Read Mizo_Old_version Amosa 5 Bible Online

Amosa 5 - Mizo_Old_version bible

Amosa 5

¹Aw, Israel chite u, he thu nangmahni sûn nâna ka sawi hi hre rawh u:

²nula thianghlim Israel chu a tlu tawh a; a ding leh tawh lo vang. A ram chungah paih thlâk a ni tawh a ni; amah tungding tûrin tu mah an awm lo.

³Lalpa PATHIAN chuan heti hian a ti si a: “Israel chite hnênah chuan, khawpui, sâng chhuahna khân za a hnutchhiah ang a, khawpui, za chhuahna khân sâwm a hnutchhiah ang.”

⁴ LALPA chuan Israel chite hnênah chuan heti hian a ti si a, “Mi zawng ula, in nung ang;

⁵nimahsela, Bethel khua zawng suh ula, Gilgal-ah lût hek suh ula, Beersheba khuaah kai suh u; Gilgal khua chu matheilovin salah an man dâwn si a, Bethel khua chu a lothlâwn ang.

⁶LALPA chu zawng ula, in nung ang; chuti lo chuan, Josefa inah mei angin a chhuak ang a, a kâng zo vang a, Bethel khuaah timit tûr tu mah an awm lo vang;

⁷rorêlna sai thinga chantîra, felna chu leia paih thlate u!”

⁸Siruk leh chhohreivûng siamtu leh, thihna daihlim zînga chantîrtu leh chhûn chu zân thima siamtu, tuifinriat tuite kova, lei chunga luantîrtu chu, amah chu zawng ulangin; a hming chu LALPA a ni;

⁹kulh chungah boralna lo thleng khawpa mi chakte chunga boralna thlentu chu.

¹⁰Kulh kawngkaa dik taka rorêltu chu an hua a, thu dik tak sawitu chu.

¹¹Chuvângin, mi retheite rap betin buh in lâk luihsak a, lung chher chuan inte in sa a; nimahsela, a chhûngah in chêng lo vang; grêp huan nuamte in siam a; nimahsela, a uain in in lo vang.

¹²In bawhchhiatnate tamzia leh in sualnate nasatzia ka hre si a; mi felte tiduhdaha, thamna laa, kulh kawngkaa tlachhamte chanpual ngei pawh pe phal lote u.

¹³Chutichuan, mi fing chu chutiang hunah chuan a ngawi reng a, hun ṭha lo a nih avângin.

¹⁴In nun theih nân ṭhat lohna zawng lovin, ṭhatna zawng ula; tin, in sawi angin LALPA, sipaihote Pathian chu in hnênah a awm ang.

¹⁵Sualna chu hua ula, ṭhatna ngaina ula, kawngkaah rorêlna chu tungding nghet rawh u. Josef-ho mi la awm chhunte chungah chuan LALPA, sipaihote Pathian chuan khawngaihna a nei dah law maw!

¹⁶Chuvângin, LALPA, sipaihote Pathian, Lalpa chuan heti hian a ti: “Kawtlai zau zawng zawngah ṭah vak vakna a awm ang a; kawtthlêr zawng zawngah, ‘A va pawi êm!’ an ti ang a; lungngai tûrin lo neitute leh ṭap vak vak tûrin sûn thiamte an ko vang.

¹⁷Tin, grêp huan zawng zawngah an ṭap vak vak ang, in zîngah ka kal tlang dâwn si a,” LALPAN a ti a.

¹⁸LALPA ni duhte u, in chung a pik e! Engati nge LALPA ni chu in duh? Eng ni lovin thim a ni zâwk e.

¹⁹Sakeibaknei kalsana savawm tâwk mi ang leh, ina lûta, bang chunga kut nghata, rûlin a chuk ang a ni.

²⁰LALPA ni chu êng ni lovin thim a ni dâwn lo vem ni? Thim chhah leh êng rêng rêng pawh nei lovin?

²¹“In kûtte ka huain ka hmusit a, in inkhâwmpui urhsûnahte chuan ka lâwm hek lo vang.

²²A ni, in hâlral thilhlan leh in buhhlan mi hlân mah ula ka pawm lo vang a, in ran thau remhlante pawh ka ngaihsak hek lo vang.

²³I ṭingṭang ri mawi chu ka ngaithla lo vang; chuvângin, ka lakah i hla bengchheng chu la bo rawh.

²⁴Nimahsela, rorêlna dik chu lui angin luang sela, felna chu luipui kang ngai lo angin luang rawh se.

²⁵Aw, Israela chhûnghote u, kum sawmli chhûngin thlalêrah khân inthawinate leh thilhlante ka hnênah in rawn la em ni?

²⁶A ni, in lalber Sikkuth leh in Kaiuan milimte, in arsi pathian, mahni tâna in siam chu, in la ang a.

²⁷Chutichuan, Damaska khaw piah lamah salah ka kaltîr ang che u,” sipaihote Lalpa PATHIAN chuan a ti.