Read Mizo_Old_version Numbers 10 Bible Online

Numbers 10 - Mizo_Old_version bible

Numbers 10

¹Tin, LALPAN Mosia a bia a,

²“Tangkaraw tawtawrâwt pahnih siam la; a chhera chherin siam rawh: mipuiho koh khâwm nân leh chhuahtîr nân i hmang tûr a ni.

³Chu chu an ham kawp chuan mipui zawng zawng chu i hnênah inbiakna puan in kawngka bulah an rawn inkhâwm vek tûr a ni.

⁴Tin, pakhat chauh an ham chuan, Israel mipuite hotu puipate chauh i hnênah an lo kal khâwm tûr a ni ang a.

⁵Tin, râlkhêl hama in ham chuan chhak lampanga awmhote an chhuak tûr a ni ang.

⁶Tin, râlkhêl hama in ham leh chuan chhim lampanga awmhote an chhuak tûr a ni; an chhuahna tûrin râlkhêl hamin an hâm tûr a ni.

⁷Amaherawhchu, mipuite lo kal khâwmna tûr chuan in hâm phawt ang a, râlkhêl ham erawh chuan hâm lovin.

⁸Arona fapa puithiamhote chuan tawtawrâwt chu an hâm tûr a ni; chu chu in tân in thlahte thlenga kumkhaw dân tûr a ni ang.

⁹In rama hmêlma hnuaichhiahtu che u do tûra in kal hunin, râlkhêl hamin tawtawrâwtte chu in hâm tûr a ni; tichuan, LALPA in Pathian hmaah chuan hriat reng in ni ang a, in hmêlmate lakah chuan chhanhim in ni ang.

¹⁰In hlimna niah te, in kût hunbi neiah te, in thla tharah te chuan in hâlral thilhlanah leh in remna thilhlan inthawinaahte chuan tawtawrâwt in hâm tûr a ni; tichuan, in Pathian hmaa in tâna hriat rengna a ni dâwn nia: kei hi LALPA in Pathian ka nih hi,” tiin.

¹¹Tin, kum hnihna, chumi thla ni sawmhnih ni chuan heti hi a ni a, chhûm chu Pathian chênna in chung ata chu a lo invawrh sâng ta a.

¹²Tichuan, Israela thlahte chu an kal dân bi ang chuan Sinai thlalêr ata chu an chhuak a; tin, Paran thlalêrah chuan chhûm chu a ding ta a.

¹³Mosia hmanga LALPA thupêk angin an chhuak ta phawt a.

¹⁴A hmasa berin Juda pâwlho an chhungkaw chhinchhiahna kengin an chhuak a; a hotu chu Aminadaba fapa Nasona a ni a.

¹⁵Isakar-ho hotu chu Zuara fapa Nethanela a ni a.

¹⁶Zebulun-ho hotu chu Helona fapa Eliaba a ni a.

¹⁷Tin, biakbûk chu an ṭhiat a, Gersona fapate leh Meraria fapa, biakbuk zâwntute chu an chhuak a.

¹⁸Tin, Reuben-ho chu an chhûngkaw chhinchhiahna kengin an chhuak a; a hotu chu Sedeura fapa Elizura a ni a.

¹⁹Simeon-ho hotu chu Zurisadaia fapa Selumiela a ni a.

²⁰Gad-ho hotu chu Deuela fapa Eliasapha a ni.

²¹Tin, Kohath-hote chuan thil thianghlim chu an zâwn a, an chhuak a; tin, a dangte chuan an thlen veleh biakbûk chu an lo din diam a.

²²Ephraim-ho chu an chhungkaw chhinchhiahna kengin an chhuak a; a hotu chu Amihuda fapa Elisama a ni.

²³Manase-ho hotu chu Pedazura fapa Gamaliela a ni a.

²⁴Benjamin-ho hotu chu Gideonia fapa Abidana a ni a.

²⁵Tin, a hnuhnûng berah Dan-ho chu an chhûngkaw chhinchhiahna kengin an chhuak a; a hotu chu Amisadaia fapa Ahiezera a ni a.

²⁶Aser-ho hotu chu Okrana fapa Pagiela a ni a.

²⁷Naphtali-ho hotu chu Enana fapa Ahira a ni a.

²⁸Chutiang chu a ni Israela thlahte an chhûngkaw chhinchhiahna kenga an kal dân chu; chutiang tak chuan an chhuak ta a.

²⁹Tin, Mosia puzawn, Midian mi Reuela fapa Hobaba hnênah Mosian, “ ‘Ka pe ang che u,’ LALPAN a tih hmunah chuan kan kal dâwn a ni a; kan hnênah lo kal ve la, ṭha takin i chungah kan ti ang; LALPA chuan Israela thlahte chungchâng thu chu ṭha takin a sawi tawh si a,” a ti a.

³⁰Ani chuan a hnênah, “Ka lo kal lo mai ang e, keimahni ramah ka laichînte hnênah ka kal zâwk ang e,” a ti a.

³¹Tin, ani chuan, “Min kalsan lul suh khai, thlalêrah chuan awmhmun kan khuarna tûr i hre zâwk si a, kan tân mit i lo ni dâwn a ni.

³²Tin, heti hi a ni ang a, kan hnêna i kal ve chuan, a ni, heti hi a ni ang a, LALPAN thil ṭha min tihsak ang zêlin kan tihsak ve zêl ang che,” a ti a.

³³Chutichuan, LALPA tlâng aṭanga ni thum kalah chuan an kal a; tin, LALPA thuthlung bâwm chu an tâna innghahna hmun remchâng zawngin, ni thum an kal chhûng hian an hma a hruai a.

³⁴An bûk ata an chhuahin LALPA chhûm chu an chungah a awm zêl a.

³⁵Tin, heti hi a ni a, bâwm chu a chhuah dâwn apiangin Mosian, “Aw LALPA, lo thawk la, i hmêlmate chu tidarh la, a hawtu che chu i hmaah tlânchhe rawh se,” a ti ṭhîn a.

³⁶Tin, a innghah apiangin, “Aw LALPA, Israel mipuiho hnênah hian lo kîr leh rawh,” a ti ṭhîn a.