Read Mizo_Old_version Numbers 12 Bible Online

Numbers 12 - Mizo_Old_version bible

Numbers 12

¹Tin, Miriami leh Arona chuan Mosian Kus hmeichhia nupuia a neih avangin an sawichhia a: Kus hmeichhia chu a nei ngei si a.

²Anni chuan, “Mosia hnênah chauh hian em ni LALPAN thu a sawi bîk? Keini hnênah pawh hian a sawi ve lo vem ni?” an ti a. Chu chu LALPAN a lo hria a.

³Mosia chu lei chunga mihring zawng zawnga zaidam lâwtlak a ni a.

⁴Tin, Mosia leh Arona leh Miriami hnênah LALPAN, “In pathumin lo chhuak ula, inbiakna puan inah lo kal rawh u,” a ti ta thut mai a. Tichuan, an pathum chuan an va kal a.

⁵Tin, LALPA chu chhûm dingah a lo chhuk a, puan in kawngkaah a lo ding a, Arona leh Miriami chu a ko va; tin, an pahnih chuan an lo chhuak a.

⁶Tin, ani chuan, “Ka thu hi ngaithla rawh u: in zîngah hian zâwlnei in awm chuan a hnênah kei LALPA hi inlârnain ka inhriattîr ang a, mang lamah ka bia ang.

⁷Ka chhiahhlawh Mosia hi zawng chutiang a ni lo; ka chhûngkaw thu zawng zawngah chuan a rinawm a ni.

⁸Ani nên zawng ṭawngkain, thurûk awm lovin tlang takin kan inbia a; LALPA hmêl pawh a hmu ang; chuvângin, ka chhiahhlawh Mosia hi engtiziaa sawichhe ngam nge in nih?” a lo ti a.

⁹Tichuan, LALPA chu an chungah a thinur ta êm êm a, a kal leh ta a.

¹⁰Tin, puan in chunga chhûm chu a kiang ta a; tin ngai teh, Miriami chu vûr ang maia varin a lo phâr ta a; Arona chuan Miriami chu a han en a, ngai teh, phâr a lo ni ta reng mai a.

¹¹Chutichuan, Aronan Mosia hnênah, “Aw ka pu, kan chungah sual nghat lul suh ang che, âtthlâk takin kan lo ti a, kan lo sual ta a ni e.

¹²Mi, a nu chhûl ata a lo chhuah tirh aṭanga thi sa deuhthaw angin awm lul suh se,” a ti a.

¹³Tichuan, Mosian, “Aw Pathian, tidam leh teh khai,” tiin LALPA chu a au va.

¹⁴Tin, LALPAN Mosia hnênah, “A pain a hmaia chil a chhâk ngawt pawhin ni sarih chu a zak dâwn lâwm ni? Daipâwnah ni sarih bibo sela, chumi zawhah hruai luh leh ni rawh se,” a ti a.

¹⁵Chutichuan, Miriami chu dai pâwnah ni sarih a bibo va; Miriami an hruai luh leh hma chuan mipuite chu an tawl sawn lo va.

¹⁶Chumi zawhah chuan mipuite chu Hazeroth ata an chhuak a, Paran thlalêrah awmhmun an khuar a.