Read Mizo_Old_version Amosa 9 Bible Online

Amosa 9 - Mizo_Old_version bible

Amosa 9

¹Maichâm bula dingin LALPA chu ka hmu a; tin, anin, “Kawngka bulte a nghîn theih nân a chhîp bâwkte chu vua la, a vaia lu chungah tikeh sawm vek rawh. Tin, a thi bângte chu khandaihin ka that ang a; pakhat mah an tlân bo lo vang a, pakhat mahin an pumpelh hek lo vang.

²Mitthi khaw thlengin lai tlang mah sela, chuta ta chu ka kutin ka la chhuak ang; vânah lâwn mah sela, chuta ta chu ka hnûk thla ang.

³Karmel tlâng chhîpah biru mah sela, ka zawng ang a, chuta ta chu anmahni ka la thla ang; tin, tuifinriat mawngah ka mit hmuh lohvah biru mah sela, chuta awm rûl chu thu ka pe ang a, anmahni a chu ang.

⁴An hmêlmaten sala an hruai chu thu ka pe ang a, khandaihin an sât hlum ang, ṭanpui ahnêkin anniho tihhlum hi ka tum a ni.”

⁵Ram chu tawka, titui raltu chu Lalpa, sipaihote PATHIAN chu a ni si a; tin, chuta awm zawng zawngte chu an lungngai ang; tin, Lui angin a lo lian ang a, Aigupta Lui angin a lo kâm leh ang.

⁶Vâna a pindante siama, lei chunga a pindan kual siama, tuifinriat tuite kova, lei chunga leih bawtu, a hming chu LALPA a ni.

⁷LALPA thuchhuak chuan, “Aw Israel fate u, ka lakah Ethiopia fate ang tho in ni lo vem ni? Aigupta ram ata Israel leh, Kaptor ram ata Philistia mite leh, Kir ram ata Suria mite ka hruai chhuak lo vem ni?” a ti a.

⁸LALPA thuchhuak chuan, “Ngai teh u, Lalpa PATHIAN mit chu ram sual chungah a fu a; tin, lei chung ata ka tibo vang a; amaherawhchu, Jakoba chhûngte chu ka tichhe vek lo vang,” a ti a.

⁹“Ngai teh u, thu ka pe dâwn si a; tin, chhihrîa buh an hrî angin, Israela chhûngte chu hnam zawng zawng zîngah ka hrî ang a; nimahsela, fang tê ber pawh lei chungah a tla lo vang.

¹⁰Ka mite zînga mi sual zawng zawng, ‘Chhiatna chuan min ûm phâk lo vang a, min hmachhawn hek lo vang,’ titute chu khandaihin an thi ang,” a ti a.

¹¹Hêng thil titu LALPA thuchhuak chuan heti hian a ti: “Chumi niah chuan Davida bâwkte chim chu ka tungding ang a, a pawpte chu ka thawm ang a, a chhiate chu ka rem chho vang a, hmânlaia a awm ang khân ka sa ang;

¹²Edom hmuna la awmte leh ka hminga koh hnam zawng zawngte chu an neih theih nân,” a ti a.

¹³LALPA thuchhuak chuan, “Ngai teh u, nite chu a lo thleng mêk a ni; chûng niahte chuan lei lettu leh buh âttu leh grêp chîltu chuan chi thehtu chu a ûm phâk ang a; tin, tlâng sâng chuan uain thlum a fartîr ang a, tlâng zawng zawng an tui ang.

¹⁴Tin, ka mi Israel-te chu sal ata ka hruai kîr leh ang a, khaw ramte chu an siam leh ang a, an luah ang; tin, grêp huante an siam ang a, a uain chu an in ang; huante pawh an siam ang a, a rah chu an ei ang.

¹⁵Tin, an ramah anmahni ka phun ang a, an hnêna ka pêk an ram ata chu pawh chhuahin an awm leh tawh lo vang,” LALPA i Pathian chuan a ti.