Read Mizo_Old_version Numbers 13 Bible Online

Numbers 13 - Mizo_Old_version bible

Numbers 13

¹Tin, LALPAN Mosia a bia a,

²“Israela thlahte ka pêk, Kanaan ram va enthla tûrin mite tîr rawh khai: an hnam chhûngkaw tina mi, an puipa zînga mi pakhat ṭheuh zêl i tîr tûr a ni,” a ti a.

³Tin, Mosia chuan Paran thlalêr aṭang chuan LALPA thupêk angin a kaltîr ta hlawm a, an za chuan Israela thlahte zînga puipa ṭhiau an ni.

⁴Hêng hi an hming a ni: Reuben hnam zînga mi Zakura fapa Samua;

⁵Simeon hnam zînga mi Horia fapa Saphata;

⁶Juda hnam zînga mi Jephunea fapa Kaleba;

⁷Isakar hnam zînga mi Josefa fapa Igala;

⁸Ephraim hnam zînga mi Nuna fapa Hosea;

⁹Benjamin hnam zînga mi Raphua fapa Paltia;

¹⁰Zebulun hnam zînga mi Sodia fapa Gadiela;

¹¹Josef hnam (Manase hnam an tih) zînga mi Susia fapa Gadia;

¹²Dan hnam zînga mi Gemalia fapa Amiela;

¹³Aser hnam zînga mi Mikaela fapa Sethura;

¹⁴Napthali hnam zînga mi Vopsia fapa Nabia;

¹⁵Gad hnam zînga mi Makia fapa Geuela.

¹⁶Hêng hi ram enthla tûra Mosian a tirhate hming chu a ni. Nuna fapa Hosea chu Mosian Josua a ti a.

¹⁷Tichuan, Mosian Kanaan ram enthla tûrin anniho chu a tîr a, an hnênah, “Chhim lam kawngah kal phawt ula, tlângahte lâwn chho ula,

¹⁸ram chu eng ang nge tih te, chûnga chêng mipuite chu an chak nge chak lo tih te, an tlêm leh an tam te,

¹⁹an awmna ram chu a ṭha nge ṭha lo tih te, an awmna khuate chu eng ang nge ni, puan in mai nge kulh nei in tih te,

²⁰tin, ram chu a chênghnâwng nge hnâwng lo, a ngaw nge ngaw lo tihte va thlithlai ula. Tin, huai takin awm ula, chumi ram theirahte chu rawn hâwn ang che u,” a ti a. Grêp rah hmasa rah hun lai tak a ni a.

²¹Chutichuan, an chhuak chho ta a, ram chu Zin thlalêr aṭanga Hamath luhna Rehob thlengin an enthla vek a.

²²Chhim lamah an chho phawt a, Hebron an va thleng a, chutah chuan Anaka thlah Ahiman-ho te, Sesai-ho te, Talmai-ho te an awm a (Hebron chu Aigupta rama Zoan din hma kum sariha din tawh a ni).

²³Tin, Eskol ruam an va thleng a, chuta grêp rah bâwr khat, a ṭang chawpin an sât chhum a; tiangin mi pahnihin an zâwn a. Pawmgranet leh theipuite pawh an hâwn bawk a.

²⁴Chumi hmun chu Eskol ruam an ti a, Israela thlahten chuta ta grêp bâwr chu an sah thlâk avângin.

²⁵Tin, an ram va enthla chu ni sawmli an thang a, an lo haw leh ta a.

²⁶Chutichuan, Paran thlalêra Kadesh-ah chuan Mosia leh Arona leh Israel mipui zawng zawng hnên chu an lo thleng a, an hnênah leh mipui zawng zawng hnênah chuan thu an rawn thlen a, chumi ram theite chu an entîr a.

²⁷Tin, a hnênah, “I mi tirhna ramah chuan kan kal a, hnutetui leh khawizu luanna a lo ni ngei mai; hei hi a rama thei a ni.

²⁸Amaherawhchu, a rama mi awmte chu mi chak pui pui an ni a, khuate pawh kulh nei, ropui tak tak a ni; tin, Anaka thlahte pawh kan hmu bawk a.

²⁹Amalek-ho chu chhim lam ramah an awm a; Hit-ho te, Jebus-ho te, Amor-ho te chu tlângahte an awm a; tin, Kanaan-hote chu tuifinriat kam leh Jordan lui dungah an awm,” tiin an hrilh a.

³⁰Tichuan, Mosia hmaah Kaleban mipui chu a tingawi ṭhuap a, “I han thawk thuai ang u khai, i han la ang u, kan ngam ngei ngei ang,” a ti a.

³¹Nimahsela, a kalpuite chuan, “Kan han hneh thei hlawm lo vang â, kan aiin an chak si a,” an ti a.

³²Tichuan, Israela thlahte hnênah an ram han enthlâk chu, “Kan ram han enthlâk chu a chhûnga chêngte ei zawh hmang a ni; tin, a awmte kan hmuh chu mi âwmkhauh pui pui an ni a.

³³Tin, chutah chuan Anaka thlahte, mi lianho, âwmkhauh pui pui kan hmu a; khau ang lekin kan inhmu a, anni pawhin khau ang lekin min hmu a ni,” tiin, a ṭha lo lamin an sawi a.