Read Mizo_Old_version Numbers 14 Bible Online

Numbers 14 - Mizo_Old_version bible

Numbers 14

¹Chutichuan, pung khâwmho zawng zawng chu aw chhuah meuhvin an ṭap a; chumi zân chuan mipuite chu an ṭap an ṭap a.

²Israela thlahte zawng zawng chu Mosia chungah leh Arona chungah an phunnawi a: pung khâwmho zawng zawng chuan an hnênah, “Aigupta ramah khân Pathianin min tihlum ta thên sela aw! A nih loh leh thlalêrah hian min tihlum thên mai sela aw!

³Engati nge khandaiha thi mai tûra Pathianin he ramah hian min hruai le aw! Kan nupui fanaute chu man tûr mai an ni dâwn si a. Aigupta rama kîr leh hi kan tân a ṭha zâwk dâwn lâwm ni âw?” an ti a.

⁴Tichuan, an inbe hlawm a, “Hotu i siam ang u khai, Aigupta ramah i kîr leh ang u,” an ti a.

⁵Chutichuan, Mosia leh Arona chu Israela thlah mipui pung khâwmho zawng zawng hmaah chuan an bawkkhup a.

⁶Tin, Nuna fapa Josua leh Jephunea fapa Kaleba, ram va enthlatute zînga tel vete chuan an puan an pawt thlêr a;

⁷Israela thlah pung khâwmho zawng zawng hnênah chuan, “Enthla tûra kan va fan chhuah ram chu ram ṭha tak a ni a.

⁸Kan chunga LALPA a lâwm chuan chu ramah chuan min hruai ang a, min pe ang; hnutetui leh khawizu luanna ram chu.

⁹LALPA chungah hel lo phawt mai ula, chumi rama mite chu hlau bawk hek suh u, kan chaw tûr an ni mai a; an inhumhimna chu engmahlo a ni a, LALPA chu kan hnênah a awm alâwm. Anni chu hlau suh u,” tiin an sawi a.

¹⁰Nimahsela, pung khâwmho zawng zawng chuan lunga den an rawt a. Chutichuan, LALPA ropuina chu inbiakna puan inah Israela thlahte zawng zawng hmaah a lo lang a.

¹¹Tichuan, LALPAN Mosia hnênah, “Hêng mipuite hian eng chen nge mi ngaihnêp ang a, an zînga chhinchhiahna ka tih ṭhin chung pawhin eng chen nge mi rin loh dâwn?

¹²Hriin ka hrem ang a, ka timang ang a, nangmahah hian an aia ropui leh thiltithei zâwk hnam ka din teh zâwk ang,” a ti a.

¹³Tin, Mosian LALPA hnênah, “Aigupta miten an hre reu reu vang e; hêng mipuite hi an zîng ata i thiltihtheihnaa i hruai chhuah an ni si a;

¹⁴hemi rama mite hi an hrilh ang a; hêng mipuite zîngah hian i awm tih an hre tawh a; hmaichhan meuhvin an hmu tawh si chia, i chhûm chu an chungah a awm ṭhîn a; tin, chhûnah chhûm ding, zânah meiin an hma i hruai ṭhîn si a.

¹⁵Hêng mipuite hi i tihhlum phiar chuan i hmingthan hretu chuan,

¹⁶‘LALPA chuan hêng mipuite hi chhechhama a tiam ramah chuan a hruai theih loh avângin thlalêrah a tihlum a ni,’ tiin an sawi dah ang e.

¹⁷‘LALPA chu thinnel tak, ngilneihna ngah, khawlohna te, bawhchhiatna te ngaidam ṭhîn; thiam lova ruatte chhuah mai ngai lo; pate khawlohna avânga fate, fate fa lehte, chhuan thumna leh chhuan lina thleng pawha hrem ṭhîn a ni,’ tia i lo sawi tawh ang khân i thiltihtheihna chu hlen teh hrâm khai.

¹⁹I ngilneihna a nasat ang ngei leh Aigupta ram ata tûn thlenga i ngaidam ang hian, mipuite khawlohna hi ngaidam teh khai,” a ti a.

²⁰Tin, LALPA chuan, “I thu ang chuan ka ngaidam e;

²¹amaherawhchu, ka nunna leh LALPA ropuina tihkhah leilung chhâlin ka sawi e,

²²Aigupta ram leh thlalêra ka ropuina leh ka thil mak tihte hmua, chuti chung pawha vawi sâwm zet mi la fiaha, ka thu la pawm lo mi zawng zawngte hian,

²³an thlahtute hnêna chhechhama ka tiam ram chu an hmu tawp lo vang a; an zînga mi ngainêptu rêng rêngte pawhin an hmu bawk hek lo vang;

²⁴ka chhiahhlawh Kaleba erawh hi chuan rilru dang a puta, mi zui takzet avângin, ani hi chu a va kalna ramah chuan ka hruai ang a, a thlahte chuan an luah ang.

²⁵Khai le, Amalek-ho leh Kanaan-ho chu ruamah chuan an awm a; naktûkah lêt ula, Tuifinriat Sen kawng lam thlalêrah lût rawh u,” a ti a.

²⁶Tin, LALPAN Mosia leh Arona a bia a,

²⁷“Hêng mi suaksual pung khâwmho, ka chunga phunnawi ṭhîn hi eng chen nge ka dawh ang? Israela thlahte phunnawina, ka chunga an phunnawinate chu ka hria e.

²⁸An hnênah, ‘Ka nunna chhâlin ka sawi e, ka beng hriat ngeia in sawi ang takin in chungah ka ti ang:

²⁹in ruangte chu he thlalêrah hian a awm ang a; in zînga mi chhiar tawh sa zawng zawng, kum sawmhnih achin chung lam mi ka chunga phunnawiho zawng zawngte chu,

³⁰bân phar meuhva, “Ka awmtîr ang che u,” ka tih ramah chuan Jephunea fapa Kaleba leh Nuna fapa Josua chauh lo chu in lût tawp lo vang.

³¹Amaherawhchu, “Man tûr mai an ni ang,” in tih in fanaute hi chu ka hruai lût ang a, in duh loh ram chu an hria ang.

³²Nangni erawh chu in ruang he thlalêrah hian a awm ang.

³³In fate chu thlalêrah kum sawmli an tei an tei ang a, thlalêra in ruangte a riral hma loh chuan in nawhchizawrhna chu an tuar ang.

³⁴Ram in va enthlâk ni zât, ni sawmli chu, ni khat aiah kum khat zêl, kum sawmli chhûng zet in bawhchhiatna in tuar phah ang a; tichuan, ka tum dân ka tihdanglam hi in hria ang.

³⁵Kei LALPA hian mi suaksual pung khâwm, mi dodâla pung khâwmho chungah hei hi ka ti ngei ang ka lo ti tawh a: hemi thlalêrah hian an boral ang a, chutah chuan an thi ang, LALPAN a ti,’ ti rawh u,” tiin.

³⁶Tin, ram enthla tûra Mosia tirh lo kîr leh, ram chanchin a ṭha lo zâwnga rawn sawia, a chunga pung khâwmho phunnawitîrtu, ram a ṭha lo zâwnga rawn sawitute chu LALPA hmaah hriin an thi a.

³⁸Ram enthla tûra kalte zînga Nuna fapa Josua leh Jephunea fapa Kaleba erawh chu an thi ve lo va.

³⁹Tichuan, Mosian chûng thute chu Israela thlahte zawng zawng chu a hrilh a, mipuite chu an lungngai ta hle mai a.

⁴⁰Chutichuan, zîng takah an tho va, tlâng chhîpah an han chho va, “Ngai teh, hei kan lo kal e, LALPAN min tiamna hmunah chuan kan kal ang e, kan lo sual ta a ni e,” an ti a.

⁴¹Tin, Mosian, “Hmuingîlna a ni lo vang tih hre reng chungin engah nge LALPA thupêk in bawhchhiat teh rêng?

⁴²In zîngah LALPA a awm si lo va, hmêlmate lo tihhlum mai tûrin chho suh u.

⁴³In hmaah khian Amalek-ho leh Kanaan-ho an awm a ni, khandaiha tihhlum in ni mai ang; LALPA chu in hawisan tâk avângin in hnênah LALPA chu a awm lo vang,” a ti a.

⁴⁴Nimahsela, tlang chhîpah chuan kal an tum ṭâlh a. Amaherawhchu, LALPA thuthlung bâwm leh Mosia chu bûk ata an chhuak ve lo.

⁴⁵Chutichuan, chumi tlânga awm Amalek-ho leh Kanaan-ho chu an lo chhuk a, an bei a, Horma thlengin an vaw thlu rum mai a.