Read Mizo_Old_version Joela 3 Bible Online

Joela 3 - Mizo_Old_version bible

Joela 3

¹“Ngai teh u, chûng niahte leh chumi hun, Juda leh Jerusalem tun din leh hunah chuan,

²hnam zawng zawng ka khâwm ang a, Jehosaphata ruamah ka hruai thla ang. Ka mi, ka ro chan Israel chunga an thiltih avângin an chung thu ka rêl ang; ram dangah ka mite an tidarh a, ka ram an ṭhen darh bawk si a.

³ṭhum vâwrin ka mite an insem a; naupangte chu a hmei a pain nawhchizuar leh uain lei nân an hralh a.

⁴Nangni Tura leh Sidon, nangni Philistia ramte u, ka chungah phuba lâk in tum em ni? Ka chunga phuba lâk in tum a nih zawngin rang takin in chungah phuba ka la lêt ve ang.

⁵Ka tangkarua leh ka rangkachak in la a, ka thil ṭha tak duhawmte in biak in chhûngahte in keng lût ta vei a.

⁶Juda fate leh Jerusalem fate pawh an ramri aṭanga hla takah in sawn bo theih nân, Grik fapate hnênah in hralh ta mai si a.

⁷Ngai teh u, in hralhna hmun aṭang khân chawk thovin ka chhuahtîr ang a, in thungrulhna chu in lu chung ngeiah ka thungrûl ve ang.

⁸In fapate, in fanute chu Juda fate kutah ka hralh ang, anni chuan hla takah Seba mite hnênah anmahni an hralh ang a; LALPA chuan a ti ta a ni.”

⁹Hei hi hnamte zîngah puang ula: “Indona buatsaih ula! Mi chakte chawk tho ula; indo mi zawng zawngte lo hnai sela, lo chho rawh se.

¹⁰In leilehna hmâwr zumte chu khandaihah chher ula, in thei kûng ah chhumna chemtête chu feiah chher rawh u; mi chak lo pawhin, ‘Ka chak a ni,’ ti rawh se.

¹¹A vêla hnam zawng zawngte u, hmanhmawh ula, lo kal ula, pung khâwm rawh u. Aw, LALPA, chutah chuan i mi chak takte kal chhuktîr rawh.

¹²Hnamte chu inchawk tho sela, Jehosaphata ruamah chuan lo kal chho rawh se; chutah chuan a vêla hnam zawng zawng chunga rorêl tûrin ka ṭhu dâwn a ni.

¹³An sual êm mai a, buh seng angin ât ula, a khah hma chu a khura grêp rah sâwr angin rap sâwr rawh u.

¹⁴Mi sâng tam takte chu Jehosaphata ruamah an awm khâwm ta; chutah chuan a ni LALPA ni a lo thlen dâwn.

¹⁵Ni leh thlate an thim a, arsiten an êng an thup a. Pathianin a mite mal a sâwm ang.

¹⁶Tin, LALPA chu Zion tlâng aṭangin a rûm hum hum ang a, Jerusalem khua aṭangin a aw a chhuah ang a; vânte leh lei an nghîng ang a; nimahsela, LALPA chu a mite tân inhumhimna a ni ang a, Israela thlahte tân kulhbîng a ni ang.

¹⁷Chutichuan, LALPA in Pathian, ka tlâng thianghlim Zion-a chêng ka ni tih in hria ang. Tichuan, Jerusalem khua chu a thianghlim ang a, mikhual tu mah an kal tlang leh tawh hauh lo vang.”

¹⁸“Chumi niah chuan heti hi a ni ang a, tlâng sângte chuan uain thlum a fartîr ang a, tlângte chu hnutetuiin a luang ang a, Judai ram luitê zawng zawng chu tuiin a luang ang a; LALPA in aṭangin tuikhur a lo chik chhuak ang a, Sitim kawr ruam a tihnâwng ang.

¹⁹Juda fate chunga râwng taka tia an ramah mi thiam thisen an chhuah avângin, Aigupta ram chu a ram ang a, Edom ram chu thlalêr ram ro a ni ang.

²⁰Judai ram erawh chu kumkhuain a awm reng ang a, Jerusalem khua pawh an luah reng tawh ang.

²¹Tin, an thisen ka tlen fai loh chu ka tlêng fai ang; LALPA chu Zion-ah a chêng reng si a.”