Read Mizo_Old_version Joela 1 Bible Online

Joela 1 - Mizo_Old_version bible

Joela 1

¹Pethuela fapa Joela hnêna LALPA thu lo thleng chu.

²Putarte u, hei hi hre rawh u, he rama awm zawng zawngte u, beng chhi rawh u. Hei hi in hun lai leh in pute hun lai pawhin a awm tawh ngai em ni?

³Chu chu in fate hrilh ula, in fate chuan an fate hrilh sela, an fa lehte chuan chhuan dang hrilh zêl rawh se.

⁴Thingngêt pangangin a ei bân apiang chu khaukhuapin a ei a; khaukhuapin a ei bân apiang chu thingngêtin a ei a, thingngêtin a ei bân apiang chu pangangin a ei zo va.

⁵Ruite u, harh ula, ṭap rawh u; uain in zawng zawngte u, a uain thlum avâng chuan chiau vak vak rawh u; in kâ ata lâk bo a ni tawh si a.

⁶Hnam chak tak, chhiar sên loh ka ramah an lo chhuak ta si a, an ha chu sakeibaknei ha ang a ni a, sakeibaknei lian tak hapui ang an nei bawk a.

⁷Ka grêp hrui a tichhia a, ka theipui thing pil a hîk a; a hîk fai vek a, a paih bo va; a ṭangte chu a filh vâr vek a.

⁸Nulain saiip puan fênga a ṭhat lai pasal a sûn angin ṭap vak rawh u.

⁹Chhangphut hlan te, in tûr hlante chu LALPA in ata tihbo a ni a; puithiam, LALPA rawngbâwltute chu an lungngai a.

¹⁰Lo chu tihchhiat a ni a, ram chu a lungngai a; buh chu tihchhiat a ni a, uain thar chu a kang a, hriak chu a chau va.

¹¹Aw, nangni lo neitute u, zak ula; aw nangni, grêp hrui enkawltute u, buh leh buhsanghar avângin chiau vak vak rawh u; lova buh seng tûr chu a boral ta si a.

¹²Grêp hrui chu a vuai a, theipui kûng chu a chau va; pawmgranet thei kûng te, tûm te leh apple thei kûng te, lova thing zawng zawngte pawh chu a chuai ta a; mihring fate zînga lâwmna chu a vuai ral ta si a.

¹³Nangni puithiamte u, saiip puan veng ula, ṭap rawh u; nangni, maichâm rawngbâwltute u, chiau vak vak rawh u; nangni ka Pathian rawngbâwltute u, lo kal ula, saiip puan sinin zankhuain mu rawh u; in Pathian in aṭang chuan chhangphut hlan leh in tûr hlan chu khap a ni si a.

¹⁴Chaw nghei hun serh thianghlim ula, inkhâwmpui urhsûn siam ula, LALPA in Pathian inah chuan putarte leh he rama chêng zawng zawngte chu hruai khâwm ula, LALPA chu au rawh u.

¹⁵Chu ni chu a chung a pik e! LALPA ni chu a hnai si a, Engkimtitheia laka boralna a lo thleng ang.

¹⁶Kan mit hmuhah ei tûr tihbo a ni lo vem ni, a ni, kan hlimna leh kan lâwmna chu kan Pathian in ata tihbo a ni lo vem ni?

¹⁷Chite chu lei tlang hnuaiahte chuan a ṭawih a, zêmte chu a ram a; buh inte chu ṭhiatin a awm a, a buh a vuai ta si a.

¹⁸Rante chu an va rûm nasa êm! Bâwng rualte chu an mangang a, hlobet hring hmun an neih loh avângin; a ni, berâm rualte chu an ṭiau va.

¹⁹Aw, LALPA, ka au va che; mei chuan thlalêr ram hlobet hmun chu a kâng fai ta a, meialh chuan ram thing zawng zawng chu a kâng fai ta si a.

²⁰A ni, ramsate chu nangmah ngaiin an thaw huam huam a; luitête chu a kangchat a, mei chuan thlalêr ram hlobet hmun chu a kâng fai ta si a.