Read Mizo_Old_version Amosa 6 Bible Online

Amosa 6 - Mizo_Old_version bible

Amosa 6

¹Zion tlânga nuam lutuka awmte leh, Samari tlânga him taka awmte leh hnam lian ber mi ropuite, an hnêna Israela chhûngho an kalnate chung chu a pik e!

²Kalne khuaah kal ula, en rawh u; tin, chuta ṭangin Hamath khaw ropuiah chuan kal ula; tin, Philistia ram Gath khuaah chuan kal chhuk ula. Hêng ramte ai hian an ṭha zâwk em? In ram aiin an ram a zau zâwk em?

³Nangni ni ṭha lo hla taka dah leh nunrâwng ṭhutna hnaihtîrte u,

⁴saingho khuma mua, an ṭhutthlêngsei chungahte zi mara, berâm rual zînga berâmnote leh sebâwng awmna zîng ata sebâwngtuaite eia,

⁵ṭingṭanga dâwngdahna hlate saa, Davida anga mahni tâna hla thlûk hmanruate siama,

⁶berhbu liana uain ina, hriak ṭha bera inhnawihte chu; nimahsela, Josef-ho hrehawmna avângin an lungngai lo.

⁷Chutichuan, tûna sala kal hmasate nên salah an kal ang a, zi marte hlim bûng bûngna chu a bo vang.

⁸LALPA, sipaihote Pathian chuan, Lalpa PATHIAN chuan amah leh amah inchhâlin chhia a chham a: “Jakoba chapona chu ka ten a, a lal inte ka hua a; chuvângin, khua leh a chhûnga awm zawng zawngte chu ka mantîr dâwn a ni.”

⁹Tin, heti hi a lo ni ang a, in pakhatah mi sâwm an la awm chuan an thi ang a.

¹⁰Tin, mi pakhat pami a hâltu ngei pawhin a la a, in chhûng ata a ruh la chhuak tûrin, in chhûngnung bera awm hnênah, “I hnênah tu pawh an la awm em?” a tiha, anin, “Awm lo,” a tih chuan, anin, “Ngawi tlat rawh; LALPA hming chu kan lam tûr a ni si lo va,” a ti ang a.

¹¹Ngai teh u, LALPA chuan thu a pe si a; tin, in lian chu a chim rem rum ang a, in tê pawh chu a khi chat rel rul ang a.

¹²Sakawrte chu lungpui chungah an tlân ang em ni? Chutah miin sebâwngin lei an let ang em ni? Nangnin rorêlna chu thihna hlovah leh felna chu sai thinga in chantîr hi,

¹³nangni thil thlâwn chunga lâwma, “Keimahni chaknain a ni lâwm ni kîte kan lâk?” tite u.

¹⁴“En teh u, aw Israela chhûngte u, nangmahni do tûrin hnam ka din chhuahtîr ang a; tin, Hamath khaw kawtchhuah aṭangin Araba lui thlengin an tiduhdah ang che u,” LALPA, sipaihote Pathian thuchhuak chuan a ti si a.