Read Mizo_Old_version Hosea 4 Bible Online

Hosea 4 - Mizo_Old_version bible

Hosea 4

¹Israela thlahte u, LALPA thu chu ngaithla teh u; LALPA chuan ram luahtute beihna tûr a nei si a: “He ramah hian thutak leh khawngaihna leh Pathian hriatna a awm lo ve.

²Chhechham te, inbum te, inthah te, rûkrûk te, Uirê chîn te a punlun a, thisen a inphaman reng a ni.

³Chuvângin, ram chuan a sûn ang a, A chhûnga chêng tinrêng an chau vang, Ramsate, chunglêng savate nên; A ni, tuifinriata sanghate chenin lâk bo an ni ang.

⁴Amaherawhchu, tu mah inbei suh sela, Tu mah inzilhhau hek suh se; I mite chu puithiam beitute ang an ni si a.

⁵Chhûnah i tlu ang a, nangmah nên zâwlnei pawh zânah a tlu ang a; I nu pawh ka tiboral ang.

⁶Ka mite chu hriatna tlâkchham avângin tihboral an ni a, Hriatna i hnar avângin kei pawhin ka puithiam i nihna ata ka hnar tawh ang che. I Pathian dân i theihnghilh vei a, Kei pawh hian i fate ka theihnghilh ve ang.

⁷An pun poh leh ka chungah an sual tulh tulh vei a, An ropuina chu mualphonaah ka chantîr ang.

⁸Ka mite sualna azârah an intihausa a, An khawlohnaah chuan an thinlung an nghat a,

⁹A mipui a puithiamin angkhata hrem an ni ang a, An kawngte avâng chuan anmahni ka hrem ang a, An thiltihte ka thungrûl ang.

¹⁰An ei tak nâng a, an tlai si lo vang; Nawhchizawrh an chîng nâng a, an pung lo vang, LALPA pawisakna an neih loh avângin.

¹¹Nawhchizawrh te, uain te, uain tharte chuan Thinlung a la bo ṭhîn.

¹²Ka mite chuan an thing milimte an râwn a, An tiang chuan a hrilh ṭhîn; Nawhchizawrhna rilru chuan a hruai bo va, An Pathian lak ata an hur bo ta si a.

¹³Tlâng chhîpahte chuan an inthawi a, Mualahte chuan rimtui an hâl a, Sasua leh beraw leh hlai hnuaiahte chuan - A hlim a nawm avângin; Chuvângin, in fanute chuan nawhchizawrh an chîng a. In famote chuan uire an chîng a ni.

¹⁴In fanuten nawhchi an zawrha, In famote an uirein ka hrem lo vang: Anmahni ngei pawh nawhchizuarte nên an kal hrang a, Maichâm nawhchizuarte nên an inthawi ho si a; Hre thiam lo mipuite chu an tluchhia ang.

¹⁵Aw Israel, nang chuan nawhchizawrh chîng ta mah la, Juda zawngin chîng ve lul suh se. Gilgal-ah lo kal suh ula, Beth-aven-ah chho hek suh ula, ‘LALPA a nun chhûng chu,’ tiin chhia chham hek suh u.

¹⁶Bâwngla luhlul ang maiin Israel-ho chu an luhlul a; Tûnah chuan LALPAN berâmno angin phûlah a châwm thei ang em ni?

¹⁷Ephraima chuan milem a zawmpui ta a, A awm awmin awm rawh se.

¹⁸An zu in chu an ṭiak a, an inphalrai ta ṭhîn a; A rorêltute chuan thil zahpuiawm tih an ngaina êm êm a ni.

¹⁹Thliin a lâk hunah an inthawinate avângin an la zak ang.