Read Mizo_Old_version Jona 1 Bible Online

Jona 1 - Mizo_Old_version bible

Jona 1

¹Amittaia fapa Jona hnênah LALPA thu a lo thleng a.

²“Tho la, Ninevi khua, khawpui ropui takah chuan kal la, a chung thu tlângaupui rawh; an suahsualna chu ka hmaah a lo thleng chho ta si a,” tiin.

³Nimahsela, Jona chu LALPA hma ata Tarsis-ah tlân bo tûrin a tho ta a; tin, Jopa khuaah a kal chhuk a, Tarsis pan tûr lawng a hmu a; tichuan, a kal man chu a pe a, LALPA hma ata chu Tarsis pan tûrte nêna kal tûrin lawngah chuan a lût thla ta a.

⁴Nimahsela, LALPA chuan thli na tak mai tuifinriatah chuan a tîr a, tuifinriatah chuan thlipui nasa tak a tleh ta a; tichuan, lawng chu keh dâwn ang maiin a awm ta a.

⁵Tin, lawng mite chuan an hlau va, mi tinin mahni pathian an au ṭheuh va; lawng chu an tân a zân nân lawng chhûnga bungruate chu tuifinriatah chuan an paih chhuak ta a. Jona erawh chu lawng chhûngril berah a lo lût thla hman tawh a; a mu a, a lo muhîl dêr a.

⁶Chutichuan, lawng hotu chu a hnênah a lo kal a, “Aw nang muhîl, engtizia nge ni? Tho la, i Pathian ko rawh; i Pathian chuan kan boral loh nân min ngaihtuah mahna,” a ti a.

⁷Tin, “Hawh u, he thil ṭha lo kan chunga lo awm hi tu vâng nge ni tih kan hriat theih nân, ṭhum i vâwr ang u,” tiin an inbe hlawm a. Tichuan, ṭhum an vâwr a, ṭhum vâwr chu Jona chungah a tlu ta a.

⁸Tichuan, a hnênah chuan, “He thil ṭha lo kan chunga awm hi tu vâng nge ni, min hrilh rawh, kan ngên a che! I hnathawh eng nge ni? Khawi aṭanga lo kal nge i nih? Khawii rama mi nge i nih? Eng hnam mi nge i nih?” an ti a.

⁹Ani chuan an hnênah, “Hebrai mi ka ni a; tuifinriat leh khawmual siamtu LALPA, vân Pathian chu ka hlau a ni,” a ti a.

¹⁰Tin, mite chuan an hlau nasa ta êm êm a, a hnênah chuan, “Hei le, eng nge i lo tih ni?” an ti a; a hrilh tawh avângin, mite chuan LALPA hma ata a tlân bo a ni tih an hre si a.

¹¹Tichuan, a hnênah chuan, “Kan tân tuifinriat hi a fâwn loh nân i chungah eng nge kan tih ang?” an ti a, tuifinriat chu a fâwn nasa telh telh si a.

¹²Tin, ani chuan an hnênah, “Min la kâng ula, tuifinriatah hian min theh chhuak rawh u; chutichuan, tuifinriat hi in tân a fâwn tawh lo vang; keimah avângin in chungah he thlipui na tak hi a tleh a ni tih ka hre si a,” a ti a.

¹³Nimahsela, mite chuan khawmuala kîr tûrin an kar vak vak a; amaherawhchu, an thei lo va, tuifinriat chu an chungah a fâwn nasa telh telh si a.

¹⁴Chu vâng chuan LALPA chu an au va, “Aw LALPA, he mi nunna avâng hian min tiboral suh la, mi thiam thisen mawh kan chunga nghat lul lo tûrin kan ngên a che; aw LALPA, nangin i duh anga i tih a ni si a,” an ti a.

¹⁵Chutichuan, Jona chu an la kâng a, tuifinriatah chuan an theh chhuak ta a; tin, tuifinriat fâwn phûl bulh bulh chu a reh ta a.

¹⁶Tichuan, mite chuan LALPA chu nasa takin an hlau ta a; LALPA hnênah chuan inthawina an hlân a, thute an tiam ta a.

¹⁷Tin, LALPA chuan Jona lem tûrin sangha lian tak a lo ruat tawh a; chu sangha kawchhûngah chuan Jona chu ni thum leh zan thum a awm a.