Read Mizo_Old_version Jona 3 Bible Online

Jona 3 - Mizo_Old_version bible

Jona 3

¹Tin, LALPA thu chu Jona hnênah a lo thleng nawn leh a,

²“Tho la, Ninevi khua, khawpui ropui takah chuan kal la, thusawi tûr ka tuk che hi va tlângaupui rawh,” tiin.

³Tichuan, Jona chu a tho va, LALPA thu ang chuan Ninevi khuaah a kal ta a. Ninevi chu khawpui ropui tak, a zau zâwng ni thum kal a ni.

⁴Jona chu ni khat kal chin khawpui chhûngah chuan a han lût ṭan phawt a, “Tûn achin ni sawmliah Ninevi hi tihboral a ni dâwn e,” tiin a au va.

⁵Ninevi mite chuan Pathian an ring ta a; chaw nghei tûr tiin an puang a, an zînga a lian ber aṭanga a tê ber thlengin saiip puan an sin ta a.

⁶Chûng thu chu Ninevi khaw lalber beng a lo thleng a, a lalṭhutphah aṭang chuan a tho va, a lal puan chu a hlîp thla a, saiip puan a sin a, vutah a ṭhu ta a.

⁷Lalber leh a mi liante thupêkin lalber chuan Ninevi khaw chhûngah thu a puangin a chhuah a, “Mihring emaw, ran emaw, bâwng rual emaw, berâm rual emawte chuan eng mah tem suh se; ei tûr eiin tui pawh in suh se.

⁸Mihring leh rante chuan saiip puan sin zâwk sela, nasa takin Pathian au rawh se; a ni, mi tinin mahni kawng ṭha lo leh an kuta pâwngnêkna chu hawisan rawh se.

⁹Kan boral loh nân Pathian chu kîrin, rilru lamlêtin, a thinrimna nasa tak aṭang chuan a inlamlêt lo vang tih tuin nge hria?” tiin.

¹⁰Tichuan, Pathianin an thiltihte chu enin, an kawng ṭha lo chu an hawisan tih a hmu a; an hnêna a sawi tawh, tih a tum thil ṭha lo chu Pathian chuan a lamlêt a, a ti ta lo a ni.