Read Mizo_Old_version Amosa 1 Bible Online

Amosa 1 - Mizo_Old_version bible

Amosa 1

¹Juda lal Uzia lal lai leh Israel lal Joasa fapa Jeroboama lal laiin, lîrnghîn hma kum hnihah khânin, Tekoa-ah ran rual vêngtute zînga mi Amosa thu, Israel chungchâng a hmuh chu.

²Tin, ani chuan, “LALPA chu Zion tlâng aṭangin a rûm hum hum ang a, Jerusalem khua aṭangin a aw a chhuah ang a; berâm vêngtute ran tlatna hmunte chu an lungngai ang a, Karmel tlâng chhîp chu a vuai ang,” a ti a.

³ LALPAN heti hian a ti: “Damaska khaw bawhchhiatna pathum avângin, a ni, pali avângin, a hremna chu ka tireh lo vang; Gilead ram chu buh râwtna thîrte chuan an râwt avângin.

⁴Nimahsela, Hazaela inah mei ka tîr ang a, Benhadada lal inte a kâng zo vang.

⁵Tin, Damaska khaw kawngkhâr thîr chu ka titliak ang a, Aven ruam ata a luahtute leh Eden in ata lal tiang kengtu chu ka tibo vang a; tin, Suria ram mite chu Kir ramah salah an awm ang,” LALPAN a ti a.

⁶ LALPA chuan heti hian a ti: “Gaza khaw bawhchhiatna pathum avângin, a ni, pali avângin, a hremna chu ka tireh lo vang; Edom hnêna pêk tûrin mi zawng zawng sala an hruai avângin.

⁷Nimahsela, Gaza khaw kulh chungah mei ka tîr ang a, a lal inte chu a kâng zo vang.

⁸Tin, Asdod khua ata a luahtu leh Askelon khua ata lal tiang kengtu ka tiboral ang a; tin, Ekron khaw chungah ka kut ka lek ang a; tin, Philistia mi la awmte chu an boral ang,” Lalpa PATHIAN chuan a ti.

⁹ LALPAN heti hian a ti: “Tura khaw bawhchhiatna pathum avângin, a ni, pali avângin, a hremna chu ka tireh lo vang; Edom hnênah mi zawng zawng chu an pêka, inunauna thu an thlun chu an hriat reng loh avângin.

¹⁰Nimahsela, Tura khaw kulh chungah mei ka tîr ang a, a lal inte chu a kâng zo vang,” a ti a.

¹¹ LALPAN heti hian a ti: “Edom bawhchhiatna pathum avângin, a ni, pali avângin, a hremna chu ka tireh lo vang; a unau chu khandaihin a ûma, a khawngaihna zawng zawng a paih bova, a thinurna chuan a pawh thlêr fo ṭhina, kumkhuain a thinrimna chu a vawn reng avângin.

¹²Nimahsela, Teman hmun chungah mei ka tîr ang a, Bozra khaw lal inte chu a kâng zo vang,” a ti a.

¹³ LALPAN heti hian a ti: “Amon fate bawhchhiatna pathum avângin, a ni, pali avângin, a hremna chu ka tireh lo vang; an ram an tihzau theih nân Gilead khaw hmeichhe nau paite an tai thlêr avângin.

¹⁴Nimahsela, Raba khaw kulh chungah mei ka chhêm alh ang a; tin, indo nia au nên, ṭhâwngaleivir nia thlipui nên, a lal inte chu a kâng zo vang;

¹⁵an lal chu salah an man ang a, a mi liante nên a rualin,” LALPA chuan a ti.