Read Mizo_Old_version Numbers 15 Bible Online

Numbers 15 - Mizo_Old_version bible

Numbers 15

¹Tin, LALPAN Mosia a bia a,

²“Israela thlahte bia la, an hnênah, ‘In awmna tûr ram ka pêk che u in thlen huna,

³LALPA hnêna meia thilhlan, hâlral thilhlan emaw, thutiam hlen tûra inthawina emaw, mahni duh thua thilhlan emaw, in kût hunbiah emaw, ran rual zinga mi emaw, berâm rual zînga mi emawa LALPA tâna rimtui siam tûr emawa in hlan hun chuan,

⁴LALPA hnêna a thilhlan hlântu apiangin chhangphut thilhlan, chhangphut dip mi epha hmun lia ṭhena hmun khat, hriak hin hmun lia ṭhena hmun khata hmeh a hlân tûr a ni;

⁵tin, in tûr thilhlanah uain hin hmun lia ṭhena hmun khat hâlral thilhlan emaw, inthawina emawa hlannaah berâmno hming kimin in buatsaih tûr a ni.

⁶Tin, berâmpaah chuan chhangphut thilhlan, chhangphut dip mi epha hmun sâwma ṭhena hmun hnih, hriak hin hmun thuma ṭhena hmun khata hmeh in buatsaih tûr a ni;

⁷tin, in tûr thilhlanah chuan LALPA tâna rimtuiah uain hin hmun thuma ṭhena hmun khat in hlân tûr a ni.

⁸Hâlral thilhlanah emaw, thutiam hlen tûra inthawinaah emaw, LALPA hnêna remna thilhlanah emawa bâwngpa in buatsaih hun chuan,

⁹bâwngpa hlan rual chuan chhangphut thilhlan chhangphut dip mi epha hmun sâwma ṭhena hmun thum hriak hin chanvea hmeh in hlân tûr a ni.

¹⁰Tin, in tûr thilhlanah uain hin chanve, LALPA tâna rimtui meia thilhlan in hlân tûr a ni.

¹¹“ ‘Chutiang chuan bâwngpa te, berâmpa te, berâmno a pa te, kêlno te an hming kimin tih tûr a ni.

¹²An tam dân azir zêlin in buatsaih ang a, an tam dân ang zêl chuan in hlân tûr a ni.

¹³Chumi rama piang zawng zawng chuan hetiang zêl hian, LALPA tâna rimtui meia thilhlan an hlan hunin an ti tûr a ni.

¹⁴Tin, hnam dang mi in hnêna khawsa ṭhîn emaw, tu pawh in hnêna khawsa zêl ṭhîn tûrte emaw, LALPA tâna rimtui meia thilhlan hlân duh apiang chuan in tih ang takin an ti ve tûr a ni.

¹⁵In thlahte thleng atân mipuite leh hnam dang in hnêna awmte tân pawh, dân angkhat chauh a awm tûr a ni; LALPA hmaah hnam dangte chu nangmahni ang chiah an ni ang.

¹⁶In tân leh in hnêna hnam dang awmte tân dân hmun khat leh tih dân hmun khat chauh a awm ang,’ ti rawh,” tiin.

¹⁷Tin, LALPAN Mosia a bia a,

¹⁸“Israela thlahte bia la, an hnênah, ‘Heti hi a ni ang a, ka hruaina tûr che u ram in va thlena,

¹⁹chumi ram chhang in ei hun chuan LALPA hnênah thên thilhlan in hlân tûr a ni.

²⁰In chhang hmeh hmasak ber zînga mi hlâwm khat chu thên thilhlanah in hlân tûr a ni; hruiha mi thên thilhlanah in thên angin in thên tûr a ni.

²¹In thlahte thlengin in chhang hmeh hmasak ber chu LALPA hnêna thên thilhlan atân in hlân zêl tûr a ni.

²²“ ‘Tin, hêng thupêk zawng zawng, LALPAN Mosia hnêna a sawi, LALPAN thu a pêk tirh aṭanga in thlahte thleng atâna Mosia hmanga thu a pêk zawng zawng che u hi, in pawm lohva, in bawhchhiat chuan,

²⁴hetiang hi a ni ang a, pung khâwmhovin hre lova tihpalh a nih chuan, pung khâwmho zawng zawng chuan hâlral thilhlan LALPA tâna rimtuiah bâwngtuai pakhat an hlân ang a, a dân pangngai angin chhangphut thilhlan leh in tûr thilhlan nên, sual thawi nân kêlpa pakhat an hlân tel bawk tûr a ni.

²⁵Tin, puithiamin Israela thlah pung khâwm zawng zawng tân remna a siam ang a, ngaihdam an ni ang, tihpalh a nih avâng leh an thilhlan, LALPA tâna meia thilhlan leh an tihsual aiah sual thawina an hlân tak avângin;

²⁶Israela thlah pung khâwm zawng zawngte chu ngaihdam an ni ang a, an zînga hnam dang awmte pawh; mipui zawng zawngin an tihpalh a nih avângin.

²⁷“ ‘Tin, miin hre lovin thil a tihsual chuan sual thawi nân kêlnu pakhat kum khat mi a hlân tûr a ni.

²⁸Hre lova LALPA hmaa tisualtu tân chuan puithiamin remna a siam tûr a ni; tichuan, ngaihdam a ni ang.

²⁹Hre lova tisualtu tân, Israela thlah, chu rama piangte tân leh hnam dang mi an zînga awmte tân pawh dân angkhat in nei tûr a ni.

³⁰Amaherawhchu, hre reng sia tilui chu, chu rama piang emaw, hnam dang emaw pawh ni sela, LALPA sawichhia a ni a; chu mi chu a chipuite zîng ata tuithlâr tûr a ni.

³¹LALPA thu chu a hmuhsita, a thupêk chu a bawhchhiat avângin chu mi chu tuithlâr hlauh tûr a ni a, a khawlohna mawh chu a phur ang,’ ti rawh,” tiin.

³²Israela thlahte thlalêra an awm lai chuan mi pakhat, Chawlhnia thing fawm hi an hmu a.

³³A thing fawm hmutute chuan Mosia leh Arona leh mipuiho hnênah chuan an hruai a.

³⁴Engtia tih tûr nge tih la puan loh a nih avângin tân inah an khung a.

³⁵Tin, LALPAN Mosia hnênah, “Chu mi chu tihhlum ngei ngei tûr a ni, daipâwnah mipui zawng zawng chuan lungin an dêng tûr a ni,” a ti a.

³⁶Tichuan, LALPAN Mosia thu a pêk ang chuan mipui zawng zawng chuan daipâwnah an hruai a, lungin an dêng hlum ta a.

³⁷Tin, LALPAN Mosia a bia a,

³⁸“Israela thlahte hnênah an thlahte thlenga an puan hmâwrah a fêm siam tûr leh, a hmâwr tin fêmah a dumpâwl dah tûrin ti rawh:

³⁹chumi fêm chu in en ṭhina, LALPA thupêk zawng zawng in hriat renga in zawm nân leh, nawhchizuara in awm ṭhin anga in thinlung duh zâwng leh, in mit la zâwng ûma in awm loh nân leh, ka thupêk zawng zawngte chu in hriat renga, in zawma, in Pathian tâna in thianghlim theih nân a ni.

⁴¹In Pathian ni tûra Aigupta ram ata hruai chhuaktu che u LALPA in Pathian ka ni. Kei hi LALPA in Pathian chu ka ni,” tiin.