Read Mizo_Old_version Numbers 18 Bible Online

Numbers 18 - Mizo_Old_version bible

Numbers 18

¹Tin, LALPAN Arona hnênah, “Nang leh i fapate leh in chhûngkua hian hmun thianghlim bawhchhiatna mawh chu in phur ang a, puithiamho bawhchhiatna mawh erawh chu nangmah ngei leh i fate chauhvin an phur ang.

²Tin, Levia chi, i pa chi, i unauten an zawm ve chia, rawng an bâwl theih nân i kiang hnaiah awmtîr la; amaherawhchu, nang leh i fapate chu thuhriattîrna puan in bulah in awm tûr a ni.

³I hna an puibâwm ang chia, puan in lam hna zawng zawng an chang ang a; amaherawhchu, hmun thianghlim bungbêl leh maichâm chu rawn hnaih suh se, an thih loh nân, anni emaw, nang emaw pawh.

⁴Anni chuan an kawp ang chia, puan in lam hna zawng zawngah inbiakna puan in hna chu an chang ang a; hnam dang chuan an rawn hnaih tûr che u a ni lo.

⁵Tin, nangin hmun thianghlim hna leh maichâm hna chu i chang ang, Israela thlahte chunga thinurna a awm tawh loh nân.

⁶Tin, ngai teh, kei hian i unau Levi-hote chu Israela thlahte zîng ata ka thlang chhuak a, inbiakna puan in rawngbâwl tûra LALPA hnêna pêk, i tâna thilpêk an ni ang.

⁷Tin, nang leh i fapate hian maichâm leh puanzâr chhûng lam thu-ah in puithiam hna chu in thawk ang; tin, nangin rawng i bâwl ang. Puithiam hna hi in rawngbâwl hna atân ka pe che u a; hnam dang rawn inrawlh ve apiang erawh chu tihhlum an ni ang,” a ti a.

⁸Tin, LALPAN Arona a bia a, “Ngai teh, kei hian ka tâna thên thilhlan, Israela fate thilhlan zawng zawngte lain nang leh i fapaten kumkhuaa in chanpual atân ka pe che u a.

⁹Meia hâl bâng thil thianghlimte chu i ta a ni ang a: an thilhlan tinrêng - an chhangphut thilhlan te, an sual thawina thilhlan te, an thiam loh thawina thilhlan ka hnêna an hlan tûrte lamin nang leh i fapate pual a ni ang.

¹⁰Thil thianghlim eiin chumi chu in ei ang a, mipa zawngin an ei ang a; i pual a ni ang.

¹¹Hêng hi i pual a ni ang: chhangphut thilhlana an thilpêk, Israela thlahte thên thilhlan zawng zawngte lamin; nang leh i fapate leh i fanute nên in kumkhaw chanpualah ka pe che u a ni. I ina mi thianghlim zawng zawngin an ei thei ang.

¹²Hriak ṭha ber te, grêp ṭha ber te, buh ṭha ber te, rah hmasa ber LALPA tâna an pêkte chu ka pe a che.

¹³An lova rah hmin hmasa ber LALPA tâna an rawn lâk chu i ta a ni ang a; i ina mi thianghlim zawng zawngin an ei thei ang.

¹⁴Israel-ho thilhlan zawng zawng chu i ta a ni ang.

¹⁵LALPA tâna an pêk, chhûl keu hmasa ber apiang chu, mihring pawh, ran pawh i ta a ni ang a; amaherawhchu, fa tîr chu i tlan ngei tûr a ni ang a, ran thianghlim lo no piang thla hmasa ber pawh chu i tlan tûr a ni.

¹⁶Thla khat a nihin tlan tûrte chu tlanna man i ruat dân angin, hmun thianghlima hman sekel ngain i tlan tûr a ni (sekel chu gera sawmhnih a ni).

¹⁷Amaherawhchu, bâwngpa piang thla hmasa ber te, berâm piang thla hmasa ber te, kêl piang thla hmasa berte chu i tlan tûr a ni lo; an thianghlim a ni. An thisen chu maichâmah i theh ang a, LALPA tâna rimtuiah an thaute chu meia thilhlanah i hâl tûr a ni.

¹⁸An sa chu i ta a ni ang, thên thilhlan irâwm leh a bawp ding lam i ta a ni ang hian.

¹⁹Thil thianghlima thên thilhlan, Israela thlahten LALPA tâna an hlante chu in kumkhaw chanpual atân ka pe che u a ni; LALPA hmaa nang leh i fapate leh i fanute nêna chatuan chi thuthlung a ni ang.” a ti a.

²⁰Tin, LALPAN Arona hnênah, “An ramah chuan rochan in nei lo vang a, an zîngah chanvo in nei ve hek lo vang; Israela thlahte zînga i chanvo leh i rochan chu keimah hi ka ni.

²¹“Tin, Levia thlahte chu ngai teh, rawngbâwl hnaa an rawngbâwl hna, puan in rawngbâwl hnaa an rawngbâwl manah Israel rama sâwma pakhat zawng zawng hi ka pe a ni.

²²Tûn achinah chuan Israela thlahte chuan inbiakna puan in chu an rawn hnaih tûr a ni lo; sual mawh phurin an thi dah ang e.

²³Levi-ho hi erawh chuan inbiakna puan in rawngbâwl hna an thawk ang a, a mawh engkim an phur ang; hei hi i thlahte chen atâna dân a ni ang a, Israela thlahte zingah rochan an nei lo vang.

²⁴Israela thlahten sâwma pakhat LALPA tâna thên thilhlanah an hlan chu Levi-ho rochan atân ka pe a ni; chu vâng chuan an hnênah, ‘Israela thlahte zîngah rochan an nei lo vang,’ ka lo ti tawh rêng a ni,” a ti a.

²⁵Tin, LALPAN Mosia a bia a,

²⁶“Chûng thu lovah pawh chuan, Levi-ho chu bia la, an hnênah, ‘In rochan atâna Israela thlahte sâwma pakhat ka pêk che u an lak ata in dawn hun chuan, chumi sâwma pakhat ata sâwma pakhat chu LALPA hnênah thên thilhlanah in hlân tûr a ni.

²⁷Tichuan, in thên thilhlan chu hruia buh leh uain haw hmasa bera ngaih a ni ang.

²⁸Chutiang chuan Israela thlahte laka sâwma pakhat in dawn zawng zawnga mi chu, LALPA tâna thên thilhlanah in hlân ve zêl bawk tûr a ni a; tin, chumi LALPA thên thilhlan chu puithiam Arona in pe tûr a ni.

²⁹In thil dawn zawng zawnga mi chu a ṭha ber, a thianghlim ber zêl LALPA thên thilhlanah in hlân tûr a ni.

³⁰Chuvângin, an hnênah, chumia ṭha ber in thên hun chuan Levi-ho hruiha hâwng leh uain hâwng anga ngaih a ni ang.

³¹Khawiah pawh in ei thei ang, nangni leh in chhûngte pawhin; inbiakna puan ina in rawngbâwl man a ni si a.

³²A ṭha ber in thên chuan a sual mawh in phur lo vang a, Israela thlahte thil thianghlim chu in tibawrhbâng lo vang a, in thi dâwn lo nia,’ ti rawh,” tiin.