Read Mizo_Old_version Numbers 2 Bible Online

Numbers 2 - Mizo_Old_version bible

Numbers 2

¹Tin, LALPAN Mosia leh Arona a bia a,

²“Israela thlahte chuan an chhûngkaw chhinchhiahnate târ ṭheuhvin an pâwl tih dân angin an puan in an zâr tûr a ni; inbiakna puan in ân ṭheuhvin a vêlin an zâr tûr a ni.

³Ni lo chhuahna khawchhak lampanga an chhûngkaw chhinchhiahna târin, puan in zâr tûrte chu Juda pâwlho an ni ang a; tin, Juda thlahte puipa tûr chu Aminadaba fapa Nasona a ni ang.”

⁴A pâwlte tam lam chu 74,600 an ni.

⁵“Tin, a dawta puan in zârtu tûrte chu Isakar chi an ni tûr a ni a, Isakara thlahte puipa tûr chu Zuara fapa Nethanela a ni ang.”

⁶A pâwlte tam lam chu 54,400 an ni.

⁷“Tin, Zebulun chite: Zebuluna thlahte puipa tûr chu Helona fapa Eliaba a ni ang.”

⁸A pâwlte tam lam chu 57,400 an ni.

⁹“An pâwl tam dân azir zêla Juda-ho an chhiarte chu 1,86,400 an ni. Anniho hian hma an hruai zêl tûr a ni.

¹⁰“An chhûngkaw chhinchhiahna târin a chhim lampangah Reuben-ho chu an awm ang a; Reubena thlah puipa tûr chu Sedeura fapa Elizura a ni ang.”

¹¹A pâwlte tam lam chu 46,500 an ni.

¹²“Tin, a dawta zâr tûr chu Simeon chi an ni ang: Simeona thlahte puipa tûr chu Zurisadaia fapa Selumiela a ni ang.”

¹³A pâwlte tam lam chu 59,300 an ni.

¹⁴“Tin, Gad chite: Gada thlahte puipa tûr chu Reuela fapa Eliasapha a ni ang.”

¹⁵A pâwlte tam lam chu 45,650 an ni.

¹⁶“Reuben-ho tam lam chu 1,51,450 an ni. Anni hi an dawta chhuak tûr an ni.

¹⁷“Chutichuan, inbiakna puan in chu a chhuak ang a, Levi-ho chu a laiah an awm ang a, an awmna azir zêlin a pâwl pâwlin an kal ṭheuh tûr a ni.

¹⁸“An chhûngkaw chhinchhiahna târin a thlang lampangah chuan Ephraim-ho an awm ang a: Ephraima thlahte puipa tûr chu Amihuda fapa Elisama a ni ang.”

¹⁹A pâwlte tam lam chu 40,500 an ni.

²⁰“Tin, a dawtah chuan Manase chi an ni ang: Manasea thlahte puipa tûr chu Pedazura fapa Gamaliela a ni ang.”

²¹A pâwl tam lam chu 32,200 an ni.

²²“Tin, a dawt lehah Benjamin chite: Benjamina thlahte puipa tûr chu Gideonia fapa Abidana a ni ang.”

²³A pâwlte tam lam chu 35,400 an ni.

²⁴“Tin, Ephraim-hote tam lam chu 1,08,100 an ni. Tin, a dawttu dawt lehtuah an chhuak tûr a ni.

²⁵“An chhûngkaw chhinchhiahna târin Dan-ho chu a hmâr lampangah an awm ang: Dana thlahte puipa tûr chu Amisadaia fapa Ahiezera a ni ang.”

²⁶A pâwlte tam lam chu 62,700 an ni.

²⁷“Tin, a dawta puan in zâr tûr chu Aser chi an ni ang: Asera thlahte puipa tûr chu Okrana fapa Pagiela a ni ang.”

²⁸A pâwlte tam lam chu 41,500 an ni.

²⁹“Tin, a dawt lehah Naphtali chite: Naphtalia thlahte puipa tûr chu Enana fapa Ahira a ni ang.”

³⁰A pâwlte tam lam chu 53,400 an ni.

³¹“Dan-ho tam lam chu 1,57,600 an ni. Tin, anniho hian a pâwl pâwla chhuakin hnu an dâl zêl tûr a ni,” tiin.

³²Hêng hi Israela thlahte chhûngkaw tina mi an chhiarte chu, an tam lam 6,03,550 an ni.

³³Levi-ho erawh chu Israela thlahte zînga chhiar an ni ve lo, LALPAN Mosia thu a pêk ang khân.

³⁴Chutiang chuan Israela thlahte chuan an ti a; LALPAN Mosia thu a pêk ang zêlin a pâwl pâwlin puan in an zâr a; tin, chutiang bawkin a chi chiin, a chhûngkua kua zêlin an chhuak ṭhîn a.