Read Mizo_Old_version Numbers 11 Bible Online

Numbers 11 - Mizo_Old_version bible

Numbers 11

¹Tin, mipuite chuan LALPA beng hriatah phunnawi hmangte angin thil ṭha lo tak an sawi ṭhîn a; chu chu LALPAN a lo hriatin a thin a alh ta a; tichuan, LALPA mei chu an zîngah chuan a lo thawk a, an riahhmun pâwn lam chu a lo kâng ta dur dur mai a.

²Chutichuan, mipuite chuan Mosia an au va; tin, Mosia chu LALPA hnênah a ṭawngṭai a, mei chu a rêm ta a.

³Chumi hmun hming chu Tabera an ti a, LALPA mei chu an zînga a lo thawh avâng chuan.

⁴Tin, an zînga hnam dang nêna inneih pawlhhote chuan tisa châkna an lo nei ta a; Israela thlahte pawh an ṭap leh a, “Tu nge sa ei tûr min pe dâwn?

⁵Duh duha Aigupta rama sangha kan ei ṭhinte chu kan hre reng a, fanghma te, hmazil te, purûn hel ei mi te, rûn bâl te, purûn vâr mite pawh;

⁶nimahsela, tûnah chuan kan thlîng a ro zo ta, eng mah rêng rêng beisei tûr a awm lo, manna mai lo hi chu,” an ti a.

⁷Manna chu koriander mu ang, a lan dânah chuan tuikeplung ang hi a ni.

⁸Mite chuan an chhar khâwm a, râwtsawmnaah an râwt sawm a, sumah te an dêng a, bêlah an chhûm a, chhangah te an siam a; han ei chuan hriaka kan chhang ang a ni a.

⁹Riahhmuna zâna dai a tlâkin manna chu a tla tel ve a.

¹⁰Tin, mipuite chu an chhûngkua kuain an puan in kawngka ṭheuhvah an ṭap tih Mosian a lo hria a; tin, LALPA thin chu nasa takin a alh ta a. Tin, Mosia pawh a lungni lo va;

¹¹tichuan LALPA hnênah, “Eng vângin nge i chhiahhlawh hi mi tihhrehawm? Engtizia nge i mit ka tlun lohva, hêng mipui zawng zawng phurrit hi ka chunga i nghah?

¹²Hêng mipui zawng zawng hi ka hrin em an nih? An pi leh pute chhechhama pêk i tiam rama hruai lût tûrin, ‘Nau pawmtuin hnute hne lai a pawm angin i ângchhûngah pawm rawh,’ i mi tih atân em ni ka hruai chhuah hlawm?

¹³Hêng mipui zawng zawng pêk tûr hi khawi ata nge sa ka neih ang? ‘Kan ei atân sa mi pe rawh,’ tia ṭapin mi bei si a.

¹⁴Hêng mipui zawng zawng hi mahni ngawt chuan ka phur zo lo, ka tân a rit lutuk a ni.

¹⁵Hetianga mi tih dâwn chuan mi khawngaih la, mi tihlum daih law law mai la, mi tirethei tawh suh khai,” a ti a.

¹⁶Tin, LALPAN Mosia hnênah, “Israel-te upa, mipuite upa leh an hotu nia i hriat mi sawmsarihte kha ka hnênah han hruai khâwm la, inbiakna puan inah nangmah nêna ding ho tûrin han hruai rawh.

¹⁷Tichuan, ka lo chhuk ang a, chutah chuan ka rawn bia ang che: tin, nangmaha thlarau chu an chungah ka dah ang a; nangmah chauhva phur lovin mipuite phurrit chu an phurhpui ang che.

¹⁸Tin, nangin mipui hnênah, ‘Naktûk atân hian intithianghlim vek ula; tichuan, sa chu in ei mawlh ang, “Sa ei tûr tuin nge min pe dâwn? Aigupta rama kan nawm nên khân,” tiin LALPA beng hriatah in ṭap a; chuvângin, LALPAN sa a pe ang che u a, in ei mawlh ang.

¹⁹Ni khat emaw, ni hnih emaw, ni nga emaw, ni sâwm emaw, ni sawmhnih emaw mai pawh ni lovin,

²⁰thla khat pumhlûm, ngei hlui khawp leh luak chhuak hlui khawpin in ei ang; in zînga awm LALPA chu duh lova, “Engati nge Aigupta ram ata kan chhuah ni?” tia a hmaah in ṭah avângin,’ ti ang che,” a ti a.

²¹Tin, Mosian, “Ka awmpui mipuiho kea kal thei ṭhiau pawh 6,00,000 an ni a, ‘Thla khat pumhlûm ei tûr sa ka pe ang,’ i ti a.

²²Berâm rual leh ran rual pawh talhsak ila, an khawpkham dâwn em ni? Tuifinriata sangha zawng zawng pawh mansak vek ila, an khawpkham dâwn em ni?” a ti a.

²³Tin, LALPAN Mosia hnênah, “LALPA kut chu a tawi ta em ni? I chungah ka thu angin a thlen leh thlen loh i hre mai ang,” a ti a.

²⁴Tichuan, Mosia chu a chhuak a, LALPA thu chu mipuite chu a hrilh a; tin, mipuihote upa sawmsarihte chu a ko khâwm a, Puan In vêlah chuan a dintîr a.

²⁵Chutichuan, LALPA chu chhûmah chuan a lo chhuk a, a rawn bia a, amaha Thlarau chu upa sawmsarihte chungah chuan a dah a; tin, heti hi a ni a, Thlarau chu an chunga a han awm veleh chuan thu an sawi ta dual dual a; nimahsela, chutiang chuan an ti an ti leh tawh lo.

²⁶Amaherawhchu, bûkah chuan mi pahnih an la awm ta a: pakhata hming chu Eldada a ni a, pakhat leha hming chu Medada a ni. Thlarau chu an chungah a awm a. Chhiarte zînga tel chu an ni a, inbiakna puan inah erawh chuan an kal ve lo; bûkah chuan thu an sawi bual bual a.

²⁷Tichuan, tlangvâl pakhat a va tlân a, Mosia a va hrilh a, “Eldada leh Medadan bûkah thu an sawi bual bual mai,” a ti a.

²⁸Tin, Nuna fapa Josua, a tleirâwl tirh aṭanga Mosia rawngbâwltu chuan a chhâng a, “Ka pu Mosi, khap rawh khai,” a ti a.

²⁹Tin, Mosian a hnênah, “Keimah avânga ngaimawh em i nih? LALPA mi zawng zawngte chu zâwlnei ni vek sela, LALPAN an chungah a thlarau chu dah ṭheuh sela tih nâk alaiin.” a ti a.

³⁰Tichuan, Mosia chu bûkah chuan a lût leh a, amah leh Israel-ho upate nên.

³¹Tin, LALPA hnên aṭang chuan thli a lo tleh a, tuifinriat lam ata vahmîm a rawn lên a, bûk lehlam pang ni khat kal, a lehlam pang ni khat kal ve ve awhin bûk vêl chuan tawng hnih laia sângin a tlâktîr a.

³²Tin, mipuite chuan chumi ni nilêng leh zankhua leh, a tûk nilêng chuan vahmîm chu an va chhar khâwm a, a chhar tlêm ber pawhin homer sâwm a chhar a; bûk vêlah chuan mahni tân an pho ṭheuh va.

³³Tin, chumi sa chu an ei lai, an la ei zawh hmain, mipuite chungah LALPA thin chu a alh ta a, mipuite chu hripui nasa takin LALPAN a hrem ta a.

³⁴Chumi hmun hmingah chuan Kibroth-hat-tava an ti a; chutah chuan tisa châkna neitute chu an phûm avângin.

³⁵Tin, Kibroth-hat-tava aṭang chuan mipuite chu Hazeroth-ah an kal a; Hazeroth-ah chuan an awm ta a.