Read Mizo_Old_version Amosa 8 Bible Online

Amosa 8 - Mizo_Old_version bible

Amosa 8

¹Lalpa PATHIAN chuan inlârna mi hmuhtîr leh a, nipui thei bâwm ka hmu a.

²Tin, anin, “Amosa, eng nge i hmuh?” a ti a. Keiin, “Nipui thei bâwm,” ka ti a. Tin, LALPA chuan ka hnênah, “Ka mi Israel-te tâwpna tûr a ṭuah ta, ka hêl tawh lo vang,” a ti a.

³Lalpa Pathian thuchhuak chuan, “Chumi niah chuan biak in hlate chu lusûn hlaah a chang ang; mitthi ruang a tam ang a, hmun tinah ngawi rengin an paih chhuak ang,” a ti.

⁴Hei hi ngaithla rawh u, aw tlachhamte ei zo duha, ram mi rethei tibo duhte u,

⁵“Buh kan zawrh theih nân thla thar chu eng tikah nge a ral ang a, chhangphut buh kan hralh theih nân Chawlhni chu eng tikah nge a ral ang?” titu, epha titêa sekel tirita, dik lo taka bumna bûk hmanga,

⁶tangkaruaa mi rethei leia, mi tlachhamte chu pheikhawk bun khata leia, “Buhsî kan hralh theih nân,” titute u,

⁷LALPA chuan Jakoba ropuina chhâlin chhia a chham a, “Matheilovin an hnathawh rêng rêng ka theihnghilh hauh lo vang,” tiin.

⁸Hemi avâng hian ram chu a khûrin a chhûnga awm apiangte chu an lungngai dâwn lo vem ni? A ni, Lui ang chuan a lo lian vek ang a; Aigupta ram lui angin a lo buaiin a kâm ang a.

⁹Tin, Lalpa Pathian thuchhuak chuan, “Chumi niah chuan heti hi a ni ang a, chhûn laiah ni ka tlâktîr ang a, ni sat laiin lei chu ka tithim ang a.

¹⁰In ruaiṭhehte chu lungngaihnaah leh in hla zawng zawngte chu ṭahnaah ka chantîr ang a; kâwng zawng zawng saiip puan ka ventîr ang a, lu tin chhîpah kawlhna ka rawn thlen ang; tin, fapa mal neih chhun tân lungngaihna ang leh, a tâwpna chu khâkna ni angin ka siam ang.”

¹¹Lalpa PATHIAN thuchhuak chuan, “Ngai teh u, nite chu a lo thleng mêk a ni; chûng niahte chuan ramah chuan ṭâm ka tîr ang a, chaw ṭâmna ni lovin, tui ṭâmna ni hek lovin, LALPA thu hriatna ṭâmna zâwk chu.

¹²Tin, tuifinriat aṭangin tuifinriatah leh hmâr aṭangin chhakah pawh an vâkvai ang a; LALPA thu chu zawng tûrin kil tinah an tlân ang a, an hmu lo vang.

¹³Chumi niah chuan nula leh tlangvâl ṭhalaite meuh pawh tuihâlin an thidang ang a.

¹⁴Samari pathian lim chhâla chhechhama, ‘Dan pathian hmingin,’ titu emaw, ‘Beersheba pathian hmingin,’ titu emaw pawh chu an tlu ang a, an tho leh tawh lo vang.”