Read Mizo_Old_version Hosea 9 Bible Online

Hosea 9 - Mizo_Old_version bible

Hosea 9

¹Aw Israel, hnam dangte angin hlim so bûng bûng khawpin lâwm suh; I Pathian chu nawhchi i zawrhsan a, Hruih zâwl tina a man chu i ngaina si a.

²Hruih leh grêp sâwrna khurte chuan anmahni a titlai lo vang a, Uain thar tûr a hlawhchham ang.

³ LALPA ramah chuan an chêng lo vang a, Ephraim chu Aigupta lamah a kîr zâwk ang a, Assuria ramah chaw thiang lo an ei ang.

⁴ LALPA hnênah uain chu an bun chhuak lo vang a, An thilhlante chu a tân lâwmawm a ni hek lo vang; An chhang chu lusûnte chaw ang a ni ang a, A ei apiang an bawrhbâng ang; An chhang chu an nunna atân mai a ni ang a, LALPA inah a lo lût lo vang.

⁵Inkhâwmpui urhsûn niah leh LALPA kût niah chuan Eng nge in tih tâk ang le?

⁶Ngai teh u, chhiatna a lo thleng ang a, an darh ang a, Aigupta chuan anni chu a lo khâwm zâwk ang a, Memphis chuan a lo phûm ang. An tangkaraw thil duhawmte chu kângṭhaiin a bâwm ang a, An puan inahte chuan hnimhlîngnei a awm ang.

⁷Hremna nite chu a lo thleng a, Thungrulhna nite chu a lo thleng e; Israel chuan chu chu a hria ang! I khawlohna chu a tamin intaina chu a nasat avângin, Zâwlnei chu a â a, thlarau nei mi chu mi â a ni.

⁸Ephraim râlvêngtu chu ka Pathian hnêna awm a ni a; Zâwlnei lah chu a kawng tluanin thangkamtu thang a awm a, A Pathian inah pawh intaina a awm.

⁹Gibea khuaa awm lai nite ang khân Nasa takin anmahni an intikhawlo va. An khawlohna chu a hre reng ang a, An sualnate chu a thungrûl ang.

¹⁰Israel chu thlalêra grêp rah ang maiin ka hmu a. In pate chu theipui, hun hmasaa a hmin hmasa angin ka hmu; Mahse, anni chu Baal-peor hmunah an lo kal a, Thil zahthlâk takah chuan an inpumpêk ta a, An ngainat tak milemte ang bawk chuan an tenawm a ni.

¹¹Ephraim lah chu, an ropuina chu sava angin a thlâwk bo vang a: Nau hring te, nau pai te, rai te an awm lo vang.

¹²An fate puitlin mah sela mipa rêng rêng awm lo tûrin Ka sûntîr tho vang. A ni, anmahni ka hawisan hunah chuan An chung a va pik zual dâwn êm!

¹³Tura ka hmuh ang bawkin Ephraima chu hmun nuam taka dahin a awm a: Mahse, Ephraima chuan a fate chu thattu hnênah a la hruai chhuak ang.

¹⁴Aw LALPA, neihtîr rawh: Eng nge i neihtîr ang le? Chhûl nau chhiat ṭhîn leh hnute vuaite chu neihtîr ang che.

¹⁵An suahsualna zawng zawng chu Gilgal-ah an ti ṭan a, Chutah chuan anni chu ka haw si a. An thiltih suaksual avângte chuan ka in ata ka hnawt chhuak ang; Anniho hi ka hmangaih tawh lo vang. An hotu zawng zawngte chu hel hmang an ni.

¹⁶Ephraim chu vuakin a awm a, an zung chu a ro zo va; Rah an chhuah lo vang. A ni, chhuah mah sela, an chhûl rah duhawm tak chu Ka that tho tho vang.

¹⁷Ka Pathian chuan anni chu a paih bo vang, Amah an bengkhawn loh avângin; Tichuan, hnam dangte zînga vâkvaiin an awm ang.