Read Mizo_Old_version Joela 2 Bible Online

Joela 2 - Mizo_Old_version bible

Joela 2

¹Zion-ah chuan tawtawrâwt hâm ula, ka tlâng thianghlimah chuan inrâlrinna puang rawh! He ram chhûnga mi zawng zawngte chu khûr rawh se; LALPA ni chu a lo thleng dâwn a, a hnai tawh hle si a:

²thimna leh khaw durna ni, chhûm zîng leh thim chhah mup thlenna ni a ni ang a. Khawfîngchatin tlângte a tuam angin mi hrâng rual tam tak, la hmuh ngai loh, eng tik maha hmuh leh tawh ngai loh tûr an lo thawk ang.

³An hma lam leh hnung lam chu a kâng fai zêl a; an hmabâk ram chu Eden huan ang ni mah se an pelh hnu chuan thlalêr ram ro a ni zêl, eng mah zuah an nei lo.

⁴An lan dân chu sakawr lan dân ang a ni; sakawr chuang mi angin an tlân a.

⁵Indona tawlailîr ri angin tlâng chungah an kai ri sup sup a, pâwl kâng alh hluah hluah ang leh indonaa mipui chak tak inpeih sa angin.

⁶An hmaah mipuite chu an thlaphâng a; an hmêlte chu a lo dâng vek a.

⁷Mi chak tak angin an tlân a, indo mi angin bangah an lâwn a; mahni zâwn ṭheuhvah an kal a, an tlar dân an tibuai lo.

⁸An innêk lo va, mahni kawngah an kal ṭheuh va; hriamhreite an su tlang a, an kal pêng lo.

⁹Khawpui chungah an zuang a; kulh chungah an tlân a; in chhûngahte an lâwn chho va, rûkru angin tukverhahte an lût a.

¹⁰An hmaah lei a khûr a, vânte a nghîng a; ni leh thla chu a thim a, arsiten an êng an thup a.

¹¹LALPA chuan a sipai rualte hmaah a aw a chhuah a; a riahbûkte chu a ropui hle si a; a thu hlentu a chak si a; LALPA ni chu a ropuiin a râpthlâk êm êm si a; tuin nge tuar thei ang?

¹² LALPA chuan, “Chuti chung pawhin tûnah in thinlung zawng zawngin, chaw ngheiin, ṭapin, lungngaiin ka lam lo hawi rawh u,” a ti.

¹³In puan ni lovin in thinlung thlêr ula, LALPA in Pathian lam chu hawi rawh u; ani chu khawngaih thei tak leh lainatnaa khat, thinnel leh ngilneihna ngah, chhiatna thlentîr lo tûra inlamlêt ṭhîn a ni si.

¹⁴LALPA in Pathian hnênah chhangphut hlan leh in tûr hlanahte pawh chuan a kîrin, rilru inlamlêtin, malsâwmna hnutchhiahin a awm lo vang tih tuin nge hria?

¹⁵Zion-ah chuan tawtawrâwt hâm ula, chaw nghei hun serh thianghlim ula, inkhâwmpui urhsûn tak ko rawh u;

¹⁶mipui khâwm ula, inkhâwmho chu tithianghlim ula, putarte, naupangte, hnute hne laite khâwm ula; mo neitu chu a pindan aṭangin lo chhuak sela, mo pawh a pindan chhûngril ata lo chhuak rawh se.

¹⁷Puithiam, LALPA rawngbâwltute chu hulhliap leh maichâm inkârah chuan ṭap sela, “Aw LALPA, i mite zuah la, i rochante hi sawichhiata awm hnamten an chunga ro an rêlsak tûrin pe suh. ‘An Pathian chu khawiah nge a awm tâk?’ tiin an mipuite zîngah chuan engah nge an tih ang?” ti rawh se.

¹⁸Tichuan, LALPA chuan a ram tan thahnem a ngai a, a mite chu a khawngaih a.

¹⁹LALPA chuan a mite hnênah, “Ngai ula, in hnênah buh te, uain te, hriak te ka rawn thlen ang a, chûng chuan in tlai ang a; hnamte zîngah chuan sawichhiatin ka awmtîr tawh hauh lo vang che u.

²⁰Amaherawhchu, in hnên ata hmâr lam aṭanga lo kal mi hrâng rual chu ka ûm bo vek ang a, ram ro leh ṭiauvah ka kal botîr ang, a hmasa pâwl chhak lam tuipuiah, a hnuhnûng pâwl thlang lam tuifinriatah; a lo uih chhuak ang a, rimchhe takin a lo nam ang, thil râpthlâk tak a tih tâk avângin,” tiin a chhâng a.

²¹Aw, ram, hlau suh la; hlimin lâwm rawh, LALPA chuan thil ropui takte a ti ta si a!

²²Ramsate u, hlau suh u; thlalêr hlobet hmun a lo chawr a, thing chu a lo rah a, theipui kûng leh grêp hruite chu a lo duah si a.

²³Nangni, Zion fate u, lâwm rawh u, LALPA in Pathianah chuan hlim rawh u; ruah hmasa chu tâwk chiahin a pe si che u a, in tân ruah a sûrtîr a, thla khatnaa ruah hmasa leh ruah hnuhnûng chu.

²⁴Hruihte chu buhin a khat ang a, uain leh hriak khurte chu a khat liam ang a.

²⁵“In zînga ka sipai rual tam tak ka tirh, khaukhuap te, thingngêt te, pangang te, thingngêt pangangten an ei zawh kumte kha ka rûl leh ang che u.

²⁶Tam tak in ei ang a, in tlai ang a, mak taka ngaihtuah ṭhîntu che u LALPA in Pathian hming chu in fak ang; ka mite chu an mualpho ngai rêng rêng lo vang.

²⁷Tin, Israel-te zîngah ka awm tih leh, LALPA in Pathian ka ni a, tu mah dang an awm lo tih in hria ang. Ka mite chu an mualpho ngai reng reng lo vang.

²⁸“Chumi hnuah chuan heti hi a ni ang a, mi zawng zawng chungah ka thlarau ka leih ang a; in fapate, in fanuten ka thu an hril ang a, in putarten mumangah an mang ang a, in tlangvâlten inlârnate an hmu ang.

²⁹Chûng niahte chuan ka bawihpate, ka bawihnute chungah pawh ka thlarau ka leih ang.

³⁰Vânah leh leiah thil makte ka hmuhtîr ang a, thisen te, mei te, meikhu ding te nên.

³¹Ni thimah a chang ang a, thla thisenah a chang ang, LALPA ni ropui tak leh râpthlâk tak chu a lo thlen hmain.

³²Tin, heti hi a ni ang a, tu pawh LALPA hming lam apiang chu chhanhim an ni ang. LALPAN a sawi ang khân, tlân chhuakte chu Zion tlângah leh Jerusalem khuaah an awm ang a, a la awm chhunte zîngah chuan LALPAN a kohte chu an awm ang.