Read Mizo_Old_version Hosea 6 Bible Online

Hosea 6 - Mizo_Old_version bible

Hosea 6

¹“Hawh u, LALPA hnênah i kîr ang u; Min lo pawt sawm tawh na a, min tidam leh dâwn si a; Min lo vaw tawh na a, min tuam leh dâwn si a.

²Ni hnih chinah min tinung ang a; Ni thum niah min kaitho vang a, a hmaah kan awm ang.

³ LALPA hriatna chu i ûm zêl ang khai, i hria ang u; Zîng anga khêl lovin a thawk chhuak ngei ṭhîn a ni: Kan hnênah ruah angin, ruah hnuhnûng, lei tihuhtu ang maiin a lo thleng ang.”

⁴“Aw Ephraim, engtin nge ka tih ang che? Aw Juda, engtin nge ka tih ang che? Min hmangaihna chu zîng ṭiauchhûm leh dai ral ta thuai ṭhîn ang hi a ni si a.

⁵Chuvângin, zâwlneite hmangin anmahni ka râwt a, Ka kâa thutein anmahni ka tihlum a ni; I chunga ka rorêlnate chu i tân kâwlphe êng zuai zuai ang a ni.

⁶Inthawina duh lovin khawngaihna ka duh si a; Hâlral thilhlante ai chuan Pathian hriatna ka duh zâwk a ni.

⁷Nimahsela, Adama angin thuthlung chu an bawhchhia a, Chutah chuan vervêk takin ka chungah an ti a ni.

⁸Gilead chu khawlohna titute khawpui a ni a, Thisen a kai pheng phung a ni.

⁹Suam hmang rualin mi an châng ṭhîn angin, Puithiam pâwlte chuan Sekem kawngah mi an that ṭhîn; A ni, thil sual an ti ta a ni.

¹⁰Israela chhûngkuaah chuan thil râpthlâk tak ka hmu, Ephraim-ah chuan nawhchizawrhna a awm a, Israel chu a bawrhbâng a ni.

¹¹Ka mite chu an sal tânna ata ka hruai kîr hunah chuan, Aw Juda, i tân pawh rah seng tûr ruat a ni.