Read Mizo_Old_version Amosa 2 Bible Online

Amosa 2 - Mizo_Old_version bible

Amosa 2

¹ LALPAN heti hian a ti: “Moab bawhchhiatna pathum avângin, a ni, pali avângin, a hremna chu ka tireh lo vang; Edom lal ruhte chu chinai ang hiala a hâl avângin.

²Nimahsela, Moab chungah mei ka tîr ang a, Kerioth khaw lal inte a kâng zo vang a; tin, Moab chu buai leh au leh tawtawrâwt riin a thi ang.

³Chumi zîng ata rorêltu chu ka tibo vang a, a mi liante zawng zawng chu, amah nên ka that ang,” LALPA chuan a ti.

⁴ LALPA chuan heti hian a ti: “Juda bawhchhiatna pathum avângin, a ni, pali avângin, a hremna chu ka tireh lo vang; LALPA dân chu an hnara, a thupêkte an vawn lohva, an pate biak ṭhin pathian lemte khân a hruai bo avângin.

⁵Nimahsela, Juda chungah mei ka tîr ang a, Jerusalem khaw lal inte chu a kâng zo vang.”

⁶ LALPA chuan heti hian a ti: “Israel bawhchhiatna pathum avângin, a ni, pali avângin, a hremna chu ka tireh lo vang; tangkaruaa mi fel an hralh avâng leh pheikhawk bun khata tlachham an hralh avângin.

⁷Mi retheite lu chunga vaivut takngial pawh an ît a, pachhiate an rûksak a, pa leh a fapa chuan nula pakhat an zen ṭâwm a, ka hming thianghlim an tibawlhhlawh a ni.

⁸Maichâm awmna apiangah puan dahkham chungah an mu ṭhîn a, an pathian inah chuan mi an chawitîr mante chuan uain an in ṭhîn a.

⁹“Nimahsela, anmahni hmaah Amor-ho, sidar thing anga sâng leh sasua anga chak pawh kha ka tiboral a; a chung lam ata a rah leh a hnuai lam ata a zung pawh ka tibo va.

¹⁰Tin, Amor-ho ram nei tûrin Aigupta ram aṭangin ka hruai chhuak che u a, thlalêrah kum sawmli chhûngin ka hruai che a.

¹¹Tin, zâwlnei ni tûrin in fapate zînga mi leh, Nazarit te ni tûrin in tlangvâlte zînga mi ka siam a. Aw, Israel fate u, chutiangin a ni lo vem ni?” LALPA thuchhuak chuan a ti.

¹²“Nimahsela, Nazarit mite hnênah uain in tûr in pe a, zâwlneite hnênah, ‘Thu hril suh u,’ tiin thu in pe a.

¹³Ngai teh u, buhphala khat tawlailîr chilh angin in hmunah ka nem ang che u.

¹⁴Tin, mi tlân chakte chakna a bo vang a, mi chakin tha a so thei hek lo vang a, mi chak tak pawh a inhum thei lo vang;

¹⁵thal ngul hmangtu pawh a ding thei hek lo vang a, kal chak thei mi pawh a inhum thei lo vang a, sakawr chung chuang mi pawh a inhum thei hek lo vang.

¹⁶Chumi niah chuan mi thiltithei tak zînga mi huaisen pawh chu saruakin a tlân bo vang,” LALPA thuchhuak chuan a ti.