Read Mizo_Old_version Numbers 17 Bible Online

Numbers 17 - Mizo_Old_version bible

Numbers 17

¹Tin, LALPAN Mosia a bia a,

²“Israela thlahte bia la, an chhûngkaw tin pualah tiang pakhat ṭheuh zêl, an chhûngkaw zir zêla an puipate zawng zawng zât, tiang sâwm leh pahnih la la; tin, an tiangah chuan an hming ṭheuh ziak rawh.

³Tin, Levia tiangah chuan Arona hming ziak ang che: an chhûngkaw tin atân tiang pakhat zêl a ni tûr a ni.

⁴Tin, kan inbiakna, inbiakna puan in thuhriattîrna hmaah chuan i dah tûr a ni.

⁵Tin, heti hi a ni ang a, ka mi thlan tûra tiang chu a chawr ang a; tichuan, Israela thlahte phunnawina, i chunga an phunnawina hi ka tireh dâwn a ni,” tiin.

⁶Chutichuan, Mosia chuan Israela thlahte chu a bia a, an puipate zawng zawng chuan an chhûngkaw tin pualah, puipa tinin tiang pakhat zêl, tiang sâwm leh pahnih an pe a: Arona tiang pawh chu an tiang zîngah chuan a tel ve a.

⁷Tichuan, Mosian thuhriattîrna puan inah LALPA hmaah tiangte chu a dah a.

⁸Tin, a tûkah chuan Mosia chu thuhriattîrna puan inah chuan a va kal a; tin, ngai teh, Levi chhûngkaw puala Arona tiang chu a lo chawr a, a kuhmûm a, a pâr a, vaiumkhal a lo rah a.

⁹Tin, Mosia chuan LALPA hma ata tiang zawng zawng chu Israel-hote hnênah a la chhuak a; an lo en a, anmahni tiang ṭheuh chu an la a.

¹⁰Tin, LALPAN Mosia hnênah, “Helhmang fate an ni tih hriattîr ṭhîn nân Arona tiang chu thuhriattîrna bulah dah leh rawh; tichuan, ka chunga an helna hi i tihrehsak thei dâwn nia, an thih loh nân,” a ti a.

¹¹Chutiang chuan Mosia chuan a ti a; LALPAN thu a pêk ang chuan a ti a.

¹²Tin, Israela thlahte chuan Mosia hnênah, “Ngai teh, kan boral a ni alâwm, kan chhe zo ta, kan chhe zo vek alâwm.

¹³LALPA biakbûk rawn hnaih apiangte chu an thi zêl a; kan boral vêk dâwn em ni ang?” an ti a.