Read Mizo_Old_version Jona 2 Bible Online

Jona 2 - Mizo_Old_version bible

Jona 2

¹Tin, Jona chu sangha kawchhûng aṭang chuan LALPA a Pathian hnênah a ṭawngṭai a.

²Heti hian a ti a: “Ka hrehawmna avângin LALPA chu ka ko va, Anin mi chhâng a; Seol kawchhûng aṭangin ka au va, Nangin ka aw i hria a.

³Thûk takah, tuifinriat chhûngrilah chuan nangin mi paih lût a, Tui tam tak chu ka vêlin a awm a; I tuifâwn leh i tui inchhawk zawng zawngte chuan mi vûr zêl a.

⁴Tin, ‘I mit hmuh ata paih chhuah ka ni a; Nimahsela, i biak in thianghlim lam ka hawi leh ang,’ ka ti a.

⁵Tuite chuan ka nunna chenin mi hual vêl a; Tui thûk chu ka vêlin a awm a; Hnimte chuan ka lu a tuam vêl a ni.

⁶Tlâng bul tâwp rêtahte chuan ka kal chhuk a; Lei chuan kumkhua atân a kalhnate chuan mi khâr khum a; Amaherawhchu, nangin, aw LALPA ka Pathian, khuarkhurum ata chu ka nunna i la chhuak a ni.

⁷Ka nunna ka kawchhûnga a chauh lai chuan, LALPA chu ka hre reng a; Ka ṭawngṭaina chu i biak in thianghlimah i hnên a lo thleng a ni.

⁸Thil lawilo dâwt mai mai ngaihsaktute chuan, Anmahni ngilneihna chu an hawisan a ni.

⁹Kei erawh chuan lâwm thu sawina aw nên i hnênah inthawina ka hlân ang a; Thu ka tiam tawh chu ka hlen ang. Chhandamna chu LALPA ta a ni,” tiin.

¹⁰Tin, LALPA chuan sangha chu a bia a, Jona chu khawmualah a law chhuak ta a.