Read Mizo_Old_version Hosea 5 Bible Online

Hosea 5 - Mizo_Old_version bible

Hosea 5

¹“Aw nangni puithiamte u, hei hi hria ula, Nangni Israel chhûngte u, ngaithla ula, Aw lalber chhûngte u, beng chhi rawh u! Rorêlna chu in tân a ni si a; Mizpa-a thang leh Tabor tlânga lên zâr in nih avângin.

²Mi helte chuan tihhlum an uar êm êm a, Kei erawh chu an vaia zilhhautu ka ni.

³Ephraima ka hria a, Israel chu ka lakah thup a ni lo; Tûnah hian aw Ephraim, nawhchizawrh i chîn avângin Israel chu tihbawrhbân a ni.

⁴An Pathian lama hawi kîr tûrin An thiltih ṭhinte chu an bânsan lo va, Nawhchizawrh rilru an zîngah a awm si a, LALPA chu an hre lo a ni.

⁵Israel chhuantawlawl chuan a hmaichhanah a hriattîr a, Chutichuan, Israel leh Ephraim chu an khawlohnaah an tlu ang a, Juda pawh an hnênah a tlu ve ang.

⁶An berâm rualte leh an sebâwng rualte nên LALPA zawng tûrin an kal ang a; Nimahsela, ani chu an hmu lo vang; An lak aṭangin a inla fihlîm tawh a ni,

⁷ LALPA chungah vervêk takin an ti a ni, Hnam dang fate an hring si a. Thla thar chuan an lote nên lama boralna a thlen ang.

⁸Gibea khuaah tawtawrâwt tum ula, Rama khuaah berâmpa ki hâm rawh u; Beth-aven-ah au tuar tuar rawh u, ‘Aw Benjamin, i hnung lam kha!’ tiin.

⁹Ephraim chu hremna niah chuan tihṭiau a ni ang; Thil lo ni ngei tûr chu Israel chite zîngah ka hriattîr tawh a ni.

¹⁰Juda mi liante chu ramri sawntute ang an ni a: An chungah ka thinurna chu tuiangin ka leih bua ang.

¹¹Ephraim chuan rah beh a chîng a, Dikna a palzût a, engmahlo a ûm ruai a.

¹²Chuvângin, Ephraim tân chuan sûlrûl ang ka ni a, Juda chhûngkaw tân chuan mawihna ang ka ni.

¹³Ephraim chuan a natna a hmu a, Juda chuan a hliam a hmu a. Tah chuan Ephraim chu Assuria hnênah a kal a, Lalber Jareba hnênah chuan mi a tîr a; Nimahsela, ani chuan a tidam thei lo che u a, In hliam chu a tihdamsak thei hek lo che u.

¹⁴Ephraim tân chuan sakeibaknei ang, Juda tân chuan sakeibaknei vânglai ang ka ni dâwn si a; Keimah, keimah ngeiin ka hai thlêr ang a, Ka kal ang a, ka kal bopui ang a, Chhanchhuaktu tu mah an awm lo vang.

¹⁵An thiam lohna an inhriat hun hunah ka hmunah ka kîr ang a; Tichuan, ka hmêl an zawng ang a, An tuarnaah chuan min zawng ruai ruai dâwn a ni.”