Read Mizo_Old_version Amosa 4 Bible Online

Amosa 4 - Mizo_Old_version bible

Amosa 4

¹Nangni Samari tlânga chêng nuho, Basan sebâwng châwm thau angte u, retheite hnehchhiaha, tlachhamte nêka, pasalte hnêna, “Rawn la ula, i in ang u,” titute u, he thu hi hre rawh u.

²Lalpa PATHIAN chuan ama thianghlimna chhâlin chhia a chham a: “Ngai teh u, thîr kawmin a lâk bo che ua, in zînga awm chhun nghakuaiin a lâk bo che u ni a lo thleng ang.

³Tin, bang pawpahte in kal chhuak ang a, mi tin ngîl takin an kal ang; Harmon hmunah in inpaih ang,” LALPA thuchhuak chuan a ti.

⁴“Bethel-ah chuan lo kal ula, bawhchhe rawh u; Gilgal-ah chuan lo kal ula, bawhchhiatna tipung rawh u; tin, in inthawinate chu tûk tin rawn la ula, in sâwma pakhatte chu ni thum dan zêlah rawn la rawh u;

⁵tin, dawidim telh lâwm thu hrilh inthawina chu hlân ula, mahni duh zâwnga hlannate chu hril ula, puang rawh u; aw Israel fate u, hei hi in duh zâwng tak a ni si,” Lalpa PATHIAN chuan a ti a.

⁶“Tin, kei pawhin in khawpui zawng zawngahte ṭâmna leh in hmun zawng zawngahte tlâkchhamna ka pe che u a; chuti pawhin ka hnênah in lo kîr lo va,” LALPA thuchhuak chuan a ti.

⁷“Tin, buh lâk hun tûr thla thum a la nih laiin in chunga ruah sûr tûr pawh ka chelh a. Khawpui pakhat chunga ka sûrtîrin, khawpui dang chungah ka sûrtîr lo va. Hmun khat chungah a sûr ṭhîn a, a sûr lohna hmun chu a ro ṭhîn.

⁸Chutichuan, khawpui pahnih emaw, pathum emaw chu khawpui pakhatah tui in tûrin an vâk a, an khawp lo va; chuti pawhin ka hnênah in lo kîr lo,” LALPA thuchhuak chuan a ti.

⁹“Rona leh hmuarnain ka hrem che u a: in huante, in grêp huante, in theipui kûngte, in olive thingte zozai chu thingngêt pangang chuan a ei zo vek tawh a ni a; chuti pawhin ka hnênah in lo kîr lo,” LALPA thuchhuak chuan a ti.

¹⁰“Aigupta ram angin in zîngah hripui ka tîr a; khandaihin in tlangvâlte chu ka that tawh a, in sakawrte ka hruai bo tawh a ni; tin, in sipai hmun rimchhia chu in hnâra nam khawpin ka awmtîr a; chuti pawhin ka hnênah in lo kîr lo,” LALPA thuchhuak chuan a ti.

¹¹“Sodom leh Gomorra khua chu Pathianin a tihchim lai angin, in zîngah mi ṭhenkhat ka tichim a, thing kâng ul lâk chhuah ang in ni a; chuti pawhin ka hnênah in lo kîr lo,” LALPA thuchhuak chuan a ti.

¹²“Chuvângin, aw Israel, i chungah hetiang hian ka ti ang: i chungah hei hi ka tih dâwn avângin, aw Israel, i Pathian tâwk tûrin inpeih rawh.”

¹³Ngai teh, tlângte din chhuaka, thli siama, mihring hnênah chuan a ngaihtuahna eng nge ni tih sawi chhuahsaka, zîng chu tithima, lei hmun sângte chîltu chu a hming LALPA, sipaihote Pathian chu a ni si a.