akor ruam pawh beiseina kawngka atân; Chutah chuan a tleirâwl lai nite leh Aigupta ram aṭanga a lo chhuah ni ang khân A chhâng ang.”

¹⁶ LALPA thuchhuak chuan heti hian a ti: “Chumi niah chuan heti hi a ni ang, ‘Ishi’ mi ti ang a, ‘Baali’ mi ti tawh lo vang.

¹⁷A ka ata Baala hmingte hi ka tihbosak dâwn si a, An hming hi lam a ni rêng rêng tawh lo vang.

¹⁸Chumi niah chuan ramsate, chunglêng savate, Leia rannungte nêna thuthlung an tân ka siam ang a; Thal ngul te, khandaih te, indona te hi, Lei ata ka tiboral ang a, him takin ka awm hotîr ang.

¹⁹Kumkhuain ka tân ka hual tlat ang che; Felna te, rorêlna te, khawngaihna te, lainatna tein, Ka tân ka hual ang che;

²⁰Rinawmnain ka tân ka hual ang che; Tichuan, LALPA chu in hre tawh ang.

²¹Chumi niah chuan heti hi a ni ang a, Ka bia ang,” LALPA thuchhuak chuan a ti. “Vânte ka bia ang a; tin, annin lei an bia ang a;

²²Tin, lei chuan buh te, uain thar te, hriak te a bia ang; Tin, annin Jezreel an bia ang.

²³Tin, ani chu ka tân leiah ka chîng ang a; Lainatdawnglovi chu ka lainat ang a, Kaminilova chu, ‘Ka mi i ni,’ ka ti ang a, Tin, anin, ‘Ka Pathian i ni!’ a ti ang.”