Read Mizo_Old_version Numbers 16 Bible Online

Numbers 16 - Mizo_Old_version bible

Numbers 16

¹Levia fapa Kohatha, chu mi fapa Izara, chu mi fapa Kora chu Eliaba fapate, Dathana leh Abirama leh Peletha fapa Ona, Reubena thlahte nên chuan mite an hruai a;

²Israela thlahte, mi lâr deuh deuh mipui zînga hotu, rorêltua thlante zînga mi zahnih leh sawmngate nên, Mosia hmaah an va thawk a.

³Mosia leh Arona phiarin an pung khâwm a, an hnênah, “In induh êm mai, mipuite chu an thianghlim ṭheuh si a, LALPA pawh an zîngah a awm si a. Eng vângin nge LALPA mipui pung khâwmho chunga in indah chungnun bîk?” an ti a.

⁴Chu chu Mosian a han hriat chuan a bawkkhup a;

⁵tin, Kora leh a pâwlte zawng zawng hnênah chuan, “Naktuk zîngah LALPAN a tate leh a thianghlimte chu tilangin amah va hnaih tûrin a ti ang a, a thlante ngei chu amah va hnaih tûrin a ti ang.

⁶Nang, Kora leh i pâwlte zawng zawng chuan heti hian ti rawh u: naktûkah mei lâknate keng ula,

⁷chutah chuan mei dah ula, LALPA hmaah rimtui phul rawh u; tin, LALPAN a thlan apiang chu a thianghlim ang. Levia fapate u, in induh êm mai,” tiin a sawi a.

⁸Tin, Mosian Kora hnênah, “Nangni Levia fapate u, ngaithla rawh u,

⁹LALPA biakbûka rawngbâwla, mipuite hmaa an rawngbâwla ding tûra Israel-te Pathianin amah hnaih tûra Israel mipuite zîng ata a tihhran che u leh, Levia fapa in unaute zawng zawng nêna amah hnaih tûra a awmtîr che u hi, thil tê thamah in ngai a ni maw, puithiam nihna in la zawn cheu?

¹⁰

¹¹Chu vâng chuan nang leh i pâwlte zawng zawng LALPA dodâlin in pung khâwm a ni. Tin, Arona hian eng nge maw a tiha, a chungah hian in phunnawi?” a ti a.

¹²Tin, Mosia chuan Eliaba fapa Dathana leh Abirama a kohtîr a; anni chuan, “Kan lo chho lo vang;

¹³thlalêra mi tihlum tûrin hnutetui leh khawizu luanna ram ata min hruai chhuak hi thil tê tham em ni? Kan chungah i intilal lehnghâl si.

¹⁴Hnutetui leh khawizu luanna ramah min hruai lût lo va, lo leh grêp huan ro tûr min pe bawk hek lo. Hêngho mitte hi chawl i phulsak dâwn em ni? Kan lo chho lo tawp ang,” an ti a.

¹⁵Tichuan, Mosia chu a thin a rim ta hle mai a, LALPA hnênah, “An thilhlan chu pawm suh. An sabengtung pakhat mah ka la lo va, tu mah ka tina hek lo,” a ti a.

¹⁶Tin, Mosian Kora hnênah chuan, “Naktûkah nang leh i mi pung khâwmho, nang nên, anni nên, Arona nên LALPA hmaah lo awm rawh u.

¹⁷An mei lâkna keng ṭheuh sela, rimtui phul sela, LALPA hmaah mei lâkna ṭheuh, mei lâkna 250 chu rawn keng rawh se; nang leh Arona pawhin in mei lâkna keng ve ve rawh u,” a ti a.

¹⁸Tichuan, mi tinin an mei lâkna chu an keng a, mei an dah a, rimtui an phul a, Mosia leh Arona-te nên inbiakna puan in kawngkaah chuan an va ding a.

¹⁹Tin, Kora chuan mipui zawng zawng chu anmahni dodâlin, inbiakna puan in kawngkaah chuan a awm khâwmtîr a; tin, mipui zawng zawng chungah chuan LALPA ropuina a lo lang a.

²⁰Chutichuan, LALPAN Mosia leh Arona chu a bia a,

²¹“Hêng mipui zîng ata hi inthiarfihlîm rawh u, ka rawn tihboral thut theih nân,” tiin.

²²Tichuan, anni chu an bawkkhup a “Aw Pathian, nunna zawng zawng hnâr i ni, mi pakhat sual avângin mipui zawng zawng chungah i thinur dâwn em ni?” an ti a.

²³Tin, LALPAN Mosia a bia a,

²⁴“Mipuite hnênah chuan, ‘Kora te, Dathana te, Abirama te hi bûk ata kiansan vek rawh u,’ tiin sawi rawh,” a ti a.

²⁵Tichuan, Mosia chu a tho va, Dathana leh Abirama-te hnênah chuan a va kal a, Israel-ho upate chuan an zui a.

²⁶Tin, pung khâwmho hnênah chuan, “Hêng mi sualho puan in a ṭangte hian chhuak rawh u khai; an eng mah hi khawih suh u; chuti lo chuan, an sualna zawng zawngah hian in tel ve dah ang e,” tiin a sawi a.

²⁷Chutichuan, Kora te, Dathana te, Abirama te bûk ata chu an chhuak ta sung sung mai a; tin, Dathana leh Abirama chu an puan in ata an lo chhuak a, an puan in kawngkaah chuan an nupui te, an fapa te, an fanau tê tête nên an ding a.

²⁸Tin, Mosian, “Keima rilru puakchhuaka tih a ni lo va, hêng thil ti tûr hian LALPAN mi tîr a ni tih hemiah hian in hria ang.

²⁹Hêng mite hi mi zawng zawng thih dân ang mai bawka an thiha, mi zawng zawng hrem ang bawka hrem an nih chuan Pathianin mi tîr lo a ni ang.

³⁰Amaherawhchu, LALPAN thil thar a siama, leiin a kâ a âna, anmahni leh an ta zawng zawng a lema, Seol-ah a nunga an luh erawh chuan hêng mite hian LALPA an lo ngainêp a ni tih in hria ang,” a ti a.

³¹Tin, heti hi a ni a, chûng thu zawng zawng chu a sawi zawh chuan, an hnuai lei chu a lo khi chat ta phuk mai a;

³²tichuan, lei chuan a kâ a âng a, an chhûngkuain Kora mite zawng zawng, an bungrua zawng zawng nên a lem ta vek hlawm a.

³³Chutichuan, anmahni leh an ta zawng zawng chu Seol-ah chuan a nung chungin an pil ta vek a, lei chuan a kâ a chîp hnan a, pung khâwm zîng ata chu an boral ta a.

³⁴Tichuan, an vêla Israel mi zawng zawngte chu an au thâwmah chuan an tlân darh a, “Leiin min lem ve dah reu reu vang e,” an ti a.

³⁵Tin, LALPA aṭangin mei a lo chhuak a, rimtui hlântu mi zahnih leh sawmngate chu a rawn kâng hlum ta a.

³⁶Tin, LALPAN Mosia a bia a,

³⁷“Nangin mei chu tidarh la, puithiam Arona fapa Eleazara chu mei ata mei lâkna chu la chhuak tûrin hrilh rawh, thil thianghlim a ni si a.

³⁸Anmahni nunna chunga sualho mei lâknate pawh chu la la, maichâm khuhna thlêngah chher ni rawh se. LALPA hmaa hlan a ni a; chuvângin, a thianghlim a ni; chu chu Israela thlahte tâna chhinchhiahna a ni ang,” tiin.

³⁹Tin, puithiam Eleazara chuan kângho dâr mei lâknate chu a la a, Israela thlahte tâna hriat rengna te, Arona thlah ni lo hnam dang rêng rêng, LALPA hmaa rimtui hâl tûra an kal hnaih loh nân te, Kora leh a pâwlte anga an awm loh nân te, Mosia hmanga a hnêna LALPAN a sawi ang chuan maichâm khuh nân an chher ta a.

⁴⁰

⁴¹Nimahsela, a tûkah chuan, “LALPA mite in tihlum a ni,” tiin Israela thlah mipui zawng zawng chu Mosia leh Arona chungah an phunnawi a.

⁴²Tin, heti hi a ni a, Mosia leh Arona chunga mipui an pun khâwm lai chuan inbiakna puan in lam chu an hawi a; tin, ngai teh, chhûmin a rawn khuh a, LALPA ropuina a lo lang a.

⁴³Tin, Mosia leh Arona chu inbiakna puan in kawtah chuan an kal a.

⁴⁴Tin, LALPAN Mosia a bia a,

⁴⁵“Hêng mipui zîng ata hi inthiarfihlîm rawh u, ka rawn tihboral thut theih nân,” tiin. Tin, anni chu an bawkkhup a.

⁴⁶Tin, Mosian Arona hnênah, “I mei lâkna keng la, maichâm ata mei dah la, rimtui phul la, mipui hnênah kalpui thuai la, an tân remna siam rawh; LALPA hnên ata thinurna a lo chhuak a ni. Hri a lêng ṭan mêk a ni,” a ti a.

⁴⁷Tin, Arona chuan Mosia sawi ang chuan a keng a, pungho zîngah chuan a tlân lût a; tin, ngai teh, hri chu mipui zîngah chuan a lo lêng ṭan tawh a. Tin, rimtui chu a phul a, mipui tân chuan remna a siam a.

⁴⁸Mitthi leh mi nung inkârah a ding a, hri chu a kiang ta a.

⁴⁹Tichuan, Kora chungchâng thua thite tiam lovin, hri-a thi zawng zawng chu sîngkhat leh sângli leh zasarih an ni.

⁵⁰Tin, Arona chu inbiakna puan in kawngkaa Mosia hnênah chuan a lêt leh a; tichuan, hri chu a kiang ta a.