Read Mizo_Old_version Jona 4 Bible Online

Jona 4 - Mizo_Old_version bible

Jona 4

¹Amaherawhchu, chu chuan Jona a tilungni lo ta êm êm a, a thinrim a.

²LALPA hnênah chuan a ṭawngṭai a, “Aw LALPA, ka ngên a che, hei hi kan rama ka la awm laia ka sawi kha a ni lo vem ni? Hei vâng hian Tarsis lamah ka tlân bo thuai a nih kha: nang zawng khawngaihna leh lainatnaa khat, thinnel, zahngai thei leh thil ṭha lo thlen lo tûra inlamlêt ṭhîn Pathian i ni tih ka hre si a.

³Chu vâng chuan, aw LALPA, tûnah ka nunna hi mi lâksak tûrin ka ngên a che; keia tân hian dam aiin thih a ṭha zâwk si a,” a ti a.

⁴Tin, LALPA chuan, “I thinrim hi i tidik em ni?” a ti a.

⁵Tichuan, Jona chu khawpui ata chu a kal chhuak a, khawpui chhak lampangah chuan a ṭhu a, chutah chuan chhâwlbûk a sa a, khawpui chunga thil lo thleng tûr chu hmuh tumin a hnuai hlimah chuan a ṭhu ta reng a.

⁶Tin, LALPA Pathian chuan ûm a lo ruat a, chu chu Jona chungah a zâmtîr a, a hrehawmna ata chhanchhuak tûra a lu zâr hliahtu atân. Chutichuan, Jona chu ûm avâng chuan a lâwm ta êm êm a.

⁷Amaherawhchu, Pathianin a tûk khawfîngchah laiin sûlrûl a lo ruat a, chu chuan ûm chu a kher a, a lo vuai ta a.

⁸Tin, heti hi a ni a, ni a lo chhuah chuan Pathianin khawchhak thli lum a lo ruat a; tin, ni chuan Jona lu chu a em a, a thidang a, a tân chuan thih a dîl ta a, “Keia tân hian dam aiin thih a ṭha zâwk e,” a ti a.

⁹Tin, Pathian chuan Jona hnênah, “Um chungchâng thua i thinrim hi i tidik em ni?” a ti a. Ani chuan, “Thih phah khawp hiala ka thinrim hi ka tidik a ni,” a ti a.

¹⁰Tin, LALPA chuan, “I hahpui loh, i ṭhantîr pawh ni hek lo, zan khat thila lo awma, zan khat thila boral leh ûm hi i lainat a.

¹¹Ninevi khua, khawpui ropui tak, a chhûnga mi nuai khat leh sînghnih aia tam, an ding leh vei pawh thliar thei lote leh ran rual tam tak awmna hi ka khawngaih lo vang em ni?” a ti a.