Read Mizo_Old_version Numbers 19 Bible Online

Numbers 19 - Mizo_Old_version bible

Numbers 19

¹Tin, LALPAN Mosia leh Arona a bia a,

²“Hei hi LALPA thupêk dân chu a ni, ‘Israela thlahte chu bâwngla sen hmêlhem lo, sawisêl bo, nghâwngkawl la bel hauh loh rawn kai tûrin hrilh rawh.

³Puithiam Eleazara i pe ang a; tin, anin daipâwnah a hruai chhuak ang a, a hmaah tuin emaw a tihlum tûr a ni;

⁴tin, puithiam Eleazara chuan a kutzungṭangin a thisen chu a la ang a, inbiakna puan in hma lamah a thisen chu vawi sarih a theh ang.

⁵Tin, tuin emaw bâwngla chu a mit hmuhah a hâl ang a; a vun te, a sa te, a thisen te, a êk te nên a hâl ang.

⁶Tin, puithiamin sidar thing leh husop leh lazai sen a la ang a, bâwngla an hâlah chuan a paih lût tûr a ni.

⁷Tin, puithiam chuan a silhfênte a su ang a, a inbual ang a, chumi zawhah chuan riahhmunah a kal ang a; tlai lam thlengin puithiam chu a thianghlim lo vang.

⁸Tin, a hâltu chuan a silhfênte a su ang a, a inbual ang a, tlai lam thlengin a thianghlim lo vang.

⁹Tin, mi bawrhbâng lovin bâwngla vâp chu a la khâwm ang a, daipâwn hmun faiah a dah ang a, Israela thlah mipuite tâna inthenna tuiah hman tûr a ni; chu chu sual thawina a ni.

¹⁰Tin, bâwngla vâp tikhâwmtu chuan a silhfênte a su ang a, tlai lam thlengin a thianghlim lo vang. Hei hi Israela thlahte tân leh hnam dang an hnêna awmte tân kumkhaw dân tûr a ni.

¹¹“ ‘Tu ruang pawh a dektu apiang chu ni sarih an thianghlim lo vang.

¹²Chu mi chu ni thum niah leh ni sarih niah a inthian ang a; tichuan, a lo thianghlim ang. Amaherawhchu, ni thum niah leh ni sarih niah a inthen loh chuan a thianghlim lo vang.

¹³Tu pawhin tu ruang pawh a deha, a inthen loh chuan LALPA biakbûk a tibawlhhlawh a ni. Chu mi chu Israel mite zîng ata tuithlâr tûr a ni. Inthenna tui chu a chungah theh loh a nih avângin a thianghlim lo vang; a thianghlim lohna chu a chhûngah a la awm a ni.

¹⁴Mi, puan ina a thih chuan hei hi a tih dân tûr chu a ni: puan ina lût apiang leh puan in chhûnga awm apiangte chu ni sarih an thianghlim lo vang a;

¹⁵tin, bungbêl inhawng, a chhinnaa chhin loh apiang chu a bawlhhlawh a ni.

¹⁶Tin, tu pawhin tâmlakah khandaiha thah emaw, awmlaia thi ruang emaw, mihring ruh emaw, thlân emaw a deh chuan ni sarih a thianghlim lo vang.

¹⁷“ ‘Tin, a thianghlim lote pualah sual thawina vâp chu an la ang a, bêlah tuikhur tui nên an chhûng ang.

¹⁸Tin, mi thiangin husop a la ang a, tuiah chuan a hnim ang a, puan in te, bungbêl zawng zawng te, chuta mi awm zawng zawng te, ruh emaw, thah ruang emaw, mitthi ruang emaw, thlân emaw khawihtute chu a theh ang.

¹⁹Mi thiangin ni thum ni leh ni sarih niah mi thianghlim lo chu a theh ang a; ni sarih niah a tithianghlim ang a; a silhfênte a su ang a, a inbual ang a, tlai lamah chuan a lo thianghlim tawh ang.

²⁰Mi thianghlim lo inthian lo erawh chuan LALPA hmun thianghlim a tihbawlhhlawh avângin, chu mi chu pung khâwmho zîng ata tuithlâr tûr a ni. Inthenna tui chuan theh loh a ni a; a thianghlim lo a ni.

²¹Hei hi an tân kumkhaw dân tûr a ni: inthenna tuia theh apiang chuan an silhfênte an su ang a; tin, inthenna tui khawih apiang chu tlai lam thlengin an thianghlim lo vang.

²²Tin, mi thianghlim lovin a khawih apiang chu a thianghlim lo zêl ang a; tin, chu mi khawihtu apiangte chu tlai lam thlengin an thianghlim lo vang,’ ” tiin.